މީހުން ބިނާ ކުރުމުގައި، ދުވަހަކު ވެސް ސަރުކާރަކުން ނުކުރާވަރުގެ މަސައްކަތް މި ސަރުކާރުން ކޮށްފި – މިނިސްޓަރ ހަސަން
3 އޮކްޓޯބަރު 2021 | އާދީއްތަ 06:37މި ޕެންޑެމިކްގައި އެންމެ ދަތިއުނދަގޫ ދުވަސްވަރުގައި ވެސް މި ސަރުކާރުން މީހުން ބިނާކުރުމަށް ޓަކައި އެކުލަވައިލި އެއްވެސް ޕްރޮޖެކްޓަކަށް އުނިއިތުރެއް ނުގެންނަވާ
ޑރ. އިބްރާހީމް ހަސަން - ހަޔަރ އެޑިޔުކޭޝަން މިނިސްޓަރ
މީހުން ބިނާ ކުރުމުގައި، ދުވަހަކު ވެސް ސަރުކާރަކުން ނުކުރާވަރުގެ މަސައްކަތް މި ސަރުކާރުން ކޮށްފި ކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ހަސަން ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ރައްޔިތުންގެ މަޖިލީހުގައި މެމްބަރުން ކުރެއްވި ސުވާލުތަކަށް ޖަވާބުދެއްވަމުންނެވެ. މިނިސްޓަރ ވިދާޅުވީ، މީހުން ބިނާކުރުމަށް ޓަކައި އަދި ޚާއްޞަކޮށް މަތީ ތަޢުލީމާއި ތަމްރީނު ފޯރުކޮށްދިނުމާއި، އޭގެ އެކްސެސަބިލިޓީއާއި އެފޯޑިބިލިޓީއަށް ބަލާއިރު، ދުވަހަކު ވެސް ސަރުކާރަކުން ނުކުރާވަރުގެ މަސައްކަތް މި ސަރުކާރުން ކޮށްފައިވާކަމަށެވެ. ރިޔާސީ ވަޢުދުތަކަށް ބައްލަވައިލެއްވިޔަސް އެކަން ވަރަށް ސާފުކޮށް އެނގިވަޑައިގެންނަވާނެ ކަމަށާއި، އެންމެ ފުރަތަމަ ކަމަކަށް ފަސްޓް ޑިގްރީ ސްކީމުގައި ރާއްޖޭގައި މިހާރު މި އޮތީ ފުރަތަމަ ޑިގްރީއަށް ތަޢުލީމު ހާސިލުކުރުން މި އޮތީ ވަރަށް ބޮޑު ފަސޭހައަކަށް ވެގެންގޮސްފައި ކަމަށެވެ.
ރާއްޖޭގައި މި ޕެންޑެމިކްގައި އެންމެ ދަތިއުނދަގޫ ދުވަސްވަރުގައި ވެސް މި ސަރުކާރުން މީހުން ބިނާކުރުމަށް ޓަކައި އެކުލަވައިލި އެއްވެސް ޕްރޮޖެކްޓަކަށް އުނިއިތުރެއް ނުގެންނަވާކަން މިނިސްޓަރ ފާހަގަކުރެއްވިއެވެ.
ރައީސުލްޖުމްހޫރިއްޔާގެ ޚާއްޞަ ސްކޮލަރޝިޕާއި، މާއްދާތަކުން މަތީ ވަނަ ހޯދާ ދަރިވަރުންނަށް ދޭ ސްކޮލަރޝިޕް ވެސް ދެމުން އައި ކަމަށް ވިދާޅުވިއެވެ. ބޭނުން ތަނަކަށް ބޭނުން ދާއިރާއަކުން ކިޔަވައިދިނުމުގެ ފުރުޞަތު ރައްޔިތުންނަށް ޕެންޑަމިކްގައި ވެސް ފޯރުކޮށްދީފައިވާނެ ކަމަށް ވިދާޅުވިއެވެ.
މި ޕެންޑެމިކުގެ ހާލަތުގައި ފާހަގަކުރެވުނު، ފަތުރުވެރިކަމުގެ ދާއިރާއިން ވަރަށް ގިނަ ބަޔަކު ރާއްޖެ ދޫކޮށްލާފައި ދިޔުމުން، ފަތުރުވެރިކަމުގެ ދާއިރާއަށް މީހުން ބިނާކުރުމަށް ޓަކައި ޚާއްޞަ ޕްރޮޖެކްޓެއް 'ސްކިލްޑް ފޯރ ރެޒިލިއަންޓް ވޯކްފޯސް'ގެ ނަމުގައި ޚާއްސަ ޕްރޮގްރާމެއް ފެށިކަން މިނިސްޓަރ ފާހަގަކުރެއްވިއެވެ. މިނިސްޓަރ ވިދާޅުވީ، ވޯލްޑް ބޭންކުގެ އެހިތެރިކަމާއެކު ކުރިއަށްދާ މި ޕްރޮޖެކްޓު މިހާރު ޕްރައިވެޓް ސެކްޓަރާ ގުޅިގެން ކުރިއަށްދާ ކަމަށެވެ. ޕްރައިވެޓް ސެކްޓަރަށް އެކަނިވެސް ހަ ސަތޭކައަށް ވުރެ ގިނަ ޒުވާނުން ތަމްރީންކުރުމަށް ކޮންޓްރެކްޓް ކުރެވިފައިވާކަން ފާހަގަކުރައްވަމުން މިނިސްޓަރ ވިދާޅުވީ، މީހުން ބިނާކުރެވޭނީ ސަރުކާރާއި ޕްރައިވެޓް ސެކްޓަރާ ގުޅިގެން އެކުގައި އެއް އަމާޒަކަށް، އެއް މަޤްޞަދެއްގައި މަސައްކަތް ކޮށްގެން ކަމަށެވެ. މީހުން ބިނާކުރުމަށް ކުރާ މަސައްކަތުގެ ނަތީޖާ ވެސް ފެންނަމުން އެބަދާ ކަމަށާއި، މި ކުރާ އިންވެސްޓުގެ ފުރިހަމަ ނަތީޖާ ފެންނާނީ ދެތިން އަހަރު ފަހުން ކަމަށް ވިދާޅުވިއެވެ.
