ޖޫނިއަރ ކޮލެޖްގައި 2023ވަނަ އަހަރު ކިޔަވާދޭނެ - މިނިސްޓަރ ޙަސަން

ހއ. ދިއްދޫ ޖޫނިއަރ ކޮލެޖްގައި 2023ވަނަ އަހަރު ކިޔަވައިދޭން ފެށޭވަަރަށް މަސައްކަތް ކުރަމުން އަންނަ ކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ޙަސަން ވިދާޅުވެއްޖެއެވެ.

މިނިސްޓަރ މިހެން ވިދާޅުވީ, ދިއްދޫގައި ގާއިމްކުރަން ނިންމާފައިވާ ޖޫނިއަރ ކޮލެޖްގެ މަސައްކަތާ ގުޅޭ ގޮތުން އެ ދާއިރާގެ މެމްބަރު މެންބަރު ޢަބްދުﷲ ވަޙީދު ކުރެއްވި ސުވާލަށް މަޖިލީހުގައި ޖަވާބު ދެއްވަމުންނެވެ.

Advertisement

މެމްބަރު ކުރެއްވި ސުވާލަކީ, ދިއްދޫގައި ޖޫނިއަރ ކޮލެޖެއް ޤާއިމުކުރުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ރިޔާސީ ވަޢުދަކަށް ވީހިނދު، އަދި އެ ޕްރޮޖެކްޓަކީ2020 ވަނަ އަހަރާއި 2021 ވަނަ އަހަރުގެ ދައުލަތުގެ ބަޖެޓުގައިވެސް ހިމެނިފައިވާ ޕްރޮޖެކްޓެއްކަމާއި, 2021 ވަނަ އަހަރުގެ މިހިސާބަށް އައިއިރުވެސް، އެ ކޮލެޖް ޤާއިމުކުރެވިފައިނުވާތީ، އެ ކޮލެޖް ޤާއިމުކުރުމުގެ މަސައްކަތް މިހާރު ގޮސްފައިއޮތް ހިސާބަކީ ކޮބައިތޯއެވެ؟ އަދި އެ ކޮލެޖް ޤާއިމުކުރުމުގެ ޢަމަލީ މަސައްކަތް ފެށޭނީކޮން ތާރީޚަކުތޯއެވެ؟ އަދި އެ ކޮލެޖް ހުޅުވައި، އެ ތަނުގައި ކިޔަވައިދޭން ފެށޭނީ ކޮން ތާރީޚަކުތޯއެވެ. މިނިސްޓަރ ވަނީ މިކަމުގެ ތަފްސީލް ހިއްސާ ކުރައްވައި, މިހާރު ކުރެވިފައި ހުރި މަސައްކަތްތައްވެސް ތަފްސީލްކޮށްދެއްވާފައެވެ.

މިނިސްޓަރ ވިދާޅުވީ, ދިއްދޫގެ ޖޫނިއަރ ކޮލެޖްގެ މަސައްކަތް 2022ގެ ފަހުކޮޅަށް ނިމި ކޯސްތަކަށް އިއުލާން ކުރެވޭވަރުވާނެ ކަމަށެވެ. އަދި 2023ވަނަ އަހަރު އެތަނުގައި ކޯސްތައް ފެށި ކިޔަވައިދޭން ފަށާނެ ކަމަށެވެ. މިނިސްޓަރ ވިދާޅުވީ, ކޮލެޖްގެ މަސައްކަތް ޕީއެސްއައިޕީގެ ދަށުން ކުރިއަށް ގެންގޮސް ނިންމާލުމަށް ދިގު މުއްދަތެއް ނަގާނެ ކަމަށެވެ. ފަހަރަކު ތަންކޮޅެއްގެ މަސައްކަތް ކުރުމުގެ ބަދަލުގައި އެއްކޮށް މަސައްކަތް ގެންދިޔުމަށްޓަކައި, ޕީޕީއައިގެ ދަށުން އިންވެސްޓަރެއް ހޯދުމުގެ މަސައްކަތް މިހާރު ކުރިއަށްދާކަމަށް ވިދާޅުވިއެވެ. މިގޮތަށް ނިންމީ ސަރުކާރާ މަޝްވަރާ ކުރުމަށްފަހު ކަމަށްވެސް ވިދާޅުވިއެވެ. ޖޫނިއަރ ކޮލެޖްގެ މަސައްކަތް ކުރިއަށްދަނީ ކައުންސިލާވެސް މަޝްވަރާ ކުރުމާއެކުގައި ކަމަށާއި, ޖޫނިއަރ ކޮލެޖް ވަކި ދާއިރާއަކަށް ޚާއްސަ ކުރުުމަށް މަސައްކަތްތަކެއްވެސް ކުރެވެމުން އަންނަ ކަމަށް ވިދާޅުވިއެވެ.

ކޮލެޖް އެޅުމަށް ބޭނުންވާ ބިން ހޯދުމަށްވެސް ކައުންސިލާއެކު މަޝްވަރާކުރެވި, ބިން ހަމަޖެހިފައިވާކަމަށް ވިދާޅުވިއެވެ. އެހެންކަމުން އިންވެސްޓަރެއް ހަމަޖެހުމާއެކު އަމަލީ މަސައްކަތް ފަށައިގަނެވޭނެ ކަމަށްވެސް މިނިސްޓަރ ވިދާޅުވިއެވެ.

ސަރުކާރުން ވެފައިވާ ވައުދު ފުރިހަމަ ގޮތުގައި ގެނެސް ދިނުމަށް މަސައްކަތް ކުރިން 11 އޮކްޓޯބަރގައި ރައީސާއެކު މަޝްވަރާ ކުރެއްވިކަންވެސް މިނިސްޓަރ ފާހަގަކުރެއްވިއެވެ.

ދިއްދޫގައި ޖޫނިއަރ ކޮލެޖް އެޅުމުގެ މަސައްކަތަށް 2019 ވަނަ އަހަރު 1.6 މިލިއަން ރުފިޔާ އަދި 2020 ވަނަ އަހަރުގެ ބަޖެޓުގައި 3 ލައްކަ ރުފިޔާ ކަނޑައެޅިއެވެ. މި ބަޖެޓުގެ ތެރެއިން ޑިޒައިންގެ މަސައްކަތްތައް ދަނީ ކުރިއަށެވެ.

ޖޫނިއަރ ކޮލެޖުގެ މަސައްކަތަކީ ރާއްޖޭގެ ތަޢުލީމީ ނިޒާމަށް މުޅިން އަލަށް ތަޢާރަފްވާ މޮޑެލްއެކެވެ. މި މޮޑެލްގެ ކޮލެޖުތައް ޚާއްސަކުރާނީ އޯލެވެލް ނިންމާފައި ނުކުންނަ އުމުރުން 16 އަހަރާއި 21 އަހަރާ ދެމެދުގެ ދަރިވަރުންނަށް ފައުންޑޭޝަން ލެވަލްތަކުގެ ކޯސްތައް ކުރިއަށްގެންދިއުމަށެވެ. މި ކޮލެޖްތަކުގައި ހިންގާނީ 2 އަހަރުގެ މުއްދަތުން ހިންގާ ކޯސްތަކާއި ތަމްރީންތަކެވެ.