މޫސުމަށް ސަމާލުވޭ! ރާއްޖެއާ ދުރުން، ''ގުލާބު''ގެ ނަން ދީފައިވާ ތޫފާނެއް އުފެދިފައިވޭ!
26 ސެޕްޓެމްބަރު 2021 | އާދީއްތަ 14:30ޚާއްސަކޮށް ކަނޑު ދަތުރުކުރާ ފަރާތްތަކުން ސަމާލުވާން ޖެހޭ
ރާއްޖޭގެ ހުރިހާ ހިސާބެއްގެ ކަނޑުތައް ގަދަވާނެ ކަމަށް މޫސުމާބެހޭ ޤައުމީ އިދާރާއިން ބުނޭ
ރާއްޖެއާ ދުރުން, ބޭ އޮފް ބެންގޯލުގެ ހުޅަނގުއުތުރުގައި ''ގުލާބު''ގެ ނަން ދީފައިވާ ތޫފާނެއް އުފެދިފައިވާ ކަމަށް މޫސުމާ ބެހޭ ގައުމީ އިދާރާއިން ބުނެފިއެވެ.
މޫސުމާ ބެހޭ ގައުމީ އިދާރާއިން ބުނީ, ހުޅަނގު މޫސުމުގެ ބާރުގަދަވެ، ރާއްޖޭގެ އެކި ހިސާބުތަކަށް ވައިގަދަވެ ވިއްސާރަކުރާނެ ކަމަށާއި، މި ވިއްސާރަ ކުރިއަށް އޮތް 24 ގަޑިއިރު ވެސް ރާއްޖޭގެ އެކި ހިސާބުތަކަށް ކުރަމުންދާނެ ކަމަށް ލަފާކުރެވޭ ކަމަށެވެ.
މޫސުމަށް ސަމާލުވުމަށް އިލްތިމާސްކޮށް މޫސުމާ ބެހޭ ގައުމީ އިދާރާއިން ބުނީ ޚާއްސަކޮށް ކަނޑު ދަތުރުކުރާ ފަރާތްތަކުންނާއި، ހައިވޭ އަދި ބްރިޖްގައި ދަތުރުކުރާއިރު މޫސުމަށް ވަރަށް ބޮޑަށް ސަމާލުވާން ޖެހޭ ކަމަށެވެ.
މީގެ އިތުރުން މޫސުމާ ބެހޭ ގައުމީ އިދާރާއިން ބުނީ, ތޫފާން "ގުލާބު" ހުޅަނގަށް ދަތުރުކޮށް, އާދީއްތަ ދުވަހުގެ ރޭގެ ވަގުތެއްގައި އިންޑިއާގެ އިރުމަތީ އައްސޭރި ހުރަސްކުރާނެ ކަމަށް ލަފާ ކުރެވޭ ކަމަށެވެ.
ރާއްޖޭގެ މޫސުން ގޯސްވުމާ ގުޅިގެން މުޅި ރާއްޖެއަށް ވަނީ ވައިޓް އެލަރޓް ނެރެފައެވެ. އެލަރޓް ނެރެފައިވަނީ އާދީއްތަ ދުވަހުގެ ހަވީރު 4:30ން މިރޭ 10:30ށެވެ. މޫސުމާ ބެހޭ ގައުމީ އިދާރާއިން ބުނީ ބޯކޮށް ވާރޭވެހުމާއެކު ގުގުރާނެ ކަމަށާއި، ގަޑިއަކު 19 މޭލާ 24 މޭލާ ދެމެދުގެ ބާރުމިނުގައި ވައިޖެހި, ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެ ކަމަށް ލަފާކުރެވޭ ކަމަށެވެ. އަދި ހއ.އަތޮޅުން ފެށިގެން ކ.އަތޮޅަށް ޔެލޯ އެލަރޓް ނެރެފައިވާއިރު، އެ އިދާރާއިން ބުނީ, ބޯކޮށް ވާރޭވެހި ގަޑިއަކު 25 މޭލާ 30 މޭލާ ދެމެދުގެ ބާރުމިނުގައި ވައި ޖެހި، ވިލާގަނޑުގައި ގަޑިއަކު 50 މޭލަށް ވައި ގަދަވެ ކަނޑުތައް ގަދަވާނެ ކަމަށް ލަފާކުރެވޭ ކަމަށެވެ. ޔެލޯ އެލަރޓް ނެރެފައިވަނީ އާދީއްތަ ދުވަހުގެ ހަވީރު 5:55ން މިރޭ 10:30އެވެ.
