އެކަކު މަދުކޮށް ކުޅެ ޑޯޓްމުންޑަށް ނާކާމިޔާބު

ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުގައި އެކަކު މަދުކޮށް ކުޅެ ބޮރޫޝިއާ މޮންޗެންގްލަޑްބަކް އަތުން ބޮރޫޝިއާ ޑޯޓްމުންޑް ބަލިވެއްޖެއެވެ.

އަމިއްލަ ދަނޑުގައި ކުޅުނު މެޗުން މޮންޗެންގްލަޑްބަކް މޮޅުވީ 1-0 ގެ ނަތީޖާއަކުންނެވެ.

މި މެޗުގައި އަނިޔާގެ ސަބަބުން ޑޯޓްމުންޑަށް ކުޅެމުން އަންނަ ނޯވޭގެ ޒުވާން ތަރި އާލިން ބްރައުޓް ހާލަންޑާއި، އެ ޓީމުގެ ކެޕްޓަން މާކޯ ރެއުސް ކުޅެފައެއް ނުވެއެވެ. މި މެޗުގައި ފެނިގެންދިޔަ ހަމައެކަނި ލަނޑު މޮންޗެންގްލަޑްބަކުން ކާމިޔާބުކޮށްފައިވަނީ ފުރަތަމަ ހާފުގައެވެ. މެޗުގެ 37 ވަނަ މިނެޓުގައި އޭރިއާ ތެރެއިން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ޑެނިސް ޒަކަރިއާއެވެ.

އޭގެ ތިން މިނެޓު ފަހުން ޑޯޓްމުންޑުގެ މަހްމޫދު ދާއޫދަށް ރެފުރީ ވަނީ ދެވަނަ ރީނދޫ ކާޑާއެކު ރަތް ކާޑެއް ދައްކާފައެވެ. އޭނާއަށް ރެފުރީ ދެވަނަ ރީނދޫ ކާޑު ދައްކާފައިވަނީ މޮންޗެންގްލަޑްބަކުގެ ޖޯސެފް ސްކޭލީއަށް ކުރި ފައުލަކާ ގުޅިގެންނެވެ.

އެއާއެކު މެޗުގެ ދެވަނަ ހާފު އެއްކޮށް ޑޯޓްމުންޑުން އެއް ކުޅުންތެރިއަކު މަދުކޮށް ކުޅުނުއިރު، މި ހާފުގައި އެ ޓީމަށް މާ އެދެވޭ ކުޅުމެއް ދެއްކިފައެއް ނުވެއެވެ. އެކަމަކު މެޗުގެ އިތުރު ވަގުތުގައި ނަތީޖާ އެއްވަރުކުރަން ޑޯޓްމުންޑުގެ ތޯގަން ހަޒާޑަށް ހުސް ފުރުސަތެއް ލިބުނު ނަމަވެސް، ހުހަށްހުރެ އޭނާ ބޮލުން ފޮނުވާލި ބޯޅަ ދިޔައީ ހުރަސް ދަނޑި މަތިން ބޭރަށެވެ.

މި ނަތީޖާއާއެކު ޑޯޓްމުންޑް އޮތީ ތާވަލުގެ ހަތަރުވަނައިގައި ކުޅުނު ހަ މެޗުން ލިބުނު 12 ޕޮއިންޓާއެކުއެވެ. އެއްވަނައިގައި އޮތީ ހަ މެޗުން 16 ޕޮއިންޓް ހަމަކޮށްފައިވާ އެންމެ ފަހުގެ ޗެމްޕިއަން ބަޔާން މިއުނިކެވެ. ލީގުގައި ހޮނިހިރު ދުވަހުގެރޭ ކުޅުނު މެޗުން ހޮފެންހެއިމް އަތުން 3-1 ގެ ނަތީޖާއަކުން ބަލިވުމާއެކު ވުލްފްސްބާގަށް ވަނީ ތާވަލުގެ އެއްވަނައަށް އަރަން ލިބުނު ފުރުސަތު ގެއްލިފައެވެ. އެއާއެކު އެ ޓީމު އޮތީ ތާވަލުގެ ތިންވަނައިގައި ހަ މެޗުން 13 ޕޮއިންޓާއެކުއެވެ.