އަލިފުށީ ބިންހިއްކުމާއި އެއަރޕޯޓް ތަރައްގީކުރުމުގެ މަޝްރޫއު: ޑިޒައިންގެ ކޮންސެޕްޓް މަޝްވަރާ ކުރުމަށް އެރަށަށް ޓީމެއް
ޑިޒައިން ނިމިފައިވާއިރު މިހާރު ސްޓޭކް ހޯލްޑަރުންނާއި މަޝްވަރާ ކުރުމަށް އެމްޓީސީސީގެ ޓީމެއް އެރަށަށް ގޮސްފައިވޭ
އަލިފުށީ އެއާރޕޯޓް އެޅުމުގެ މަޝްރޫއުގައި ސޮއި ކުރުމުގެ ރަސްމިއްޔާތު
ރ. އަލިފުށީ ބިންހިއްކުމާއި އެއަރޕޯޓް ތަރައްގީކުރުމުގެ މަޝްރޫއުގެ އެންވަޔަރަމަންޓަލް އިންފެކްޓް އެސެސްމަންޓް (އީއައިއޭ) ގެ މަސައްކަތަށް ގާތްގަނޑަކަށް ތިން މަސް ދުވަސް ނަގާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެފައިވާއިރު މިހާރު ޑިޒައިން ކޮންސްޕްޓް ހަދާފައިވާ ކަމަށް އާޒިމް ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން އާޒިމް ވިދާޅުވީ ޑިޒައިން ނިމިފައިވާއިރު މިހާރު ސްޓޭކް ހޯލްޑަރުންނާއި މަޝްވަރާ ކުރުމަށް އެމްޓީސީސީގެ ޓީމެއް އެރަށަށް ގޮސްފައިވާ ކަމަށެވެ. އާޒިމް ވިދާޅުވީ އަލިފުށީ އެއަރޕޯޓުގެ ހުރިހާ މަސައްކަތްތަކެއް އެމްޓީސީސީއާ ހަވާލު ކުރެވިފައި މިވަނީ ސަރުކާރާއި، ރައްޔިތުން ކުރާ އިތުބާރެއްގެ ބޮޑު ކަމުން ކަމަށެވެ. މިއީ ތާރީޚުގައި ވެސް ފާހަގަކޮށްލެވޭ މަޝްރޫއެއް ކަމަށް އާޒިމް ވިދާޅުވިއެވެ.
އީއައިއޭގެ މަސައްކަތްތަކަށް ގާތްގަނޑަކަށް ތިން މަސް ދުވަސް ހޭދަވާނެ ކަމަށް އާޒިމް ވިދާޅުވިއެވެ. އަދި ވިދާޅުވީ އެމަސައްކަތަށް ފަހު މަޝްރޫއުގެ އަމަލީ މަސައްކަތްތައް ފެށިގެންދާނެ ކަމަށެވެ.
މީގެ އިތުރުން އާޒިމް ވިދާޅުވީ މިމަޝްރޫއު ނިންމަން ކަނޑައަޅާފައިވާ ތާރީޚުގައި ނިންމައި، ހަވާލުކުރާނެ ކަމަށެވެ.
ޑިޒައިން އެންޑް ބިލްޑް އުސޫލުން ހަވާލުކުރެވުނު މި މަޝްރޫއުގެ ދަށުން އަލިފުށީގެ 50.5 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މި ބިމުގެ ތެރެއިން 10 ހެކްޓަރުގެ ބިމަކީ ރަށުގެ ތަރައްގީއާއި ގެދޮރުވެރިކަމުގެ ބޭނުމަށް ޚާއްސަކުރެވިގެން ހިއްކޭ ބިމެކެވެ. އަދި ބާކީ 40.5 ހެކްޓަރު ބިމަކީ އެއަރޕޯޓް ތަރައްގީކުރުމަށް ހިއްކޭ ބިމެކެވެ. މި މަޝްރޫއުގެ ދަށުން، 1200 މީޓަރުގެ ރަންވޭއެއް އެޅުމާއި، ޓެކްސީވޭ، އޭޕްރަން އަދި ސަރވިސް ރޯޑު ހެދުމުގެ މަސައްކަތް ވަނީ މިކުންފުންޏާ ހަވާލުކޮށްފައެވެ. އަދި ހިއްކާ ބިމުގެ ގޮނޑުދޮށް ހިމާޔަތްކުރުމުގެ ގޮތުން 2871 މީޓަރުގެ ރިވެޓްމަންޓަކާއި، 480 މީޓަރުގެ ގްރޮއިންއެއް ވެސް ގާއިމު ކުރެވިގެންދާނެއެވެ.
މިއީ 451.61 މިލިއަން ރުފިޔާ ގެ މަޝްރޫއެކެވެ. މި މަޝްރޫއުގެ ނިންމުމަށް ހަމަޖެހިފައިވަނީ 750 ދުވަހުގެ ތެރޭގައެވެ.
މި މަޝްރޫއަކީ އަގުގެ ގޮތުންނާއި، މަޝްރޫއުގެ ދަށުން ކުރަންޖެހޭ މަސައްކަތުގެ ގޮތުން އެމްޓީސީސީގެ 40 އަހަރުގެ ދިގު ތާރީޚުގައި ސަރުކާރުން އެ ކުންފުންޏާ ހަވާލުކުރި އެންމެ ބޮޑު މަޝްރޫއެވެ.
