ހުޅުމާލެ ފިޔަވަތީގައި އަލިފާނުގެ ހާދިސާއެއް

ހުޅުމާލެ ފިޔަވަތީގައި އަލިފާނުގެ ހާދިސާއެއް ހިނގައިފިއެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނީ މި ހާދިސާ ހިނގި ކަމުގެ މައުލޫމާތު އެމްއެންޑީއެފަށް ލިބުމުން އެ ސަރަހައްދަށް ދިޔައިރު އަލިފާންގަނޑު ނިއްވަލާފައިވާ ކަމަށެވެ.

މި ހާދިސާގެ ރިޕޯޓު އެމްއެންޑީއެފަށް ލިބިފައިވަނީ ހުކުރު ދުވަހުގެ ރޭ 18:55 އެހާއިރު ކަމަށް އެމްއެންޑީއެފުން ބުނެފައިވެއެވެ.

މިއީ ކިހިނެއް ހިނގި ހާދިސާއެއް ކަމެއް މިހާތަނަށް ދެނެގަނެވިފައިނުވާކަމަށް އެމްއެންޑީއެފުން ބުނެފައިވެއެވެ.

މިފަހަކުން ހުޅުމާލެ ފިޔަވަތީގައި ތިބޭ ކުދިން ރަނގަޅަށް ނުބެލެހެއްޓެވޭ ކަމުގެ ގިނަ މައްސަލަތަކެއް އަންނަނީ ފެންމަތިވަމުންނެވެ. އެގޮތުން ބުރާސްފަތި ދުވަހާއި، ހުކުރު ދުވަހުވެސް އެތަނުގައި ބަލަހައްޓާ ކުދިންތަކެއް އެތަނުގެ ފުރާޅުމައްޗަށް އަރައިގެން އުޅޭ މަންޒަރު ފެންނަ ވީޑިއޯތައް ސޯޝަލް މީޑިއާގައި ވަނީ އާންމުވެފައެވެ. އަދި ފިޔަވަތީގެ ކުޑަދޮރުތަކަށް އެކުދިން ގެއްލުންދޭ މަންޒަރު ފެންނަ ވީޑިއޯތަކެއްވެސް ވަނީ އާންމުވެފައެވެ.