އިސްލާމާއި ޤުރުއާން ފޮތުގައި ކުށެއްވާނަމަ އެކަން އެންގުމަށް އެދިއްޖެ
ލިޔުމުން މިނސިްޓްރީއަށް އެންގުމަށް ވަނީ އެދިފައި
ޑރ.އައިޝަތު އަލީ - އެޑިއުކޭޝަން މިނިސްޓަރ
އިސްލާމާއި ޤުރްއާން ފޮތްތަކުގައި ކުށެއްހުރިކަން ފާހަގަވާނަމަ، އެކަން ހިއްސާކޮށްދިނުމަށް އެޑިއުކޭޝަން މިނިސްޓްރީން އެދިއްޖެއެވެ.
އެޑިއުކޭޝަން މިނިސްޓްރީން ބުނެފައިވަނީ ސްކޫލްތަކުގައި ކިޔަވައިދިނުމަށް މިހާރު ބޭނުންކުރަމުން އަންނަ އިސްލާމް އަދި ޤުރްއާން ފޮތްތައް އިސްލާޙުކުރުމުގެ މަސައްކަތް ކުރިއަށްދާތީ، މި ފޮތްތަކުގައި އިސްލާހުކުރަންޖެހޭކަމަށް ފެންނަ އެއްވެސް ކުށެއް ފާހަގަކުރެވިފައިވާނަމަ، އެފަދަ ކުށެއް ހިމެނޭ ފޮތާއި ޞަފްޙާ އެނގޭނެހެން އެ މިނިސްޓްރީއަށް އަންގައި ދިނުމަށެވެ.މިނިސްޓްރީން ބުނީ އެފަދަ ކުށެއް ފާހަގަ ވެއްޖެނަމަ curriculum@nie.edu.mv އީމެއިލްކުރެއްވުމަށް އެދޭ ކަަމަށެވެ.
ބައެއް ގްރޭޑްތަކުގެ ޤުރުއާނާއި އިސްލާމް ފޮތްތަކުގައި ހުރި މައްސަލަތައް ދެނެގަތުމަށްޓަކާ ހުރިހާ ގްރޭޑެއްގެ އިސްލާމް އަދި ޤުރްއާން ފޮތްތައް ޕްރޫފް ރީޑްކުރުމުގެ މަސައްކަތް މިނިސްޓްރީން ވަނީ ފަށާފައެެވެ.
ފޮތްތަކުގައި ހުރި ކުށްތައް ފާހަގަކޮށް އާންމުންގެ ސަމާލުކަމަށް ގިނަ ބަޔަކު ގެނައުމާ ގުޅިގެން މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި އެޑިއުކޭޝަންމިނިސްޓަރު ވިދާޅުވީ ގްރޭޑް 10 އަދި 12ގެ ދަރިވަރުންގެ ފޮތްތައް ބޭނުންކުރަމުން އަންނަނީ 2018 ވަނަ އަހަރުން ފެށިގެން ކަމަށެވެ. އެކެއް އަދި ދޭއްގެ ފޮތްތަކަކީ 2015 ވަނަ އަހަރުން ފެށިގެން ބޭނުންކުރަމުން އަންނަ ފޮތްތަކެއް ކަމަށެވެ. އެ ފޮތްތަކުގައި ކުށް ހުރިކަން ސަމާލުކަމަށް އައި ހިސާބުން އެ މައްސަލަ ބަލަމުން އަންނަކަމަށް މިނިސްޓަރ ވަނީ ވިދާޅުވެފައެވެ.
ޕްރޫފް ރީޑް ކުރުމުގައި އިހުމާލުވެފައިވާ މީހުން ދެނެގަތުމަށް ކޮމިޓީއެއް އެކުލަވާލާފައިވާއިރު ނޫސްވެރިންގެ ބައްދަލުވުމުގައި އެޑިއުކޭޝަން މިނިސްޓަރ ޑރ. އާއިޝަތު އަލީ ވިދާޅުވީ މިއީ ކުޑަ މައްސަލައެއް ނޫން ކަމަށާއި މިކަން ވީ އެންމެ އަވަހަކަށް ތަހުގީގުކޮށް ނިންމާނެ ކަމަށެވެ. އަދި މިހާރު ހުރިހާ ގްރޭޑެއްގެ އިސްލާމް އަދި ގުރުއާން ފޮތްތަކުގައި ކުށް ހުރިތޯ ބެލުމުގެ މަސައްކަތް މިނިސްޓްރީން އެހެން ބަޔަކާ ގުޅިގެން ކުރަމުންދާ ކަމަށް މިނިސްޓަރ ވިދާޅުވިއެވެ.
މިއީ ވަރަށް ދެރަ މައްސަލައެއްކަން ފާހަގަކުރައްވާ މިނިސްޓަރ ވިދާޅުވީ 2015 ވަނަ އަހަރު ވެސް ގުރުއާން ފޮތުގައި ކުށެއް ވާކަން ފާހަގަކުރެވިފައިވާ ކަމަށެވެ. އަދި ބައެއް ޓީޗަރުންނާއި އެކަމާއި ގުޅޭގޮތުން ސުވާލުކުރުމުން އޭރުއްސުރެ ކުދިންނަށް ކިޔަވައިދެމުން ދިޔައީ އެ ކުށް އިސްލާހުކޮށްގެން ކަމަށް ޓީޗަރުން ބުނާ ކަމަށް މިނިސްޓަރ ވިދާޅުވިއެވެ. އެހެންކަމުން ކުދިންނަށް ފިލާވަޅުތައް ނަގައިދިނުމުގައި މައްސަލަ ދިމާވެފައިނުވާނެ ކަމުގެ ޔަގީންކަން މިނިސްޓަރ ވަނީ ދެއްވާފައެވެ.
ސޫރަތްތައް ނަގަނީ ބޭރުގެ އެޕްލިކޭޝަނަކުން ކަމަށް މިނިސްޓްރީން ބުނެފައިވާއިރު އެކަންތައްތައް ވެސް ހަރުދަނާކޮށް ދެވަނަ ފަހަރަށް މިފަދަކަމެއް ތަކުރާރުވިޔަ ނުދިނުމުގެ އިންތިމާޒުތައް މިނިސްޓްރީން ހަމަޖައްސަމުން ގެންދާ ކަމަށް ޑރ. އާއިޝަތު އަލީ ވިދާޅުވިއެވެ.
އެޑިއުކޭޝަން މިނިސްޓްރީން ބުނީ ފޮތްތައް ޗާޕުކުރުމުގެ ކުރިން އެންއައިއީ އަދި މިނިސްޓްރީ އޮފް އިސްލާމިކް އެފެއާރޒުން ބަލައި ޗެކްކޮށްފައިވާ ކަމަށެވެ. އެހެންނަމަވެސް ހުރިހާ ފަރާތަކުން މިކަމުގައި އިހުމާލުވެފައިވާއިރު މިހާރު ކުށް ހުރި ފޮތްތަކުގައި ރަނގަޅު ސޫރަތް ޕްރިންޓް ކުރުމަށްފަހު ފޮތްތަކުގައި ތަތްކޮށްދިނުމަށް ސްކޫލްތަކަށް އަންގާފައިވާނެ ކަމަށް މިނިސްޓަރ ވިދާޅުވިއެވެ.
ނޫސްވެރިންގެ ބައްދަލުވުމުގައި އިތުރަށް ވާހަކަފުޅު ދައްކަވަމުން މިނިސްޓަރ ވިދާޅުވެފައިވަނީ މިކަން ދިމާވީ ގޮތުގެ ތަހުގީގު މިހާރު ފަށާފައިވާއިރު އިތުރު ފޮތްތަކުން ކުށް ފެނިއްޖެނަމަ މިނިސްޓްރީން އެކަން އިސްލާހު ކުރަމުން ގެންދާނެ ކަމަށެވެ.
