އައްޑޫގެ ޓުއަރިޒަމް ޒޯންތަކުން ބިން ލިބުނު މީހުންނަށް ބިން ހަވާލުކުރުމުގެ މަސައްކަތް ފަށައިފި
ބިން ލިބުނު 8 މީހަކާ ބިން ހަވާލުކުރުމުގެ އެއްބަސްވުމުގައި ސޮއިކޮށްފައިވޭ
ބިން ހަވާލުކުރުމުގެ އެއްބަސްވުމުގައި ސޮއި ކުރުން
އައްޑޫ ސިޓީ ކައުންސިލުން އައްޑޫގެ ޓުއަރިޒަމް ޒޯންތަކުން ބިން ލިބުނު މީހުންނަށް ބިން ހަވާލުކުރުމުގެ މަސައްކަތް ފަށައިފިއެވެ.
އައްޑޫ ސިޓީ ކައުންސިލުން ބުނީ ބުރާސްފަތި ދުވަހު އައްޑޫގެ ޓުއަރިޒަމް ޒޯންތަކުން ބިން ލިބުނު ފަރާތްތަކާއި ބިން ހަވާލުކުރުމުގެ މަސައްކަތް ފަށާފައިވާ ކަމަށާއި، ސިޓީ ކައުންސިލުން އައްޑޫ ޓުއަރިޒަމް ޒޯނުން ބިން ލިބުނު 8 މީހަކާ ބިން ހަވާލުކުރުމުގެ އެއްބަސްވުމުގައި ސޮއިކޮށްފައިވާ ކަމަށެވެ.
އެގޮތުން އައްޑޫ ސިޓީ ހިތަދޫ ޓުއަރިޒަމް ޒޯނުން 7 ބިން އަދި ހުޅުދޫ ޒޯނުން 1 ބިން ވަނީ ހަވާލުކުރެވިފައެވެ. މި ބިންތަކުގެ ތެރޭގައި 3000 އަކަފޫޓުގެ 5 ބިން، 5000 އަކަފޫޓުގެ 1 ބިން އަދި 2400 އަކަފޫޓުގެ 2 ބިން ހިމެނެެއެވެ. އަދި އައްޑޫ ޓުއަރިޒަމް ޒޯންތަކުން ބިން ލިބުނު މީހުންނަށް ބިން ހަވާލުކުރުމުގެ މަސައްކަތް ބާރު ސްޕީޑެއްގައި ކުރިޔަށް ގެންދާނެ ކަމަށް ކައުންސިލުން ބުނެއެވެ.
މި ބިންތައް ކުއްޔަށް ދޫކުރުމަށް ހަމަޖެހިފައިވަނީ 20 އަހަރު ދުވަހުގެ މުއްދަތަށް ކަމަށެވެ. ފަތުރުވެރިކަން ކުރިއެރުމަށް ގިނަ މަސައްކަތްތައް ކުރަމުންދާއިރު، އެސިޓީގައި ފުޅާ ދާއިރާގައި ގެސްޓްހައުސް ވިޔަފާރި ވެސް ހިންގަމުން ގެންދެއެވެ.
އައްޑޫ ސިޓީއަކީ ގުދުރަތީ އެތައް ރީތި ކަމެއް ލިބިފައިވާ ސިޓީއެކެވެ. އަދި ފަތުރުވެރިންގެ މެދުގައި އެސިޓީގެ ބައެއް ސަރަހައްދުތައް ވަރަށް މަގުބޫލެއެވެ. އެގޮތުން އައްޑޫ ސިޓީގެ ނޭޗަރ ޕާކަކީ ފާހަގަކޮށްލެވޭ ތަނެކެވެ.
