ގާނޫނާ ޚިލާފަށް ހެކި ހޯދާކަމަށް ފާހަގަކުރެވޭ 10 ފުލުހެއްގެ މައްސަލަ ސަމާލުކަމަށް ގެނެސްފި

ޖިނާއީ އިޖުރާއަތުގެ ގާނޫނާ ޚިލާފަށް ހެކި ހޯދާކަމަށް ފާހަގަކުރެވޭ 10 ފުލުހެއްގެ މައްސަލަ ފުލުހުންގެ އިދާރާގެ ސަމާލުކަމަށް ގެނެސްފައިވާ ކަމަށް ޕްރޮސެކިއުޓަރ ޖެނެރަލް (ޕީޖީ) ޙުސައިން ޝަމީމް ވިދާޅުވެއްޖެއެވެ.

ޖިނާއީ ބޮޑެތި މައްސަލަތަކުގެ ތަހުގީގު މަރުހަލާގައި ގާނޫނާ ޚިލާފަށް ހެކި ހޯދުމާ ގުޅިގެން ބޮޑެތި ކުށްވެރިންގެ މައްޗަށް ދައުވާ ނުކުރެވި ކޯޓު ތަކުން ދޫކޮށްލާ މައްސަލަތައް ފެންމަތިވަމުންދެއެވެ. އެކަމާގުޅިގެން ކަންބޮޑުވުންފާޅުކޮށް ރައްޔިތުން މަޖިލީހުގެ ޖުޑިޝަރީ ކޮމިޓީގައި މަތިވެރި ދާއިރާގެ މެމްބަރު ޙަސަން ޒަރީރު ގިނަ ސުވާލުތަކެއް ކުރައްވާފައިވެއެވެ. އަދި މިކަމުގެ ސަބަބުން އެތައް ބައެއްގެ ހައްގުތައް ގެއްލެމުންދާކަން ފާހަގަކުރައްވާފައިވެއެވެ.

އޮގަސްޓް 30ވީ ހޯމަ ދުވަހު ކުރިއަށް ގެންދިޔަ މިކޮމެޓީގައި ވާހަކަދައްކަވަމުން ޝަމީމް ވިދާޅުވީ, ހެކި ހޯދުމުގައި އިޖުރާއަތްތަކާ ޚިލާފުވެ ހެދޭ ގޯސްތަކުގެ ސަބަބުން ނުރައްކާތެރި ކުށްވެރިން ދޫވަމުންދާ މައްސަލަ ވަރަށް ގާތުން ބަލަމުންދާ ކަމަށެވެ.

ޝަމީމް ވިދާޅުވީ ފާއިތުވި 6 މަސް ދުވަހުގެ ތެރޭގައި އިޖުރާއަތާ ހިލާފުވެފައިވާ 10 ފުލުހެއްގެ މައްސަލަ ފާހަގަކުރެވިފައިވާ ކަމަށެވެ. އަދި އެކަން ފުލުހުންނާ ހިއްސާކޮށް، އެމައްސަލަ ސަމާލުކަމަށް ގެނެސްފައިވާ ކަމަށެވެ.

މީގެ އިތުރުން ޝަމީމް ވިދާޅުވީ ކޯޓު މަރުހަލާގައި ވެސް އިޖުރާއީ މައްސަލަތަކާހުރެ, ދައުލަތާ ދެކޮޅަށް ނިމޭ މައްސަލަތައްވެސް ދިރާސާކޮށް, ރަނގަޅު ކުރަންޖެހޭ ކަންތައްތައް ބަލަމުންދާ ކަަމަށެވެ.