ސުމުއްވުލްއަމީރު އިބްރާހީމް ނާސިރު ރަންނަބަނޑޭރިކިލެގެފާނު ނިޝާން ޣާޒީގެ އިއްޒަތްތެރި ވެރިޔާ ދުނިޔޭގެ އަލިކަންދެކެވަޑައިގަތީ މީގެ 95 އަހަރު ކުރިން މިއަދުއެވެ. ސެޕްޓެމްބަރު ދޭއް 1926 ގައެވެ. އުމުރުފުޅުން 82 އަހަރުގައި އެމަނިކުފާނު އަވަހާރަވީ 22 ނޮވެމްބަރ 2008 ގައެވެ.

ސުމުއްވުލްއަމީރު އިބްރާހީމް ނާސިރު ރަންނަބަނޑޭރިކިލެގެފާނު ނިޝާން ޣާޒީގެ އިއްޒަތްތެރި ވެރިޔާއަކީ، ރާއްޖެ މިހާރު މިދެކޭ މިނިވަންކަމުގެ ބާނީއެވެ. އިނގިރޭސީންގެ ހިމާޔަތުގެ ދަށުން ދިވެހިރާއްޖެއަށް މިނިވަންކަން ހޯއްދަވައިދެއްވުމަށް އެމަނިކުފާނު ގެންގުޅުއްވި ތޫނު ވިސްނުންފުޅާއި ނުގުޑާފަދަ އަޒުމާއި ހަރުދަނާ ހިކުމަތުއަމަލީގެ ސިޔާސަތަކީ ދިވެހި ތާރީޚުގައިވެސް ލާމަސީލު މިސާލެކެވެ.

ރާއްޖޭގެ ދެކުނުގެ އަތޮޅުތައް ރާއްޖެއާ ވަކިވެ ނުރައްކާތެރި ހާލަތަކަށް ގައުމު ގޮސްފައިވަނިކޮށް ރާއްޖޭގެ ބޮޑުވަޒީރެއްގެ ގޮތުގައި ސަރުކާރު ހިންގެވުމުގެ ބުރަ މަސްއޫލިއްޔަތު ފިސާރި ސާބިތުކަމާއެކު އަދާކުރައްވައި ރާއްޖޭގެ ގައުމީ މިނިވަންކަން ދިފާއުކުރެއްވުމަށް އެހިނދަށް ރާއްޖެއަށް އެންމެ ބޭނުންތެރި ފިޔަވަޅުތައް އަޅުއްވައި، ކުރެއްވި ބުރަ މަސައްކަތްތަކުގެ ނަތީޖާއެއްގެގޮތުން ރާއްޖެއަށް ފުރިހަމަ ސިޔާސީ މިނިވަންކަމުގެ "މޭވާ" ލިބުނެވެ.

ރާއްޖެއަށް ފުރިހަމަ ސިޔާސީ މިނިވަންކަން ލިބުނީ 26 ޖުލައި 1965 ގައެވެ. ދިވެހި ދައުލަތުގެ ފަރާތުން މިނިވަންކަމުގެ އެއްބަސްވުމުގައި ސޮއިކުރެއްވީވެސް ޚުދު ބޮޑުވަޒީރު އިބްރާހީމް ނާސިރެވެ. މިނިވަންކަން ލިބުނުތާ މަހެއްވެސް ނުވަނީސް 21 ސެޕްޓެމްބަރ 1965 ގައި ރާއްޖެއިން އ.ދ. މަޖިލީހުގައި ބައިވެރިވެ 12 އޮކްޓޫބަރ 1965 ގައި އ.ދ. ގެ މައިމަރުކަޒުގައި ރާއްޖޭގެ ދިދަނެގި ބައިނަލްއަގުވާމީ މައިދާނުގައި ރާއްޖޭގެ ގައުމީ ދިދަ ވިހުރުވެންފެށިއެވެ.

މިނިވަންކަން ލިބުމާއެކު ދުނިޔޭގެ ގައުމުތަކާއެކު ސިޔާސީގުޅުން ގާއިމްކުރައްވަން ސަރުކާރުން ފެއްޓެވިއެވެ. ބޮޑުވަޒީރުކަމުގެ މަގާމުގައި 12 ޑިސެމްބަރ 1957ން 11 ނޮވެމްބަރ 1968ށް އަދާކުރެއްވި 11 އަހަރާއި، 11 ނޮވެމްބަރ 1968ން 11 ނޮވެމްބަރ 1978ށް ރާއްޖޭގެ ފުރަތަމަ ރައީސުލްޖުމްހޫރިއްޔާކަމުގެ މަގާމް އަދާކުރެއްވި 10 އަހަރު އެމަނިކުފާނު ވަނީ ގައުމަށް އެތައް ދާއިރާއަކުން އަދި އެތައް ރޮނގަކުން ގިނަގުނަ އަގުހުރި ޚިދުމަތްތަކެއް ކުރައްވާފައެވެ.