މައިންބަފައިންނަކީ މި ދުނިޔެމަތީގައި މީހަކަށް ލިބޭނެ އެންމެ ބޮޑު ރަހުމަތެވެ. މައިންބަފައިންނަށް އިންތިހާ ދަރަޖައިގެ ލޯބި ދީ އިހްތިރާމް ކުރަންޖެހެއެވެ. އެމީހުން މުސްކުޅިވެ ބަލި ތަންމަތީގައި އޮންނަ ދުވަހު އެކަނިވިޔަ ނުދީ ލޯބި ދޭންޖެހެއެވެ. މިއީ މިއަދުގެ މުޖުތަމައުގެ ތެރެއިން މަދުވަމުންދާ މަންޒަރެކެވެ. ގިނަވަމުންދަނީ މައިންބަފައިންގެ ކަންކަން ބެލުން ދުރުހިލޭ ބަޔަކާ ހަވާލުކުރާ މަންޒަރެވެ.
މިފަދަ ބަޔަކު އުޅުނު ނަމަވެސް، މައިންބަފައިން ތަންމަތީގައި ތިބެންޖެހޭ ދުވަހު އެމީހުންގެ އަމިއްލަ ދަރިން، އެމީހުންގެ އުފާތައް ގުރުބާންކޮށްފައި، މައިންބަފައިންގެ ޚިދުމަތުގައި ދުވަސްތައް ހޭދަކުރާތަންވެސް ފެނެއެވެ. ހޮސްޕިޓަލަކަށް ވަދެލިޔަސް އަދި ބޭރުތެރޭގައި އުޅޭއިރުވެސް ދަރިން އެމީހުންގެ މައިންބަފައިންގެ ޚިދުމަތުގައި ވަގުތު ހޭދަކުރާ މަންޒަރު ފެނެއެވެ.
މިގޮތަށް މިފަހުން ސޯޝަލް މީޑިއާގައި އާންމުވި ފޮޓޯއެއް ފާހަގަކޮށްލެވެއެވެ. މިއީ ހުޅުމާލޭ ޓްރީޓޮޕް ހޮސްޕިޓަލުގެ ބޭރުގައި ދަރިއަކު އޭނާގެ މަންމަ އުރާލައިގެން ހުރި މަންޒަރު ފެންނަ ފޮޓޯއެކެވެ. މިފޮޓޯ ސޯޝަލް މީޑިއާގައި ހިއްސާކޮށްފައިވާ މީހާ ބުނި ގޮތުގައި އޭނާ، އޭނާގެ މަން އުރާލައިގެން އެހުރީ ވީލްޗެއަރއެއް ގެންނަންދެނެވެ.
މިއާއެކު އެތައްހާސް ބަޔަކު ގެންދިޔައީ މިފޮޓޯ ސޯޝަލް މީޑިއާގައި ޝެއަރކޮށް، އެ ވާހަކަ ދައްކަމުންނެވެ. މައިންބަފައިން މުސްކުޅިވާ ދުވަހު ދަރިން ކަންތައްކުރާ ގޮތުން، އެ މައިންބަފައިން ދަރިންނަށް ދިން ތަރުބިއްޔަތު ވަރަށް ރަނގަޅަށް ދައްކުވައިދެއެވެ. އެހެންކަމުން އެމައިމީހާ އެދަރިއަށް ދީފައިވާ ތަރުބިއްޔަތުގެ ވާހަކަވެސް ގިނަ ބަޔަކު ގެންދިޔައީ ދައްކަމުންނެވެ.
އިސްލާމްދީނުގައި މައިންބަފައިންނަށް ދީފައި އޮންނަ ގަދަރު ވަރަށް މައްޗެވެ. ވަކިން ޚާއްސަކޮށް ބައްޕައަށްވުރެ އެތައް ގުނައެއް މަތީ ދަރަޖައެއް މަންމައަށް ދީފައި އޮވެއެވެ. އެންމެ ފުރަތަމަ މަންމައެވެ. ދެންވެސް މަންމައެވެ. ތިންވަނަ ފަހަރަށްވެސް މަންމައެވެ. ބައްޕަ އަންނަނީ އެއަށްފަހުގައެވެ. ސުވަރުގެ ވަނީ މަންމަގެ ފައިތިލަ ދަށުގައޭ ބުނާ ބުނުމުންވެސް އިސްލާމްދީނުގައި މަންމައަށް ދީފައި އޮންނަ ގަދަރުގެ މަތިވެރިކަން ވަރަށް ބޮޑަށް ހާމަވެގެން ދެއެވެ. މަންމައަށް ބަދުބަހެއް ބުނެ، އެ މަންމަގެ ހިތުގައި ޖައްސާ މީހުންނަށް ސުވަރުގެ ނުލިބޭނީ މަންމަގެ ގަދަރު ކިހާ މަތިވީމަ ހެއްޔެވެ؟
މައިންބަފައިންނާމެދު ހެޔޮކޮށް ހިތުމަކީ ބޮޑެތި ފާފަތަކަށް ވާ ކައްފާރާއެކެވެ. މިއިންވެސް ދޭހަވަނީ އިސްލާމްދީނުގައި މައިންބަފައިންނަށް ދީފައި އޮންނަ ދަރަޖައިގެ މަތިވެރިކަމެވެ. ނަމާދުގައި އޭނާގެ މަންމައާއި ބައްޕައަށް ދުއާކޮށްފި މީހާއަށް، އެމީހާގެ ވެރި އިލާހަށް އަދާކުރަންޖެހޭ އެންމެ ހެޔޮ އަޅުކަން އަދާކުރެވުނު ފަދައެވެ. މާތް ﷲ ހެއްދެވި އެންމެހާ ޚަލްގުންގެ ތެރޭގައިވާ، އެންމެ ބޮޑު ހައްގެއް އެމަޚުލޫގަކަށް އަދާކުރުން އޮތް ބަޔަކީވެސް ބައިންބަފައިންނެވެ. އެ މަންމައާއި ބައްޕައަށް ދުއާކުރާ މީހާ ވަނީ، މައިންބަފައިންނަށް ޝުކުރުވެރިވާ މީހެއް ކަމުގައެވެ.
މައިންބަފައިން މުސްކުޅިވާ ދުވަހު އެމީހުން ބެލުން ބޮޑުކަމަކަށްވެ، އެކަން ދުރުހިލޭ ބަޔަކާ ހަވާލުކުރުމަކީ ހުރިހާ މުޖުތަމައަކުންވެސް ފެންނަ ކަމެކެވެ. ދުވަސްވީ މީހުން ބަލަހައްޓާ ތަންތަނަށް މައިންބަފައިން ފޮނުވާލައެވެ. އެ ތަންތަނުން އެމަންމަ ނުވަތަ ބައްޕަޔާމެދު ކަންކުރަނީ ކިހިނަކުންތޯ ބެލުމެއް ނޯވެއެވެ. ބައެއް ފަހަރު އެފަދަ ތަންތަނުންވެސް އުމުރުން ދުވަސްވީ މީހުންނާމެދު އިހާނެތިކޮށް ހިތައެވެ. ތިމާގެ މަންމަޔާމެދު ދުރުހިލޭ މީހެއްގެ ހިތުގައި ކުލުނެއް އޮންނާނެހެއްޔެވެ؟ މިގޮތަށް ދުރުހިލޭ ބަޔަކާ ހަވާލުކުރާއިރު، އެމަންމަ ނުވަތަ ބައްޕަގެ ހިތުގައި ރިހޭނެ ރިހުމާމެދު އެންމެ ފަހަރަކުވެސް ވިސްނާ ނުލެވެނީބާވައެވެ.
ދަރިފުޅު އެންމެ ތުއްތުއިރު ކެތްތެރިކަމާއިއެކު ބަލައި ބޮޑުކުރި މައިންބަފައިން ބަލި ތަންމަތީގައި ތިބެންޖެހޭ ދުވަހު ޒިންމާ އުފުލަންޖެހޭ ބަޔަކީ ދަރިންނެވެ. މައިންބަފައިން މުސްކުޅިވާދުވަހު އެމީހުން ބަލަން އެހެން ބަޔަކާ ހަވާލުކޮށްގެން، ތިމާގެ އަމިއްލަ ދަރިންނަށް ތި ދައްކައިދެވެނީ ވަރަށްވެސް ގޯސް ނަމޫނާއެކެވެ. ތިމާ ބަލި އެނދުގައި އޮންނަ ދުވަހު އެ ދަރިން ތިމާއާމެދުވެސް އަމަލުކުރާނީ ހަމަ އެހެންނެވެ. އެހެންކަމުން މައިންބަފައިންނާމެދު އިހާނެތިކޮށް ކަންތައް ނުކޮށް، ލޯތްބާއި އަޅާލުން ދޭންޖެހެއެވެ. އިހާނެތިކޮށް ކަންތައް ކުރާނަމަ ތިމާއަށް ލިބެން އޮތް ކިތަންމެ ބޮޑު ނިއުމަތަކުން ވެސް ތިމާ މަހުރޫމް ވެދާނެއެވެ.
