ސިއްހީ ކުއްލި ނުރައްކަލުގެ ހާލަތު އަނެއްކާވެސް ދަމަހައްޓައިފި
މީގެ ކުރިންވެސް 17 ފަހަރަކު މި މުއްދަތު އިތުރުކުރި
މާލޭގެ މަގުމަތި
އާންމު ސިއްހަތުގެ ކުއްލި ނުރައްކަލުގެ ހާލަތު އިތުރު އެއް މަހަށް ދަމަހައްޓަން ނިންމައިފިއެވެ.
ހެލްތް މިނިސްޓަރ އަހުމަދު ނަސީމް ސޮއިކުރައްވައި ނެރުއްވި ގަރާރުގައި ވަނީ ކޮވިޑް-19 އިތުރަށް ފެތުރުމުގެ ނުރައްކާ އަދިވެސް އެބައޮތް ކަމަށާއި، އާންމު ރައްޔިތުންގެ ސިއްހަތާއި ރައްކާތެރިކަން ކަށަވަރުކުރުމަށްޓަކައި ޚާއްސަ ފިޔަވަޅުތަކެއް އަޅަންޖެހޭކަމަށް ޑިރެކްޓަރ ޖެނެރަލް އޮފް ޕަބްލިކް ހެލްތު ލަފާދެއްވާފައިވާ ކަމަށެވެ.
އެހެންކަމުން އެންމެ ފަހުން އިއުލާނުކުރި އާންމު ސިއްހަތުގެ ކުއްލި ނުރައްކަލުގެ ހާލަތުގެ މުއްދަތު ހަމަވެފައިވާތީ މި މުއްދަތު އިތުރު އެއް މަހަށް ދަމަހައްޓަން ނިންމެވީ ކަމަށެވެ. މި މުއްދަތު އަންނަ އޮކްޓޯބަރުގެ މަހުގެ 1ވަނަ ދުވަހާއި ހަމައަށް ވަނީ ދަންމާލާފައެވެ.
އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން، އާންމު ސިއްހަތުގެ ކުއްލި ނުރައްކަލުގެ ހާލަތު އެންމެ ފުރަތަމަ އިއުލާން ކޮށްފައިވަނީ މިދިޔަ އަހަރުގެ މާޗް މަހުގެ 12 ވަނަ ދުވަހުއެވެ. މިއީ މި މުއްދަތު އިތުރުކުރި 18 ވަނަ ފަހަރެވެ. މި ހާލަތުގައި ބަލި ކޮންޓްރޯލްކުރުމަށް އަޅަންޖެހޭ ފިޔަވަޅުތައް އެޅުމުގެ ބާރު ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިގެންވެއެވެ.
މާލެ ސަރަހައްދުގައި ކޮވިޑް-19 ކޮންމެވެސް ވަރަކަށް ކޮންޓްރޯލްކުރެވިފައިވީނަމަވެސް އަތޮޅުތެރެއިން ފެންނަ ކޭސްތައް ދަނީ ދުވަހަކަށްވުރެ ދުވަހެއް އިތުރުވަމުންނެވެ. އެންމެ ފަހުން އެޗްޕީއޭއިން އާންމުކޮށްފައިވާ މައުލޫމާތަށް ބަލާއިރު، މާލެ ސަރަހައްދުން ބައްޔަށް ޕޮޒިޓިވްވެފައިވަނީ 35 މީހެކެވެ. އަތޮޅުތެރެއިން 119 މީހަކު ވަނީ ބައްޔަށް ޕޮޒިޓިވްވެފައެވެ. 1،794 އެކްޓިވް ކޭހެއް އޮތް އިރު، އެޑްމިޓުކޮށްގެން 24 މީހަކަށް ގެންދަނީ ފަރުވާދެމުންނެވެ. މިހާތަނަށް އައި އިރު މި ބަލީގައި 226 މީހަކު ވަނީ ނިޔާވެފައެވެ.
