އިތުރު 334 މީހަކު ކޮވިޑް-19ގެ ވެކްސިން ފުރިހަމަކޮށްފި
އާދީއްތަ ދުވަހު ފުރަތަމަ ޑޯޒް ޖަހާފައިވަނީ 412 މީހުން
ކުޅުދުއްފުށީގައި ވެކްސިން ދިނުމުގެ ޕްރޮގްރާމުގެ ތެރެއިން
އިތުރު 334 މީހަކު ކޮވިޑް-19ގެ ވެކްސިން ފުރިހަމަކޮށްފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އާންމުކޮށްފައިވާ ތަފާސް ހިސާބުތައް ދައްކާގޮތުން، އާދީއްތަ ދުވަހު 334 މީހަކު ވަނީ ވެކްސިން ފުރިހަމަކޮށްފައެވެ. މީގެ ތެރޭގައި ހިމެނެނީ މާލެ ސަރަހައްދުން ވެކްސިން ޖެހި 165 މީހުންނާއި އަތޮޅު ތެރެއިން ވެކްސިން ޖެހި 247 މީހުންނެވެ. މިއާއެކު ރާއްޖޭގައި ވެކްސިން ފުރިހަމަ ކުރި މީހުންގެ އަދަދު ވަނީ 301،857ށް އަރާފައެވެ.
އާދީއްތަ ދުވަހު ފުރަތަމަ ޑޯޒް ޖަހާފައިވަނީ 412 މީހުންނެވެ. މީގެ ތެރޭގައި ހިމެނެނީ މާލެ ސަަހައްދުން ވެކްސިން ޖެހި 189 މީހުންނާއި، އަތޮޅު ތެރެއިން ވެކްސިން ޖެހި 145 މީހުންނެވެ. މިއާއެކު ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 383،089ށް އަރާފައެވެ.
ވެކްސިން ޖެހުމަށް ޝަރުތުހަމަވާ ފަރާތްތަކުން ވެކްސިން ފުރިހަމަކުރުމަށް ބާރު އެޅުމަށްޓަކައި 1 ސެޕްޓެމްބަރުން ފެށިގެން, ވެކްސިން ޖެހުމަށް ޝަރުުހަމަވެ ވެކްސިންގެ އެއްވެސް ޑޯޒްއެއް ފުރިހަމަކޮށްފައި ނުވާ މީހުންނަށް އެއްގަމާއި ކަނޑާއި ވައިގެ ދަތުރުފަތުރާގުޅޭ އާންމު ޚިދުމަތް ނުދިނުމަށް މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނުން ވަނީ އަންގާފައެވެ. ޓްރާންސްޕޯޓް މިނިސްޓްރީން ބުނީ އެއްގަމާއި ކަނޑުދަތުރު ކުރުމުގެ ޚިދުމަތް ފޯރުކޮށްދޭ ފަރާތްތަކުންނާއި، އަދި ޑޮމެސްޓިކް ވައިގެ ދަތުރުކުރުމުގެ ޚިދުމަތް ފޯރުކޮށްދޭ ފަރާތްތަކުން، ޚިދުމަތްދިނުމުގައި ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ގައިޑްލައިންގައި ޝަރުތުކޮށްފައިވާ ކަންކަން ކަށަވަރު ކުރުމަށްފަހު މެނުވީ ޚިދުމަތް ނުދިނުމަށް އަންގާ ކަމަށެވެ. އަދި ރައްޔިތުންނާ ގާތުން ދޭންޖެހޭ ޓެކްސީގެ ޚިދުމަތް ދޭފަރާތްތަކުން އެޗްޕީއޭގެ ގައިޑްލައިންގައި ޝަރުތުކޮށްފައިވާ ކަންކަން ކަށަވަރު ކުރުމަށްފަހު މެނުވީ ޚިދުމަތް ނުދިނުމަށް ވެސް އެދޭކަމަށެވެ.
މީގެ އިތުރުން ސިވިލް ސަރވިސްގައި މަސައްކަތް ކުރާ މުވައްޒަފުންނަށް, ސެޕްޓެމްބަރ މަހުން ފެށިގެން އޮފީހަށް ނުކުމެވޭނީ ޕީސީއާރް ނެގެޓިވް ނަތީޖާއެއް ހިފައިގެން ކަމަށް ސިވިލް ސަރވިސް ކޮމިޝަނުން ވެސް ވަނީ ބުނެފައެވެ. ސިވިލް ސަރވިސް ކޮމިޝަނުން ނެރުނު, "ވެކްސިންގެ ޑޯޒްތައް ފުރިހަމަ ނުކުރާ ސިވިލް ސަރވިސްގެ މުވައްޒަފުން ވަޒީފާއަށް ނުކުތުމުގައި އަމަލުކުރަންވީ ގޮތާ ބެހޭ ސަރކިއުލާ"ގައި ބުނެފައިވަނީ އާންމު ސިއްހަތު ރައްކާތެރިކުރުމުގެ ޤާނޫނުގެ 12ވަނަ މާއްދާގެ (ހ)ގެ 3ވަނަ ނަންބަރުގެ ދަށުން، ހެލްތް ޕްރޮޓެކްޝަން އޭޖެންސީގެ އިޢުލާނުގެ 5ވަނަ ނަންބަރުގެ ދަށުން، ކޮވިޑް-19އިން ރައްކާތެރިވުމަށް، ސިވިލް ސަރވިސްގެ މުވައްޒަފުގެ ތެރެއިން ވެކްސިން ޖެހުމުގެ ޝަރުތު ފުރިހަމަވާ މުވައްޒަފުން ވެކްސިން ޖެހުމަށާއި، އަދި ޝަރުތު ފުރިހަމަވާ މުވައްޒަފުންގެ ތެރެއިން ވެކްސިންގެ އެއްވެސް ޑޯޒެއް ފުރިހަމަކޮށްފައި ނުވާ މުވައްޒަފުން، ސެޕްޓެމްބަރ 1ން ފެށިގެން ވަޒީފާއަށް ނިކުންނަން ވާނީ ޕީސީއާރް ޓެސްޓު ހަދައިގެން ކަމަށެވެ. މިގޮތުން ކޮންމެ 14 ދުވަހަކުން ޕީސީއާރް ޓެސްޓު ހަދައިގެން ވަޒީފާއަށް ނުކުތުމަށް ޑިރެކްޓަރ ޖެނެރަލް އޮފް ޕަބްލިކް ހެލްތު އަންގަވާފައިވާ ކަމަށެވެ.
އެހެންކަމުން ސެޕްޓެމްބަރ 1ވަނަ ދުވަހުން ފެށިގެން, ސިވިލް ސަރވިސްގެ މުވައްޒަފުންގެ ތެރެއިން ވެކްސިން ޖެހުމަށް ޝަރުތު ފުރިހަމަވެ، ވެކްސިން ޖަހާފައި ނުވާ މުވައްޒަފުން، އެގޮތުގެ މަތިން އަމަލުކުރުމަށާއި، އަދި މުވައްޒަފުން އެ ގޮތުގެ މަތިން އަމަލުކުރާކަން ސިވިލް ސަރވިސްގެ އިދާރާތަކުން ކަށަވަރުކުރަމުން ގެންދިއުމަށް ވަނީ އަންގާފައެވެ.
