އިންޑިޔާގައި ހުކުރު ދުވަހު 10 މިލިއަނަށް ވުރެ ގިނަ މީހުންނަށް ކޮވިޑް ވެކްސިން ދީގެން ރިކޯޑެއް ހަދައިފިއެވެ.

އިންޑިޔާއަށް ކޮވިޑް-19ގެ އިތުރު ރާޅެއްގެ ބިރުވެރިކަން މިހާރު ކުރިމަތިވެފައިވާއިރު ވެކްސިން ދިނުމުގެ ކަންކަން އެގައުމުގެ ސަރުކާރުން އަންނަނީ ހަލުވިކުރަމުންނެވެ. އެއާއެކު ހުކުރު ދުވަހު ވަނީ 10 މިލިއަނަށްވުރެ ގިނަ މީހުންނަށް ވެކްސިން ދީގެން އެގައުމުގައި ރިކޯޑެއް ހަދާފައެވެ.

އިންޑިޔާގައި މިހާރު 628 މިލިއަން ޑޯޒް ވަނީ ދީފައެވެ. އެގައުމުގައި ވެކްސިން ޖަހަންޖެހޭ 944 މިލިއަން މީހުންގެ ތެރެއިން ދެ ބައި ކުޅަ އެއް ބައި މީހުންނަށް ވަނީ ވެކްސިންގެ ފުރަތަމަ ޑޯޒް ދީފައެވެ. އަދި 15 އިންސައްތަ މީހުންނަށް ވަނީ ދެވަނަ ޑޯޒް ދީފައެވެ. އިންޑިޔާ ސަރުކާރުން މަސައްކަތްކުރަމުން އަންނަނީ ޑިސެމްބަރ މަސް އަންނަންވާއިރަށް އެގައުމުގެ ބޮޑެތި ހުރިހާ މީހުންނަށް ވެކްސިން ދިނުމަށެވެ.

10 މިލިއަން މީހުންނަށް ވެކްސިން ދިންކަން ހާމަކުރައްވަމުން އިންޑިޔާގެ ބޮޑުވަޒީރު ނަރެންދްރަ މޯދީ ވަނީ ޓްވީޓެއް ކުރައްވާފައެވެ.

އެންމެފަހުން އެންމެ ގިނަ މީހުންނަށް ކޮވިޑް ވެކްސިން ދެވިފައިވަނީ އެއް ދުވަހާ 9.2 މިލިއަން މީހުންނަށެވެ.

އިންޑިޔާގައި ހަލުވިކަމާއެކު ކޮވިޑް ވެކްސިން ދެމުންދާއިރު ވެކްސިން އުފައްދާ މިންވަރުވެސް ވަނީ އިތުރުވެފައެވެ. އެގޮތުން އެގައުމުގެ ސެރަމް އިންސްޓިޓިއުޓުން ވަނީ މިމަސްތެރޭގައި 150 މިލިއަން ޑޯޒް އުފައްދާފައެވެ.

އިންޑިޔާގައި ހަލުވިކަމާއެކު ވެކްސިން ދިނުން ކުރިޔަށްދާއިރު ކޮވިޑް ޖެހޭ މީހުންގެ އަދަދުވެސް އަންނަނީ އަނެއްކާވެސް އިތުރުވަމުންނެވެ. އެގޮތުން ހުކުރު ދުވަހު ކޮވިޑް ޖެހުނު މީހުންގެ އަދަދު ހުރީ 40،000ށް ވުރެ މަތީގައެވެ.

މިމަހުގެ މެދުތެރޭގައި އިންޑިޔާގައި ކޮވިޑް ޖެހޭ މީހުންގެ އަދަދު ވަނީ 25،166ށް ވެސް ދަށްވެފައެވެ. ނަމަވެސް ފާއިތުވި ތިން ދުވަހުގެ ތެރޭގައި އެގައުމުގައި ކޮވިޑް ޖެހޭ މީހުންގެ އަދަދު ވަނީ އިތުރުވެފައެވެ. ކޮވިޑް ޖެހޭ މީހުންގެ އަދަދު އިތުރުވާން ފަށާފައިވަނީ ދެކުނުގެ ކެރެލާ ސްޓޭޓްގައި ގިނަ ބަޔަކު އެއްވެގެން ފެސްޓިވަލްތަކެއް ބޭއްވިފަހުންނެވެ.

އިންޑިޔާގައި ކޮވިޑް ޖެހުނު މީހުންގެ އަދަދު މިހާރު ހުރީ 32.6 މިލިއަންގައެވެ. އަދި މިބަލީގައި 436،861 މީހުން ވަނީ މަރުވެފައެވެ.

ފާއިތުވި ހަފުތާގައި އިންޑިޔާއިން ފެނިފައިވާ ކޮވިޑް ކޭސްތަކުގެ 60 އިންސައްތަ ހިއްސާކުރަނީ ކެރެލާ ސްޓޭޓުންނެވެ. އަދި އެކްޓިވް ކޭސްތަކުގެ ދެބައި ކުޅަ އެއް ބައި ހިއްސާކުރަނީ ވެސް ކެރެލާ ސްޓޭޓުންނެވެ.

ކެރެލާ ސްޓޭޓުން ބުނެފައިވަނީ ކޮވިޑްގެ ހާލަތު ގޯސްވާން ފެށުމުން އާދިއްތަ ދުވަހުން ފެށިގެން ލޮކްޑައުންކުރަން ނިންމާފައިވާކަމަށެވެ.