ކުލަބުގެ ހާލަތު މިހާރު ރަނގަޅަށް އެނގޭ ކަމަށާއި، އަންނަ ސީޒަނުގައި މިސްޓޭކްތައް ނުފެންނާނެ ކަމަށް މެންޗެސްޓާ ޔުނައިޓެޑްގެ ކޯޗް ހޯސޭ މޮރީނިއޯ ބުނެފިއެވެ.
ބޭރުގެ ކުޅިވަރު ހަބަރު ފަތުރާ މީޑިއާއަކަށް މޮރީނިއީއޯ ދިން އިންޓަވިއުއެއްގައި އޭނާ ބުނެފައިވަނީ، ޔުނައިޓެޑްގެ ކޯޗުކަމާ ހަވާލުވުމުގެ ކުރިން އެޓީމުގެ ހާލަތު ބަލައި ދިރާސާ ކުރިން ކަމަށާއި، ނަމަވެސް ކޮންމެ މީހަކަށް ވެސް ކުލަބެއްގެ އަސްލު ހާލަތު އެނގޭނީ އެކުލަބަކާ ހަވާލުވެ އެކުގައި މަސައްކަތްކުރަން ފެށުމުން ކަމަށެވެ. އެގޮތުން އޭނާ ބުނީ ކުޅުންތެރިންގެ ހަގީގަތް އެންގޭކަމަށް ހީކުރެވުނު ނަމަވެސް، ހަގީގަތުގައި ކޮންމެ ކުޅުނތެރިއެއްގެ ހަގީގަތް ވެސް އެނގޭނީ އެކުގައި މަސައްކަތް ކުރުމުން ކަމަށެވެ.
މޮރީނިައޯ ބުނީ، ފުރަތަމަ ސީޒަނުގައި ޓީމާ ބޭހޭ ގޮތުން ބައިވަރު ކަންކަން ފެނިގެން ހިނގައްޖެ ކަމަށާއި، އަންނަ ސީޒަނުގައި ހެދުނު ގޯސްތައް ތަކުރާރު ނުވާނެ ކަމަށެވެ.
ޔުނައިޓެޑްގެ މެނޭޖްމަންޓުގެ ފަރާތުން މޮރީނިއޯއަށް ފުރިހަމަ އެއްބާރުލުން ލިބޭ ކަމަށް ރިޕޯޓްތައް ބުނާއިރު، އަންނަ ޓްރާސްފާ ބާޒާރުގައި ވެސް ވަރުގަދަ ޓްރާސްފާތަކަކަށް އެޓީމުން އަންނަނީ ތައްޔާރުވަމުންނެވެ.
ވަރުގަދަ ސްކޮޑަކާ އެކު، ޗެމްޕިއަންސް ލީގުގެ ޖާގަ އަލުން ހޯދުމަށް، މިފަހަރުގެ ސީޒަނަށް ނިކުމެ މާ އެދެވޭ ނަތީޖާތަކެއް ނުނެރެވުމުގެ ސަބަބުން ގިނަ ފާރާތްތަކަކުން އަންނަނީ އެޓީމަށް ފާޑުކިއުންތައް އަމާޒުކުރަމުންނެވެ. އެގޮތުން އިނގިރޭސި ޕްރެމިއާ ލީގު ނިމެން ބާކީ އެޓީމަށް ދެ މެޗަށް ވެފައި ވާއިރު އެޓީމުން އޮތީ ތާވަލުގެ ހަވަނައިގައެވެ. އެހެންކަމުން ލީގުގެ ގަދަ ހަތަރެއްގައި ހިމެނިގެން ޗެމްޕިއަންސް ލީގުގެ ޖާގައެއް އެޓީމަށް ހޯދުން ވެގެންދާނީ ނާދިރު ކަމަކަށެވެ.
ނަމަވެސް ދެން އެޓީމުގެ އަމާޒަށް ވާސިލުވެވެން އޮތީ ޔޫރޮޕާ ލީގު ކާމިޔާބުކޮށްގެންނެވެ. އެގޮތުން ޔޫރޮޕާ ލީގުގެ ފައިނަލުގައި އަމިއްލަ ދަނޑުގައި އަންނަ އާދިއްތަ ދުވަހު އެޓީމުން ނިކުންނާނީ އަޔެކްސްއާ ދެކޮޅަށެވެ.
