ބުރާސްފަތި ދުވަހު ރާއްޖޭގައި ވެކްސިންގެ ދެ ވަނަ ޑޯޒް ޖަހާފައި ވަނީ 244 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން ބުރާސްފަތި ދުވަހު ވެކްސިން ޖަހާފައި ވަނީ ޖުމްލަ 1244 މީހުންނެވެ. އެއީ ވެކްސިންގެ ދެ ވަނަ ޑޯޒް ޖެހި 244 މީހުންގެ އިތުރުން ފުރަތަމަ ޑޯޒް ޖެހި 1000 މީހުންނެވެ.

ފުރަތަމަ ޑޯޒް ޖެހި 1000 މީހުންގެ ތެރެއިން މާލެ ސަރަހައްދުން ވެކްސިން ޖަހާފައި ވަނީ 174 މީހުންނެވެ. އަދި އަތޮޅުތެރެއިން ވެކްސިންގެ ފުރަތަމަ ޑޯޒް ޖަހާފައި ވަނީ 826 މީހުންނެވެ.

ބުރާސްފަތި ދުވަހު ވެކްސިންގެ ދެ ވަނަ ޑޯޒް ޖެހި 244 މީހުންގެ ތެރެއިން މާލެ ސަރަހައްދުން ވެކްސިން ޖަހާފައި ވަނީ 164 މީހުންނެވެ. އަދި އަތޮޅުތެރެއިން ވެކްސިން ޖަހާފައި ވަނީ 80 މީހުންނެވެ.

މިއާއެކު ރާއްޖޭގައި ވެކްސިންގެ ދެޑޯޒް ފުރިހަމަ ކުރި މީހުންގެ ޖުމްލަ އަދަދު ވަނީ 300،671ށް އަރާފައެވެ. އަދި 380،379 މީހުން ވަނީ ވެކްސިންގެ ފުރަތަމަ ޑޯޒް ޖަހާފައެވެ. ފުރަތަމަ ޑޯޒް ޖެހުމަށްފަހު ދެ ވަނަ ޑޯޒް ނުޖަހާ މިހާރު ތިބީ 79،708 މީހުންނެވެ.

އޮގަސްޓު މަހުގެ ނިޔަލަށް ރާއްޖޭގެ ވެކްސިންޖެހޭ އާބާދީގެ 90 އިންސައްތައަށް ވެކްސިންގެ ދެ ޑޯޒް ޖެހުމަށް ސަރުކާރުން އަމާޒުހިފާފައިވާއިރު، މިހާރު ދަނީ އުމުރުން 12 އަހަރާއި 17 އަހަރާ ދެމެދުގެ ކުދިންނަށް ވެސް ވެކްސިން ޖެހުމުގެ ކަންތައްތައް ކުރިއަށް ގެންދަމުންނެވެ. އެގޮތުން 10 ދުވަހުގެ ތެރޭގައި 30،109 ދަރިވަރުން ފައިޒަރ ވެކްސިންގެ ފުރަތަމަ ޑޯޒް ޖަހާފައިވާ ކަމަށް އެޑިއުކޭޝަން މިނިސްޓްރީން ބުނެއެވެ.

ވެކްސިން ލިބުނުހާ އަވަހަށް ސްކޫލް ދަރިވަރުންނަށް ވެކްސިން ދޭން ފަށާފައިވާއިރު، މިހާރު ވަނީ އިތުރު ކެޓަގަރީތަކަކަށް ވެކްސިން ދޭން ފަށާފައެވެ. އެއީ ދިފާއީ ނިޒާމު ދަށް މީހުންނާއި، މާބަނޑު މީހުންގެ އިތުރުން މިހާތަނަށް ކޮވިޑް-19ގެ އެއްވެސް ވެކްސިނެއް ނުޖަހާ ތިބި 60 އަހަރުން މަތީގެ މީހުންނެވެ.

ރާއްޖޭގައި ބޭނުންކުރުމުގެ އެމަޖެންސީ ހުއްދަ އެޗްޕީއޭ އިން ދީ، މިހާތަނަށް ޖަހާފައިވާ ވެކްސިންތަކަކީ ކޮވިޝީލްޑް ވެކްސިން، އެސްޓްރަޒެނެކާ ކޮވިޑް ވެކްސިން، ފައިޒަރ އަދި ބައޯއެންޓެކްގެ ކޮވިޑް-19 ވެކްސިންގެ އިތުރުން ޗައިނާގެ ސިނޮފަރމް ކުންފުނީގެ ކޮވިޑް ވެކްސިނެވެ.