އިންޑިޔާގައި ފާއިތުވި 24 ގަޑިއިރު ކޮވިޑް-19ށް ޕޮޒިޓިވްވި މީހުންގެ އަދަދު 46،164ށް އަރައިފިއެވެ.

އެގައުމުގައި ދާދިފަހުން ގިނަ ބަޔަކު އެއްވެގެން ކުރިޔަށް ގެންދިޔަ ފެސްޓިވަލްތަކުގެ ސަބަބުން ކޮވިޑްގެ ކޭސްތައް މައްޗަށް ހިނގައިދާނެކަމުގެ އިންޒާރު, ކަމާބެހޭ މާހިރުން ވަނީ ދީފައެވެ. އައު ސަރޖެއް އައިސްފައިމިވަނީ ދެކުނުގެ ސްޓޭޓެއް ކަމުގައިވާ ކެރެލާއިން ކަމަށް ރިޕޯޓްތައް ބުނެއެވެ.

އެންމެ ފަހުން އިންޑިޔާގައި ދުވާލެއްގެ މައްޗަށް 45،000 މީހުންނަށް ކޮވިޑް ޖެހިގެން ރިޕޯޓްކޮށްފައިވަނީ ޖުލައި މަހުގެ 7 ވަނަ ދުވަހުއެވެ. ބުދަ ދުވަހުގެ އަދަދަކީ އަންގާރަ ދުވަހު ކޮވިޑް ޖެހުނު 25،467 މީހުންނާ އަޅާބަލާއިރު 45 އިންސައްތައިގެ މަތިވުމެކެވެ.

ކެރެލާއިން އެކަނިވެސް 31،445 މީހުންނަށް ކޮވިޑް ޖެހިފައިވާއިރު އެއީ ބުދަ ދުވަހު ރިޕޯޓްކޮށްފައިވާ ކޭސްތަކުގެ 68 އިންސައްތައެވެ. ކޭސްތައް އިތުރުވެފައިވަނީ އެސަރަހައްދުގައި ކޮވިޑް-19ން ރައްކާތެރިވުމަށް އަޅާފައިވާ ފިޔަވަޅުތަކަށް ލުއިތައް ދީފައިވުމުގެ ސަބަބުންކަމަށް މީޑިޔާ ރިޕޯޓްތައް ބުނެއެވެ.

އިންޑިޔާގެ މައި ސަރުކާރުން ގަބޫލުކުރާ ގޮތުގައި ކެރެލާއިން ފެނިފައިވާ ކޭސްތަކުގެ ސަބަބުން ވައިރަސް އެހެން ސަރަހައްދުތަކަަށް ފެތުރުމުގެ ފުރުސަތު ވަނީ ބޮޑުވެފައެވެ. މިއާއެކު ކޮވިޑް-19ގެ ތިން ވަނަ ރާޅެއް އިންޑިޔާއަށް ކުރިމަތިވެދާނެކަމަށް މައި ސަރުކާރުން ދެކެއެވެ.

އަނެއްކޮޅުން އައު ވޭރިއަންޓާ ގުޅިގެންވެސް ކޭސްތައް ފެތުރޭ މިންވަރު އިތުރުވެދާނެކަމަށް ކަމާބެހޭ ފަރާތްތަކުން ލަފާކުރެއެވެ.

ނޭޝަނަލް އިންސްޓިޓިއުޓް އޮފް ޑިޒާސްޓަރ މެނޭޖްމަންޓުން އަންދާޒާކުރާ ގޮތުގައި އައު ސަރޖެއް އަންނާނެކަމަށް ބެލެވެނީ އޮކްޓޯބަރ މަހުގެ ކުރީކޮޅުއެވެ.

އިންޑިޔާއަކީ އެމެރިކާއަށްފަހު ކޮވިޑްގެ ކޭސްތައް އެންމެ ގިނައިން ފެންނަމުންދާ ގައުމެވެ. އެގައުމުގެ 32.5 މިލިއަން މީހުންނަށް ކޮވިޑް ޖެހިފައިވާއިރު މަރުވި މީހުންގެ އަދަދު 436،300ށް އަރައެވެ.

އަނެއްކޮޅުން އިންޑިޔާގައި ކުރިޔަށްދާ ވެކްސިނޭޝަން ޕްރޮގްރާމަށްވެސް ވަނީ މަޑުޖެހުންތައް ކުރިމަތިވެފައެވެ.

600 މިލިއަން ޑޯޒް މިއަހަރު ނިމެންވާއިރު ޖަހާ ނިމޭނެކަމަށް ބެލެވެއެވެ. އެއީ ވެކްސިން ޖަހަންޖެހޭ އާބާދީގެ 32 އިންސައްތައެވެ.