ރާއްޖެ ހިމެނޭ ގޮތަށް ދެކުނު އޭޝިއާގެ ގައުމުތަކަށް ހަމަލަދޭން ތާލިބާނުން ބޭނުންވާނެ: ރައީސް ނަޝީދު
19 އޯގަސްޓު 2021 | ބުރާސްފަތި 18:20އަފްޣާނިސްތާނުގެ ވެރިކަމަށް ތަލިބާނުން އައިސް އަތްގަދަ ކުރުމަކީ ވަރަށް ބޮޑު ކަންބޮޑުވުމެއް
ރައްޔިތުން މަޖިލީހުގެ ރައީސް މުހައްމަދު ނަޝީދު،
ރާއްޖެ ހިމެނޭ ގޮތަށް ދެކުނު އޭޝިއާގެ ގައުމުތަކަށް ތާލިބާނުން ހަމަލާ ދޭން ބޭނުންވާނެ ކަމަށާއި، އެފުރުސަތު އެޖަމާއަތަށް މިހާރު ލިބިފައިވާ ކަމަށް ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އިންޑިއާގެ "ޓައިމްސް ނައު" އަށް ދެއްވި ޚާއްސަ އިންޓަވިއުއެއްގައި ރައީސް ނަޝީދު ވިދާޅުވީ އަފްޣާނިސްތާނުގެ ވެރިކަމަށް ތާލިބާނުން އައިސް އަތްގަދަ ކުރުމަކީ ވަރަށް ބޮޑު ކަންބޮޑުވުމެއް ކަމަށާއި، އެކަމުގެ ބިރު މިހާރު ދެކުނު އޭޝިޔާގެ ގައުމުތަކަށް ފޯރާފައިވާ ކަމަށެވެ. އަދި މިސަރަހައްދުގައި ހަރުކަށި ފިކުރުގެ ޖަމާއަތްތައް ވަރުގަދަކޮށް އެފިކުރު ފެތުރުމުގެ ފުރުސަތު ބޮޑުވާނެކަމަށް ރައީސް ނަޝީދު ވިދާޅުވިއެވެ.
ތާލިބާނުން ދެކުނު އޭޝިއާގެ ގައުމުތަކަށް ހަމަލާ ދިނުމަށް ފަސްނުޖެހޭނެކަން ފާހަގަކުރައްވައި ނަޝީދު ވިދާޅުވީ ތާލިބާނުން ރާއްޖެ، އިންޑިއާ، ސްރީލަންކާ، ބަންގްލަދޭޝް، އަދި ޕާކިސްތާނަށް ހަމަލާ ދޭން ބޭނުންވާނެ ކަމަށެވެ. މިހާރު މިކަންކަން ކުރުމަށް އެތައް ގުނައަކުން ފަސޭހަވާނެ ކަމަށްވެސް ވިދާޅުވިއެވެ.
މީގެ އިތުރުން ރައީސް ނަޝީދު ވިދާޅުވީ އިންޑިއާއިން އަފްޣާނިސްތާނުގެ މައްސަލައިގައި އިތުރަށް މަސައްކަތް ކުރަންޖެހޭ ކަމަށާއި، އަސްކަރިއްޔާ ފޮނުވައިގެން ނޫނަސް މައްސަލަތައް ހައްލުކުރުމަށް މަސައްކަތްކުރެވޭނެ ކަމަށެވެ.
ރާއްޖެ ހިމެނޭ ގޮތަށް ދެކުނު އޭޝިއާގެ ގައުމުތަކަށް ތާލިބާނުން ހަމަލާ ދޭން ބޭނުންވާނެ ރައީސް ނަޝީދު ވިދާޅުވެފައިވާއިރު، އަފްޣާނިސްތާނުގައި ހިނގަމުންދާ ހަމަނުޖެހުންތަކުގެ ސަބަބުން ރާއްޖެއަށް ނުރައްކަލެއް ކުރިމަތިވެގެން ހިނގައިދާނެތޯ ބެލުމަށް ރައްޔިތުންގެ މަޖިލީހުގެ ނާއިބުރައީސް އީވާ އަބްދުﷲ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) ގައި އެދިވަޑައިގެންފައިވެއެވެ.
އީވާ ވަނީ 241 ކޮމިޓީގެ މުގައްރިރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމަށް ހޯމަ ދުވަހު ސިޓީއެއް ފޮނުއްވާފައެވެ. މި ސިޓީގައި ވަނީ އަފްޣާނިސްތާނު މިހާރުގެ ހާލަތުގެ ސަބަބުން ރާއްޖެއަށް އެއްވެސް ނުރައްކަލެއް އޮތްތޯ ބަލައި، ކަމާގުޅޭ އިދާރާތަކުން ހަދާފައިވާ ރިސްކު އެސެސްމަންޓް ދެނެގަތުމަށް އެފަދަ ރިސްކް އެސެސްމަންޓެއް ހެދުމަށް ހުށަހަޅުއްވާ ކަމަށެވެ.
މީގެ އިތުރުން އީވާ ވަނީ އަފްޣާނިސްތާނުގައި އެހީއަށް ބޭނުންޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދިނުމަށްޓަކައި ދިވެހިރާއްޖެއިން ކުރެވިދާނެ ކަންކަން ދެނެގަތުމަށް ވެސް ހުށަހަޅުއްވާ ކަމަށް ވިދާޅުވެފައެވެ.
