ރަންޔޫބީލްގެ ތީމް ލަވައިގެ ޕްރޮޑަކްޝަނަށް 50،000 ރުފިޔާ
ޝަރުތު ހަމަވާނީ އުމުރުން 18 އަހަރުން މަތީގެ ފަރާތްތައް
ރާއްޖޭގެ ފަތުރުވެރިކަމުގެ ރަންޔޫބީލް ލޯގޯ
ރާއްޖޭގެ ފަތުރުވެރިކަމުގެ ރަންޔޫބީލް ފާހަގަކުރުމަށް ކުރަމުންދާ މަސައްކަތްތަކުގެ ދަށުން ރަންޔޫބީލްގެ ތީމް ލަވައިގެ ޕްރޮޑަކްޝަނަށް 50،000 ރުފިޔާ ދިނުމަށް މިނިސްޓްރީ އޮފް ޓޫރިޒަމްއިން ނިންމައިފިއެވެ.
އަންނަ އަހަރު ރާއްޖޭގެ ފަތުރުވެރިކަމަށް 50 އަހަރު ފުރިގެންދާއިރު، އެ އަހަރުގެ ތީމް ލަވައިގެ ޕްރޮޑަކްޝަނަށް ޓޫރިޒަމް މިނިސްޓްރީން ވަނީ މިއުޒިޝަންސް ޔޫނިއަން އޮފް މޯލްޑިވްސްއާ އެކު ޕާޓްނާޝިޕެއް ހަދާފައެވެ. މި ޕާޓްނާޝިޕްގެ ދަށުން ތީމް ލަވަ ހެދުމަށް ޝައުގުވެރިވާ ފަރާތްތަކަށް އެކަމަށް ކުރިމަތިލުމުގެ ފުރުސަތު މިއުޒިޝަންސް ޔޫނިއަން އިން މިހާރު ވަނީ ހުޅުވާލާފައެވެ.
މިއުޒިޝަންސް ޔޫނިއަނުން ވަނީ ލަވަ އުފެއްދުމަށް ޝައުގުވެރިވާ ފަރާތްތަކުގެ ތެރެއިން މިކަމަށް ޝަރުތު ހަމަވާނީ އުމުރުން 18 އަހަރުން މަތީގެ ފަރާތްތައް ކަމަށް ފާހަގަކޮށްފައެވެ. އަދި އެކަކަށް ވުރެ ގިނަ މީހުންނަށް ގުޅިގެން މިކަމަށް ކުރިމަތިލެވޭނެ ކަމަށް ޔޫނިއަނުން ބުނެއެވެ. މި ލަވަ ޕްރޮޑިއުސްކުރުމަށް ހުށަހަޅާއިރު، ތަފާތު ބަހުރުވަތައް ބޭނުންކޮށްގެން އުފެއްދޭ ލަވަތަކަށް ހާއްސަ ސަމާލުކަމެއް ދޭނެ ކަމަށާއި މަދުވެގެން 3 ބަސް ހިމެނޭ ލަވަތަކަށް ފުރުސަތު ބޮޑުވާނެ ކަމަށް ޔޫނިއަނުން ބުނެއެވެ. ލަވައިގައި ދިވެހި ބަހުގެ އިތުރުން ރަޝިއާ ބަސް، އަރަބި ބަސް، ސްޕެނިޝް ބަސް އާއި ޖަރުމަނު ބަސް ފަދަ ބަސްތައް ހިމެނޭ ނަމަ ފުރުސަތު ބޮޑުވާނެ ކަމަށް ވަނީ ބުނެފައެވެ.
އޭގެ އިތުރުން ހުށަހެޅޭ ލަވައަކީ މިހާތަނަށް ޕަބްލިޝްކޮށް ނުވަތަ ރިލީސްކޮށްފައިވާ ލަވަޔަކަށް ވެގެން ނުވާނެއެވެ. އަދި އެލަވަޔަކީ ހުށަހަޅާ ފަރާތުގެ ފުރިހަމަ ހައްގެއްކަން ކަށަވަރުވާން ވާނެއެވެ.
ހުށަހެޅޭ ލަވަތަކަކީ ރާއްޖެ އާއި ރާއްޖޭގެ ފަތުރުވެރިކަން ރަނގަޅަށް ތަމްސީލުކުރެވޭ ލަވަތަކަކަށް ވާންވާނެއެވެ. އަދި އެ ލަވައަކީ ޕްރޮމޯޝަނަށް ބޭނުން ކުރެވޭނެ ލަވަޔަކަށް ވާން ޖެހޭނެ ކަމަށާއި މީހުން ގަޔާވާނެ މިއުޒިކަކަށް ވާންވާނެ ކަމަށް މިއުޒިޝަންސް ޔޫނިއަނުން ބުނެއެވެ.
ރަންޔޫބީލްގެ ތީމް ލަވަ އުފެއްދުމާ ގުޅޭ މައުލޫމާތުތައް މިއުޒިޝަންސް ޔޫނިއަނުން މިހާރު ވަނީ ވަރަށް ތަފުސީލުކޮށްއާންމުކޮށްފައެވެ.
ރަންޔޫބީލަށް ތައްޔާރުކުރެވޭ މި ލަވަ ޓޫރިޒަމް މިނިސްޓްރީ އަދި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން މުޅި އަހަރުގެ ޕްރޮމޯޝަންތަކުގައި ބޭނުން ކުރާނެއެވެ. އެގޮތުން ލޯކަލް އަދި އިންޓަނޭޝަނަލް ޕްލެޓްފޯމުތަކުގައި ރާއްޖެ އިޝްތިހާރު ކުރުމަށް މި ލަވަ ބޭނުންކުރެވޭނެއެވެ.
