ރައީސް ތ. އަތޮޅަށް ވަޑައިގަންނަވަނީ
މި ދަތުރުފުޅުގައި ތ. އަތޮޅުގެ 7 ރަށަކަށް ވަޑައިގެންނެވުމަށް ވަނީ ނިންމަވާފައި
ރައީސުލްޖުމްހޫރިއްޔާ ތިލަދުންމައްޗަށް ކުރެއްވި ދަތުރުފުޅުގެ ތެރެއިން
ރައީސް އިބްރާހިމް މުހައްމަދު ޞާލިޙް ތ. އަތޮޅަށް ރަސްމީ ދަތުރުފުޅެއް ކުރައްވާގޮތަށް ހަމަޖެހިއްޖެއެވެ.
ރައީސް ތ. އަތޮޅަށް ކުރައްވާ މި ދަތުރުފުޅުގައި ތ. އަތޮޅުގެ 7 ރަށަކަށް ވަޑައިގެންނެވުމަށް ވަނީ ނިންމަވާފައެވެ. އެގޮތުން ތ. ތިމަރަފުށި، ތ. ކިނބިދޫ، ތ. އޮމަދޫ، ތ. ވޭމަންޑޫ، ތ. ވަންދޫ، ތ. ކަނޑޫދޫ އަދި ތ. ގާދިއްފުށި ހިމެނެއެވެ.
3 ދުވަހުގެ މި ދަތުރުފުޅުގައި ރައީސް ފުރާވަޑައިގަންނަވާނީ އަންގާރަ ދުވަހުގެ ހަވީރުގެ ވަގުތެއްގައެވެ.
ރައީސްގެ މި ދަތުރުފުޅާ ގުޅޭ ގޮތުން ރާއްޖެ އެމްވީއާ ވާހަކަ ދައްކަވަމުން، ރައީސް އޮފީހުގެ ތަރުޖަމާނު މަބްރޫކް އަޒީޒު ވިދާޅުވީ ރައީސްގެ މި ދަތުރުފުޅުގައި މި 7 ރަށުގެ ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރުންނާ ބައްދަލުކުރައްވާނެ ކަމަށެވެ. އަދި ރަށްރަށުގެ މުއައްސަސާތަކަށް ވަޑައިގަންނަވާނެ ކަމަށާއި، އެތަންތަނުގެ ވެރިންނާ ބައްދަލު ކުރައްވާނެ ކަމަށެވެ.
މަބްރޫކް ވިދާޅުވީ ލާމަރުކަޒީ ގާނޫނުގެ ދަށުން ފުރަތަމަ ފަހަރަށް ކައުންސިލަރުން އައްޔަންކޮށް އެ ގާނޫނުގެ ދަށުން ކައުންސިލްތައް ހިނގަމުން ދާއިރު، ކައުންސިލްތަކަށް ލިބިފައިވާ ބާރުގެ ދަށުން ކައުންސިލްތައް ހިނގަމުން ދިއުމަކީ ރައީސްގެ އަމާޒެއް ކަމަށާއި، މީގެ ކުރިން ވެސް ރައީސް ވަނީ ވާޗުއަލްކޮށް ކައުންސިލްތަކާއި ބައްދަލުކުރައްވާފައި ކަމަށެވެ. އަދި ރައީސްގެ މި ދަތުރުފުޅުގެ އެއް އަމާޒަކީ ކައުންސިލްތަކާ ގާތުން ބައްދަލު ކުރައްވައި މަޝްވަރާ ކުރެއްވުން ކަމަށެވެ.
މަބްރޫކް ވިދާޅުވީ ކޮވިޑް-19 އާ ގުޅިގެން ރާއްޖޭގެ އެކި ހިސާބުތަކުގައި ކުރިއަށްދާ ތަރައްގީގެ މަޝްރޫއުތައް މިވީ ދޮޅު އަހަރުގެ ތެރޭގައި ރައީސް ވަޑައިގެން ބެއްލެވިފައި ނެތުމާއެކު ރައީސް ކުރައްވާ މި ދަތުރުފުޅުގެ އަނެއް އަމާޒަކީ ތަރައްގީގެ ކަންކަން ގާތުން ބެއްލެވުން ކަމަށެވެ.
ރައީސްގެ މި ދަތުރުފުޅުގައި ސަރުކާރުގެ އިސްވެރިން ވެސް ބައިވެރިވެވަޑައިގަތުމަށް ވަނީ ހަމަޖެހިފައެވެ.
