ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރަށް ސަރުކާރުން 32 ބިލެއް ހުށަހަޅަން ނިންމައިފިއެވެ.  

މިއަހަރުގެ ތިންވަނަ ދައުރަށް ހުށަހެޅުމަށް ސަރުކާރުން ގަސްދުކުރާ ބިލުތަކުގެ ތެރޭގައި އެކި ދާއިރާތަކުން ޖުމްލަ 32 ބިލު މަޖިލީހަށް ފޮނުވާފައިވަނީ އެޓާރނީ ޖެނެރަލްގެ އޮފީހުންނެވެ. އޭގެ ތެރޭގައި ގާނޫނީ އަދި ޝަރުއީ ދާއިރާއާ ގުޅުންހުރި ބިލުތަކާއި ދީނީ އަދި އިޖްތިމާއީ ދާއިރާއާގުޅޭ ބިލުތަކާއި އިގްތިސާދީ އަދި ތިމާވެށީގެ ދާއިރާއާގުޅޭ ބިލުތައް ހިމެނެއެވެ.

ސަރުކާރުގެ ފަރާތުން ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރަށް ހުށަހެޅުމަށް ގަސްތުކުރާ ބިލުތަކުގެ ލިސްޓު ރައްޔިތުންގެ މަޖިލީހުގެ ގަވާއިދުގެ 82 ވަނަ މާއްދާގެ (ރ) ގައިވާ ގޮތުގެމަތިން އެ މަޖިލީހަށް ހުށަހެޅުމަށްޓަކައި ސަރުކާރުގެ ފަރާތުން ހޯމަދުވަހު ވަނީ ފޮނުވާފައެވެ.

ރައްޔިތުންގެ މަޖިލީހުގެ ގަވާއިދުގެ 82 ވަނަ މާއްދާގެ (ރ)ގައި ބުނެފައިވަނީ މަޖިލީހުގެ ކޮންމެ ދައުރެއް ފެށުމާއެކު ސަރުކާރުގެ ފަރާތުން އެދައުރަކަށް ހުށަހަޅަން ހުރި ބިލުތަކުގެ ލިސްޓެއް ސަރުކާރުން މަޖިލީހުގެ ރައީސަށް ފޮނުވަންވާނެއެވެ. އަދި އެ ލިސްޓު ލިބުމުން މަޖިލީހުގެ ރައީސް ހުރިހާ މެންބަރުންނަށް އެލިސްޓު ފޮނުވަންވާނެއެވެ. ނަމަވެސްް، މަޖިލީހުގެ މެޖޯރިޓީ ލީޑަރާއި މައިނޯރިޓީ ލީޑަރާ މަޝްވަރާކުރުމަށްފަހު ސަރުކާރުގެ ފަރާތުންް މަޖިލީހަށް ހުށަހެޅުމަށްް ފޮނުވާ އެނޫންބިލު މަޖިލީހުގެ އެދައުރަށް އެޖެންޑާކުރުމަކަށް މިމާއްދާ ހުރަހެއް ނާޅައެވެ.

މަޖިލީހުގެ މިއަހަރުގެ ތިންވަނަ ދައުރު ފަށާފައިވަނީ އޮގަސްޓު މަހުގެ 16ވަނަ ދުވަހުއެވެ.