އީރާންގެ ޝަބަހާރް ޕޯރޓް ބޭނުން ކުރުމަށް އިންޑިއާއާއެކު ހަދާ އެއްބަސްވުމުގެ ޑްރާފްޓަށް ބަދަލު ގެންނަނީ

އީރާންގެ ޝަބަހާރް ޕޯރޓް ބޭނުން ކުރުމަށް އިންޑިއާއާއެކު ހަދާ އެއްބަސްވުމުގެ ޑްރާފްޓަށް ބަދަލު ގެންނަން އެގައުމުން ނިންމައިފިއެވެ.

ޝަބަހާރް ޕޯރޓަކީ އީރާންގެ ދެކުނު އިރުމަތީ އޮންނަ ޕޯރޓެކެވެ. އީރާންގެ ޤާނޫނުހަދާ މަޖިލީހުގެ މެމްބަރުން ބުނެފައިވަނީ, އެއްބަސްވުމުގެ ޑްރާފްޓަށް ބަދަލުތަކެއް ގެނައުމަށްފަހު ދެގައުމުން އެއްބަސްވާ ގޮތަކަށް އެގްރީމެންޓް އެކުލަވާލުމަށެވެ. މަޖިލީހުގެ ކޮންސްޓްރަކްޝަން ކޮމިޓީގެ މުޤައްރިރު މުޙައްމަދު ރިޒާ ވިދާޅުވީ، އިންޑިއާއާއެކު ހަދަން ނިންމާފައިވާ 10 އަަހަރު ދުވަހުގެ އެގްރީމެންޓުގައި ސޮއި ކުރާނީ، ބަދަލުތަކާއެކު މަޖިލީހުން ފާސް ވުމުން ކަމަށެވެ.

އަަލަށް ގެނައި ބަދަލުތަކުގެ ތެރޭގައި ހިމެނެނީ، އެއްބަސްވުން އެކުލަވާލުމަށް މަަސައްކަތްކުރާ ކުންފުނިން އައު ނަމަކާއެކު، އީރާނުގެ ޕާޓްނަރުން ނުހިމެނޭ ގޮތަށް, ހުށަހަޅަންޖެހޭ ކަމަށެވެ. އެއާއެކު އީރާންގެ ހިއްސާދާރުންނާއެކު ހުށަހަޅާފައިވާ ކުންފުނި ވަކިވާނެ ކަމަށާއި، އެގޮތަށް އިންޑިއާ ކުންފުނިންވެސް އެއްބަސްވެފައިވާ ކަމަށެވެ.

އިންޑިއާއިން އެއްބަސްވެފައިވަނީ އެ ކުންފުނިން މަސައްކަތް ފެށުމުގެ ކުރިން 6 ކެރޭން ބެހެއްޓުމަށާއި, އެހެނިހެން ސާމާނު ހިމެނޭ ގޮތަށް 85 މިލިއަން ޑޮލަރުގެ އިންވެސްޓްމެންޓަކަށެވެ.

އީރާނުގެ އޮފިޝަލުން ބުނެފައިވަނީ އިންޑިއާއިން ވައުދުވި ކަންކަމުގެ ތެރެއިން މިހާތަނަށް ފުރިހަމަ ވެފައިވަނީ މަދު ކަމެއް ކަމަށެވެ. އޭގެތެރޭގައި ހިމެނެނީ 6 ކެރޭން ބެހެއްޓުމެވެ. ބާކީހުރި ކަންކަން އަންނަ އަހަރު މާޗްގެ ކުރިން ނިންމަން ޖެހެއެވެ.