ކޮވިޑުގެ ނުރައްކާ ނެތް ކަމަށް ބަލަން އަދި އަވަސް: ޑރ. މަޢުޞޫމް
ސައުތު އޭޝިއާ މީހުން ޕޮޒިޓިވްވާ އަދަދު ދަނީ އިތުރުވަމުން
މާލޭގެ ބޮޑުތަކުރުފާނު މަގު
ކޮވިޑުގެ ނުރައްކާ ނެތްކަމަށް ބަލަން އަދި މާ އަވަސް ކަމަށް ޓުއަރިޒަމް މިނިސްޓަރ ޑރ. ޢަބްދުﷲ މަޢުޞޫމް ވިދާޅުވެއްޖެއެވެ.
މިނިސްޓަރ ކުރެއްވި ޓްވީޓެއްގައި ވިދާޅުވީ ހޮނިހިރު ދުވަހު ރާއްޖެއިން ކޮވިޑް-19އަށް ޕޮޒިޓިވްވި މީހުންގެ ތެރެއިން 9 މީހަކު ސައުތު އޭޝިއާއަށް ނިސްބަތްވާ ކަމަށެވެ. މީގެ ތެރޭގައި ބަންގްލަދޭޝްއަށް ނިސްބަތްވާ 6 މީހަކާއި، އިންޑިއާއަށް ނިސްބަތްވާ މީހަކާއި، ސްރީލަންކާއަށް ނިސްބަތްވާ މީހެއްގެ އިތުރުން ނޭޕާލަށް ނިސްބަތްވާ މީހަކު ހިމެނޭ ކަމަށް މިނިސްޓަރ ވިދާޅުވިއެވެ.
ވުމާއެކު ކޮވިޑުގެ ނުރައްކާ ނެތްކަމަށް ބަލަން އަދި މާ އަވަސް ކަމަށް މިނިސްޓަރ ވިދާޅުވިއެވެ. ފަތުރުވެރިކަމުގެ ވިޔަފާރި ކުރާއިރު ވެސް އިންތަކާއި މިންތަކާއި އެއްގޮތަށް މިކަން ކުރުމަށް ސަމާލުވުމަށް މިނިސްޓަރ ވަނީ ނަސޭހަތްތެރިވެވަޑައިގެންފައެވެ.
ސައުތު އޭޝިއާގެ ފަތުރުވެރިންނަށް ރާއްޖެ ބަންދުކޮށްފައި އޮތުމަށްފަހު އެމީހުންނަށް ރާއްޖެ އައުމުގެ ހުއްދަ ދީފައިވަނީ ޖުލައި މަހުގެ 15ވަނަ ދުވަހުއެވެ. ސައުތު އޭޝިއާގެ ފަތުރުވެރިންނަށް ރާއްޖެ ބަންދުކޮށްފައި އޮތީ އެ ސަރަހައްދުގައި ވަރަށް ބޮޑަށް ޑެލްޓާ ވޭރިއަންޓް ފެތުރެމުންދާތީއެވެ. މިފަދަ ހާލަތެއްގައި އެސަރަހައްދުގެ ފަތުރުވެރިންނަށް ރާއްޖެ ހުޅުވާލުމުން ގިނަ ބަޔަކު ވަނީ އެކަމުގެ ކަންބޮޑުވުން ފާޅުކޮށްފައެވެ.
އެސަރަހައްދުގެ ފަތުރުވެރިންނަށް ރާއްޖެ ހުޅުވާލާފައިވާއިރު، އެޗްޕީއޭއިން ވަނީ ބަލި ކޮންޓްރޯލްކުރެވިއްޖެ ކަމަށް ބުނެ، މީގެ ކުރިން އަޅާފައިވާ ގިނަ ފިޔަވަޅުތަކަކަށް ލުއި ދީފައެވެ. މިއާއެކު ގިނަ ބަޔަކު އެއްވެގެން ކުރެވޭ ގިނަ ކަންކަން ކުރުމުގެ ފުރުސަތު ފަހިވެފައިވާއިރު، އަދަދު ކަނޑައެޅުމެއް ނެތި, ގިނަ ބަޔަކު އެއްވެ ހަފުލާތައް ބޭއްވުމުގެ ހުއްދަވެސް ވަނީ ދީފައެވެ. މީގެ އިތުރުން ކެފޭ/ރެސްޓޯރެންޓުތައް އާންމު ހާލަތުގައި ހުޅުވާ ވަގުތުތަކުގައި ހުޅުވުމުގެ ހުއްދަ ވެސް ވަނީ ދީފައެވެ.
