އަންބަރާގައި ރިސޯޓެއް ތަރައްގީ ކުރުމަށް ނިންމާފައިވާ ނިންމުން ބަދަލުކުރުމަށް ގޮވާލައިފި
7 އޯގަސްޓު 2021 | ހޮނިހިރު 08:52އަންބަރާއަކީ ތިމާވެށީގެ ގޮތުން ނާޒުކު ރަށެއް
ވ. އަތޮޅު އަންބަރާ،
ވ.އަތޮޅު އަންބަރާއަކީ ރިސޯޓެއް ނުވަތަ ސިނާއީ އެފަދަ އެހެން މަސައްކަތެއްކުރުމަށް ތަރައްގީ ކުރުމަށް ވުރެ ތިމާވެށީގެ ގޮތުން ނާޒުކު ރަށެއް ކަމަށާއި، އެރަށުގައި ރިސޯޓެއް ތަރައްގީ ކުރުމަށް ނިންމާފައިވާ ނިންމުން ބަދަލުކުރުމަށް ވ. އަތޮޅު ކައުންސިލުން ގޮވާލައިފިއެވެ.
ވ.އަތޮޅު ކައުންސިލުން ބުނީ ފަތުރުވެރިކަމުގެ ޚިދުމަތް ދިނުމަށް އަންބަރާ ރިސޯޓެއްގެ ގޮތުގައި ތަރައްގީ ކުރުމަށް ރަށް ކުއްޔަށް ނަގާފައިވާ "ހަނދުވަރު އޯޝަން ޕްރައިވެޓް ލިމިޓެޑް" އަށް ޓޫރިޒަމް މިނިސްޓްރީން 17 ޖޫން 2021 ގައި ދީފައިވާ "ކޮންސެޕްޓް އެޕްރޫވަލް" އަށް ރަށް ތަރައްގީ ކުރާ ކުންފުނިން ތައްޔާރުކޮށްފައިވާ އީއާއިއޭ ރިޕޯރޓާއި ގުޅޭގޮތުން މަޝްވަރާ ކުރުމަށް އެދިފައިވާ ކަމަށެވެ.
އަންބަރާއަކީ ރިސޯޓެއް ނުވަތަ ސިނާއީ އެފަދަ އެހެން މަސައްކަތެއް ކުރުމަށް ތަރައްގީ ކުރުމަށް ވުރެ ތިމާވެށީގެ ގޮތުން ނާޒުކު ރަށެއްކަން ފާހަގަކޮށް ކައުންސިލުން ބުނީ އެރަށުގެ ވަށައިގެންވާ ފަރަކީ ތަފާތު ގިނަ ދިރުންތަކެއްގެ މައްޗަށް އުފެދިފައިވާ ރީތި ފަރަކަށްވުމާއި، ވ. އަތޮޅުގައި ލޯކަލް ފަތުރުވެރިކަން ކުރާ މީހުންނާއި، ވ.އަތޮޅުގެ ރައްޔިތުންގެ ބޭނުންތަކަށް ނުހަނު މުހިއްމު ވެފައިވާ ރަށެއްގެ ގޮތުގައި އަބަދު ވެސް މަޝްހޫރުވެފައިވާ ރަށެއް ކަމަށެވެ.
އެހެންކަމުން އަންބަރާގައި އެރަށުގެ ގުދުރަތީ ރީތިކަން ގެއްލޭގޮތަށް، އަދި ތިމާވެށީގެ ގޮތުން ހުރި ޚާއްސަ ސިފަތައް ގެއްލޭފަދަ ގޮތަކަށް އެރަށް ތަރައްގީ ކުރުމަށް ހުށަހަޅާ އެއްވެސް ހުށަހެޅުމަކަށް ވ.އަތޮޅު ރައްޔިތުން ތާއީދު ނުކުރާކަން ޓޫރިޒަމް މިނިސްޓްރީގެ ސަމާލުކަމަށް ގެނެސްފައިވާ ކަމަށް ކައުންސިލުން ބުނެއެވެ. އަދި އަންބަރާއަކީ ރިސޯޓެއްގެ ގޮތުގައި ތަރައްގީ ކުރުން އެންމެ ރަނގަޅުނޫން ރަށެއްގެ ގޮތުގައި ނިންމައި ދިނުމަށް ސަރުކާރުގެ ޕޮލިސީ ލެވެލްގައި މަޝްވަރާކުރުމަށް ކައުންސިލުން އެދިފައިވެއެވެ.
މީގެ އިތުރުން ކައުންސިލުން ބުނީ ރިސޯޓު ތަރައްގީ ކުރުމަށް ހުށަހަޅާފައިވާ އީއައިއޭ ރިޕޯރޓާއި، ކޮންސެޕްޓް ޕްލޭން ފާސްވުމުގެ ކުރިން ވެސް އަންބަރާ ބަލަހައްޓަމުން އައި މީހުން އެރަށުގެ ތިމާވެށީގެ ޚާއްސަ ސިފަތަކުގެ ތެރެއިން ރަށުގައިވާ ކަނޑޫފާ ސަރަހައްދަށް ވެލިއަޅައި އެސަރަހައްދު ގެއްލުވާލުމަށް މަސައްކަތް ކޮށްފައިވާ ކަަމަށެވެ.
ފަތުރުވެރިކަމުގެ ޚިދުމަތް ދިނުމަށް އަންބަރާ ރިސޯޓެއްގެ ގޮތުގައި ތަރައްގީ ކުރުމަށް ނިންމަވާފައިވާ ނިންމުމާއެކު ދެވަނަ ވިސްނުމުކަށްދާން ޖެހޭ ކަމަށް ކައުންސިލުން ބުނެފައިވެއެވެ. އަދި ރައްޔިތުން އެދޭ ގޮތަށް ނިންމުން ނިންމައިދޭނެކަމުގެ އުންމީދު އެބައޮތް ކަމަށް ވެސް ކައުންސިލުން ބުނެފައިވެއެވެ.
