ކުޅުދުއްފުށީ ރީޖަނަލް ހޮސްޕިޓަލް: ސަރަހައްދުގެ ސިއްހީ ނިޒާމަށް ހެޔޮ ބަދަލެއް ގެންނާނެ

މާލެއަށް ބަރޯސާވެފައި އޮންނަ ސިއްޙީ ނިޒާމަށް ހެޔޮ ބަދަލެއް ގެނައުމަށް ސަރުކާރުން އަންނަނީ މަސައްކަތް ކުރަމުންނެވެ. އެގޮތުން ރައްޔިތުންނާ ގާތުން ފެންވަރު ރަނގަޅު ސިއްޙީ ޚިދުމަތްތައް ދިނުމަށް ފަށާފައިވާ މަސައްކަތުގެ ތެރެއިން ރާއްޖޭގެ އެކި ކަންކޮޅުތަކުގައި ހުރި ބައެއް ހޮސްޕިޓަލްތައް ޓާޝަރީ ކުރުމުގެ މަސައްކަތް އަންނަނީ ކުރަމުންނެވެ.

މިގޮތުން ކަނޑައަޅާފައިވާ 5 ހޮސްޕިޓަލެއްގެ ތެރެއިން ކުޅުދުއްފުށީ ރީޖަނަލް ހޮސްޕިޓަލަށް މިހާތަނަށް ގެނެސްފައިވާ ކުރިއެެރުން ފާހަގަކުރެވެއެވެ. އެތަނުން ދެމުން އައި ޚިދުމަތްތައް އިތުރަށް ފުޅާކޮށް، އައު ޚިދުމަތްތަކެއް ދިނުމަށް މި ސަރުކާރުގެ މިދިޔަ 2 އަހަރުގެ ތެރޭގައި ވަނީ މަސައްކަތްތަކެއް ކޮށްފައެވެ.

ހދ ކުޅުދއްފުށި ރީޖަނަލް ހޮސްޕިޓަލުގައި މިދިޔަ 2 އަހަރުގެ ތެރޭގައި އަލަށް ފަށާފައިވާ ޚިދުމަތްތަކުގެ ތެރޭގައި، ފިޒިއޯތެރަޕީގެ ޚިދުމަތާއި، އޮޕްޓިމައިޒޭޝަން ޕްރޮޖެކްޓުން ފިޒިއޮތެރަޕީގެ ހިދުމަތަށް ބޭނުންވާ ޒަމާނީ އިތުރު އިކުއިޕްމަންޓްތައް ބަހައްޓާ ޚިދުމަތް ދޭން ފެށުމާއި، އީއެންޓީ އަދި ލޮލުގެ ފަރުވާ ފަށާފައިވެއެވެ. އެމްއާރްއައި މެޝިން އިންސްޓޯލްކޮށް ޚިދުމަތް ފޭން ފަށާފައިވަނީ މިއަހަރު މާރިޗް މަހުގެ 15 ވަނަ ދުވައެވެ. ސީޓީ ސްކޭންގެ ޚިދުމަތާއި ދެ ތިއޭޓަރުން އޮޕަރޭޝަން ކުރެވޭނެ އިންތިޒާމްތައް މިހާރު އެ ހޮސްޕިޓަލުން ލިބެން ހުންނާނެ ކަމށް ހެލްތް މިނިސްޓްރީން މައުލޫމާތުދެއެވެ.

ކާރޑިއެކް ޚިދުމަތް ހދ. ކުޅުދުއްފުށީ ހޮސްޕިޓަލްގައި ތައާރަފް ކުރީ 11 އޮކްޓޯބަރ 2019ގައެވެ. ވޯޑްތައް އެއަރ ކޮންޑިޝަންކޮށް ހޮސްޕިޓަލުގައި ކުރަން ޖެހޭ މަރަމާތު މިހާރު އަންނަނީ ކުރަމުންނެވެ. ޕަލްމޮނޮލޮޖީ އާއި ސްޕީޗްތެރަޕީގެ ޚިދުމަތްވެސް މިހާރުވަނީ ފަށާފައެވެ. ސައިކޭޓްރިސްޓް ޚިދުމަތް ތައާރަފް ކުރެވި ޚިދުމަތް ދޭންވަނީ ފަށާފައެވެ. ކޮވިޑް-19ގެ ބަލިމަޑުކަމާއެކު ވައިރަހަށް ޓެސްޓް ކުރުމަށް ޕީސީއާރު ލެބްގެ ޚިދުމަތާއި ރީޖަނަލް އައިސީޔޫ ފެސިލިޓީއެއް ގާއިމުކޮށްފައިވެއެވެ.

އަލަށް ފެށި ޚިދުމަތްތައް ރައްޔިތުން ބަލައިގަނެފައިވާކަން ތަފާސްހިސާބުތަކަށް ބަލާލުމުން އެނގެއެވެ. ސީޓީ ސްކޭންގެ ޚިދުމަތް ފަށާފައިވަނީ 2019ވަނަ އަހަރުގެ އޮކްޓޯބަރ މަހުގައެވެ. މި ޚިދުމަތް މިހާތަނަށް 1،497 މީހަކުވަނީ ހޯދާފައެވެ. 2012ވަނަ އަހރުގެ މާޗް މަހު ފެށި އެމްއާރްއައިގެ ޚިދުމަތް 507 މީހަކު މިހާތަނަށް ހޯދާފައިވެއެވެ. 2021ވަނަ އަހަރުގެ ފެބްރުއަރީ މަހު ފެށި މެމޮގްރަފީގެ ޚިދުމަތް 48 މީހަކު ވަނީ ހޯދާފައެވެ. 2020ވަނަ އަހރުގެ މާޗް މަހު ސްޕީޗް ތެރަޕީގެ ޚިދުމަތްވެސް ވަނީ ފަށާފައެވެ. މިހާތަނަށް 170 މީހަކަށް ސްޕީޗް ތެރަޕީ ދީފައިވާއިރު، 95 މީހަކަށް މިހާރުވެސް ގެންދަނީ ސްޕީޗް ތެރަޕީ ދެމުންނެވެ. ހަތަރު އެނދުގެ ލޭބަރ ރޫމެއްވެސް ވަނީ ސެޕްޓެމްބަރ، 2020ގައި ގާއިމް ކޮށްފައެވެ.

އެ ހޮސްޕިޓަލުގައި މަހެއްގެ މައްޗަށް އެވްރެޖްކޮށް 47 މާބަނޑު މީހުން ވިއްސައެވެ. ނާރުގެ ބަލިތަކަށް ފަރުވާ ދިނުން 2020 ވަނަ އަހަރުގެ ޖުލައި މަހު ވަނީ ފަށާފައެވެ.

ބަލި މީހުންނަށް ފަރުވާ ދިނުމަށް ޚާއްސަކޮށްގެން ހޮސްޕިޓަލުގައި އޮކްސިޖަން ޕްލާންޓެއް ގާއިމްކުރީ، 2020ވަނަ އަހަރުގެ ޑިސެމްބަރ މަހުގެ 19ވަނަ ދުވަހުއެވެ.

ހޮސްޕިޓަލުގެ ޚިދުމަތްތައް ޓާޝަރީ ފެންވަރަށް މަތިކުރުމަށް ކުރިޔަށްގެންދާ މަސައްކަތްތަކުގެ ދަށުން އެ ހޮސްޕިޓަލުގައި މިހާރު އަންނަނީ 30 އެނދުގެ ވޯޑެއް ހެދުމާއި 6 އެނދުގެ އައިސީޔޫއެއް ހެދުމުގެ މަސައްކަތް ކުރަމުންނެވެ. މި މަޝްރޫއާއެކު ރީޖަނަލް ހޮސްޕިޓަލުގެ ޖާގައިގެ ދަތިކަމަށް ހައްލު ލިބިގެންދާނެއެވެ. މި މަސައްކަތުގެ ކޮންޓްރެކްޓަރ އެމްޓީސީސީން ބުނެފައިވަނީ ސެޕްޓެމްބަރުގެ ނިޔަލަށް މަސައްކަތް ނިންމާލެވޭނެ ކަމަށެވެ.

ހޮސްޕިޓަލުގައި ބެކަޕް ޖަނެރޭޓަރު ސިސްޓަމެއް ގާއިމް ކުރުމަށް ވަނީ ފެނަކައާ ހަވާލުކޮށްފައެވެ.

ކޮވިޑް19ގެ ބަލިމަޑުކަން ފެތުރިގެން ދިޔުމާއެކު އެ ހޮސްިޓަލުގައި ގާއިމްކުރި ޕިސީއާރް ލެބުން މިހާތަނަށް 33،145 ކޮވިޑް ޓެސްޓްވަނީ ހަދާފައެވެ.

ކުޅުދުއްފުށީ ރީޖަނަލް ހޮސްޕިޓަލަކީ، ކުޅުދުއްފުށީގެ އިތުރުން އެ ސަރަހައްދުގެ އެހެން ރަށްރަށުންވެސް ޚިދުމަތް ހޯދާ ހޮސްޕިޓަލެކެވެ. އަލަށް ތައާރަފް ކުރެވުނު ގިނަ ޚިދުމަތްތަކާއެކު އެ ސަރަހައްދުގެ ސިއްޙީ ނިޒާމަށް މިވަނީ ހެޔޮ ބަދަލުތަކެއް އައިސްފައެވެ. ސަރުކާރުގެ އަމާޒަކީ، ވީހާވެސް އަވަހަކަށް މަސައްކަތްތައް ނިންމައި ޓާޝަރީ ފެންވަރަށް ހޮސްޕިޓަލުގެ ޚިދުމަތްތައް ބަދަލުކުރުމެވެ.