ކުރީގެ ނޫޓުތައް ބަދަލުކުރެވޭނީ މި މަހުގެ 27ގެ ކުރިން
ކުރީގެ ކަރުދާސް ނޫޓުތައް ބޭނުންކުރުން ހުއްޓާލާފައިވަނީ "ރަންދިހަ ފަހެއް" ނޫޓް ސީރީޒް ބޭނުންކުރަން ފެށުމާ ގުޅިގެން
މި ތާރީޚުގެ ފަހުން، ކުރިން ބޭނުންކުރަމުން އައި ކަރުދާސް ނޫޓުތައް ބަދަލެއް ނުކުރެވޭނެ
ކުރީގެ ކަރުދާސް ނޫޓުތައް އައު ނޫޓަށް ބަދަލުކުރެވޭނީ މި މަހުގެ 27ގެ ނިޔަލަށް ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ބުނެފިއެވެ.
އެމްއެމްއޭއިން މީގެ ކުރިން ބުނެފައިވަނީ ކުރީގެ ކަރުދާސް ނޫޓުތައް އައު ނޫޓަށް ބަދަލުކުރެވޭނީ މި މަހުގެ 31ގެ ނިޔަލަށް ކަމަށެވެ. އެމްއޭމްއޭއިން މި ތާރީޚު ބަދަލުކުރީ އަޟްޙާ ޢީދާއި މިނިވަން ދުވަހާ ގުޅިގެން ބަންދު ދުވަސްތަކެއް އަންނާތީއެވެ.
އެ އޮތޯރިޓީން ބުނީ ބަންދު ދުވަސްތަކުގައި އެމްއެމްއޭ ހުޅުވާފައި ހުންނާނީ 21 ޖުލައި އަދި 27 ގައި ކަމަށެވެ. އެހެންކަމުން ކަރުދާސް ނޫޓުތައް ބަލައިގަންނާނެ އެންމެ ފަހު ދުވަހަކީ 27 ޖުލައި ކަމަށާއި މި ދުވަސްތަކުގައި އެޕޮއިންޓްމަންޓް ހެއްދުމަކާނުލައި އެމްއެމްއޭއަށް ގޮސް ކުރީގެ ކަރުދާސް ނޫޓުތައް ބަދަލުކުރެވޭނެ ކަމަށެވެ.
ރާއްޖޭގެ މިނިވަން ކަމަށް 50 އަހަރު ފުރުމާ ދިމާކޮށް، 2016 ވަނަ އަހަރު ނެރުނު "ރަން ދިހަ ފަހެއް"ގެ ނޫޓު ސީރީޒްގައި 5، 10، 20، 50، 100، 500 އަދި 1،000 ރުފިޔާގެ ނޫޓު ވަނީ ނެރެފައެވެ. ކުރިން ބޭނުންކުރި ކަރުދާސް ނޫޓްތައް ބަދަލުކުރުމަށް އެމްއެމްއޭއިން ވަނީ ދިގު މުއްދަތެއް ދީފައެވެ.
އެމްއެމްއޭއިން ބުނީ މި ތާރީޚުގެ ފަހުން، ކުރިން ބޭނުންކުރަމުން އައި ކަރުދާސް ނޫޓުތައް ބަދަލު ނުކުރެވޭނެ ކަމަށެވެ. އެމްއެމްއޭއިން ބުނީ މިހާރުވެސް ގިނަ އަދަދެއްގެ ކުރީގެ ކަރުދާސް ނޫޓުތައް އެ އިދާރާއަށް ލިބިފައިވާކަމަށެވެ.
ކުރީގެ ކަރުދާސް ނޫޓުތައް ބޭނުންކުރުން ހުއްޓާލާފައިވަނީ "ރަންދިހަ ފަހެއް" ނޫޓް ސީރީޒް ބޭނުންކުރަން ފެށުމާ ގުޅިގެންނެވެ. ސަލާމަތީގޮތުން ރައްކާތެރި، އަދި ކޮލިޓީ ރަނގަޅު ރަންދިހަ ފަހެއް ނޫޓް ސީރީޒް ބޭނުންކުރަން ފަށާފައިވަނީ 26 ޖަނަވަރީ 2016 ގައެވެ. ދިވެހި ރުފިޔާގެ އާ ނޫޓް ސީރީޒްތަކަކީ ކުރިން ބޭނުންކުރި ނޫޓް ސީރީޒްތަކުގެ ނޫޓްތަކާ ޚިލާފަށް ރައްކާތެރި، ގެންގުޅެން ފަސޭހަ އަދި ޒަމާނީ ނޫޓްތަކެކެވެ. މި ނޫޓްތަކުގައި އެކުލެވޭ ބައެއް ސެކިއުރިޓީ ފީޗާސްތަކަށް ބަލައިލާއިރު، ރަންދިހަ ފަހެއްގެ ނޫޓްތަކަށް އަލްޓްރާ ވައިލެޓް އަލި އެޅުވުމުން ސީރިއަލް ނަމްބަރު ދިއްލޭނެއެވެ. އަދި އަލްޓްރާ ވައިލެޓް އަލީގައި ނޫޓްގެ މޫނުމަތީ އަގު، ގޮޅިއެއްގައި ދިއްލިފައި ހުންނައިރު، މިއީ އާދައިގެ އަލީގައި ފެންނާނެ އެއްޗެއް ނޫނެވެ. ރަންދިހަ ފަހެއްގެ ނޫޓް ސީރީޒްގެ ނޫޓްތަކަކީ، ފެނުމުން މަހްރޫމްވެފައިވާ ފަރާތްތަކަށް ވެސް ނޫޓްތައް ދެނެގަތުމަށް ފަސޭހަ ފީޗަރސްތަކެއް އެކުލެވިގެންވާ ނޫޓްތަކެކެވެ.
