ދެވަނަ ޑޯޒް ނުޖަހާ ތިބީ 77،008 މީހުން
242،370 މީހުން ވަނީ ވެކްސިން ފުރިހަމަކޮށްފައި
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
ދެވަނަ ޑޯޒް ނުޖަހާ ތިބީ 77،008 މީހުން ކަމަަށް އެޗްޕީއޭގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން ހާމަކޮށްފައިވާ ހޯމަ ދުވަހުގެ ވެކްސިންގެ ތަފާސްހިސާބުތައް ދައްކާ ގޮތުން، 242،370 މީހުން ވަނީ ވެކްސިން ފުރިހަމަކޮށްފައެވެ. އެއީ ހޯމަ ދުވަހު ވެކްސިން ފުރިހަމަ ކުރި 6755 މީހުންނާއެކުއެވެ. ހޯމަ ދުވަހު މާލެއިން 3556 މީހަކު ވެކްސިން ފުރިހަމަކޮށްފައިވާ އިރު، އަތޮޅުތެރެއިން ވެކްސިން ފުރިހަމަކޮށްފައިވަނީ 3199 މީހުންނެވެ.
މިހާތަނަށް އައި އިރު ވެކްސިންގެ ފުރަތަމަ ޑޯޒް ޖަހާފައިވަނީ 319،378 މީހުންނެވެ. އެއީ ހޯމަ ދުވަހު ވެކްސިންގެ ފުރަތަމަ ޑޯޒް ޖެހި 622 މީހުންނާއެކުގައެވެ. ހޯމަ ދުވަހު މާލެ ސަރަހައްދުން ވެކްސިންގެ ފުރަތަމަ ޑޯޒް ޖަހާފައިވަނީ 225 މީހުންނެވެ. އަދި އަތޮޅު ތެރެއިން ވެކްސިންގެ ފުރަތަމަ ޑޯޒް ޖަހާފައިވަނީ 397 މީހުންނެވެ.
ކޮވިޝީލްޑް ވެކްސިންގެ ދެވަނަ ޑޯޒް އަލުން ޖަހަން ފަށާފައިވާ އިރު ދުވާލެއްގެ މައްޗަށް 6000 ޑޯޒާއި 7000 ޑޯޒާ ދެމެދުގެ އަދަކަށް ވެކްސިން އަންނަނީ ޖަހަމުންނެވެ. މި ރޭޓަށް ބަލާއިރު، ކުރިއަށް އޮތް 10 ނުވަތަ 12 ވަރަކަށް ދުވަހުގެ ތެރޭގައި ރާއްޖޭގައި ވެކްސިން ފުރިހަމަ ކުރި މީހުންގެ އަދަދު 3 ލައްކައަށްވުރެ އިތުރުވާނެއެވެ.
ކޮވެކްސް ފެސިލިޓީއާއި ހެޔޮއެދޭ އެހެނިހެން ގައުމުތަކުން ރާއްޖެއަށް ކޮވިޑް ވެކްސިން ފޯރުކޮށްދޭނެކަން ވަނީ ހާމަކޮށްފައެވެ. މީގެ ތެރޭގައި އެމެރިކާ އަދި ޖަޕާން ހިމެނެއެވެ. ޖަޕާން ސަރުކާރުން ހާމަކޮށްފައިވާ ގޮތުން ކޮވެކްސް މެދުވެރިކޮށް އެގައުމުން ވެކްސިން ފޯރުކޮށްދޭ ގައުމުތަކުގެ ތެރޭގައި ރާއްޖެ ހިމެނެއެވެ.
