ކުޑަކުދިންނަށް ކަރަންޓީންވުމަކާ ނުލައި ދަތުރު ކުރެވޭ ގޮތަށް ހަމަޖައްސައިފިއެވެ.

ސަރުކާރުގެ ތަރުޖަމާނު މަބްރޫކް އަޒީޒު ވިދާޅުވީ، 18 އަހަރުން ދަށުގެ ވެކްސިން ނުޖެހޭ ކުދިންނަށް ވެސް ނެގެޓިވް ޕީސީއާރް ޓެސްޓަކާއެކު ދަތުރުކުރެވޭނެކަމަށެވެ. އަދި ވެކްސިންގެ ދެ ޑޯޒް ފުރިހަމަކޮށް 14 ދުވަސްވެފައިވާ ފަރާތްތަކަށް މޮނިޓަރިންގގެ ޙާލަތުގައި ނެތް ރަށަކަށް ނެގެޓިވް ޕީސީއާރް ޓެސްޓަކާއެކު ދަތުރުކުރެވޭނެ ކަަމަށެވެ.

ކޮވިޑް ހާލަތު ރާއްޖޭގައި ރަނގަޅުވަމުން އަންނާތީވެ، މާލެ ސަރައްދުގެ ކާރފިއު އުވާލައި، ލުއިތަކެއް ވަނީ ދީފައެވެ. އެގޮތުން، ވެކްސިންގެ ދެ ޑޯޒް ފުރިހަމަކޮށް 14 ދުވަސްވެފައިވާ ފަރާތްތަކަށް، މީހުން ދިރިއުޅޭ ރަށްތަކުގެ ތެރެއިން މޮނިޓަރިންގެ ހާލަތުގައި ނެތް އެހެން ރަށަކަށް، ނެގެޓިވް ޕީސީއާރު ޓެސްޓަކާއެކު ދަތުރުކުރުމުގެ ފުރުސަތު ޖުލައި 8 ވަނަ ދުވަހުން ފެށިގެން ހުޅުވާލާނެއެވެ.

ސަރވައިލަންސްގެ ގޮތުގައި ރެންޑަމް ސާމްޕްލިންގއިން ހަދާ ޕީސީއާރް ޓެސްޓުގެ ނަތީޖާ، ދަތުރުކުރުމަށް ބޭނުން ކުރެވޭނެ ކަމަށް އެޗްޕީއޭ އިން ވަނީ ބުނެފައެވެ.

ރިސޯޓް މުވައްޒަފުންނަށް މޮނިޓަރިންގެ ހާލަތުގައި ނެތް ރަށެއްގައި ދިރިއުޅޭ ފަރާތްތަކުގެ ތެރެއިން، ،ވެކްސިންގެ ދެ ޑޯޒް ފުރިހަމަކޮށް 14 ދުވަސްވެފައިވާ ފަރާތްތަކަށް، މީހުން ދިރިއުޅޭ، މޮނިޓަރިންގެ ހާލަތުގައި ނެތް އެހެން ރަށަކަށް، ނެގެޓިވް ޕީސީއާރު ޓެސްޓަކާއެކު ކަރަންޓީންވުމަކާ ނުލައި ޖުލައި 8 ވަނަ ދުވަހުން ފެށިގެން ދަތުރުކުރެވޭނެ ކަމަށް ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ސަރުކާރުގެ ތަރުޖަމާނު މަބްރޫކު އަޒީޒު ވަނީ ވިދާޅުވެފައެވެ.

މަބްރޫކް ވަނީ ވެކްސިންގެ ދެ ޑޯޒް ފުރިހަމަކުރުމުން ބައިނަލްއަގުވާމީ ދަތުރުވެރިންނަށް ލުއިދިނުމަށް ނިންމާފައިވާކަމަށް ވިދާޅުވެފައެވެ. އެގޮތުން ރާއްޖެ އައުމުގެ 96 ގަޑިއިރުގެ ތެރޭގައި ހަދާފައިވާ ޕީސީއާރު ނެގެޓިވް ޓެސްޓަކާއެކު އައުމުން ކަރަންޓީން ވާ މުއްދަތު 7 ދުވަހަށް ކުޑަކޮށް ކަރަންޓީން ރިލީޒް ސާމްޕަލް ނެގުމަށް ވަނީ ނިންމާފައެވެ. މިގޮތަށް ޢަމަލުކުރެވޭނީ ދުނިޔޭގެ ސިއްހަތު ޖަމިއްޔާއިން ބަލައިގަންނަ ވެކްސިނެއްގެ ދެ ޑޯޒް ފުރިހަމަކޮށް، 14 ދުވަސް ހަމަވެފައިވާ ފަރާތްތަކަށް ކަމަށް މަބްރޫކް ވިދާޅުވިއެވެ.

ވެކްސިންގެ ދެ ޑޯޒް ފުރިހަމަކުރުމުން ދަތުރުކުރުމުގައި ލުއި ދޭން ނިންމާފައިވާއިރު، މި ލުއިތައް މިގޮތަށް ދެވިފައި މިވަނީ މާލެ ސަރަހައްދުގެ ކޮވިޑްގެ ޕޮޒިޓިވިޓީ ރޭޓް ފަސް އިންސައްތައިން ދަށަށް ދިއުމުން ކަމަށް ވެސް މަބްރޫކް ވަނީ ފާހަގަކުރައްވާފައެވެ.