އަޅުގަނޑަށް ދިން ހަމަލާގައި ސަރުކާރުން ބައިވެރިވި ކަމަށް ކުޑަކޮށްވެސް ގަބޫލެއް ނުކުރަން: ރައީސް ނަޝީދު
ސަރުކާރުން އެހަމަލާގައި ބައިވެރިވި ކަމަށް ދެކެން އަޅުގަނޑަށް ވަރަށް ބޮޑަށް އުނދަގޫ - ރައީސް ނަޝީދު
ރައީސް މުހައްމަދު ނަޝީދު ޖަރުމަންވިލާތުގައި
މެއި މަހުގެ 6 ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް، އަދި އެމްޑީޕީގެ ރައީސް، ރައީސް މުހައްމަދު ނަޝީދު އަވަހާރަކޮށްލުމަށް ދިން ހަމަލާގައި ސަރުކާރުގެ ބައިވެރިވުމެއް އޮވެދާނެކަމަށް ކުޑަކޮށްވެސް ގަބޫލުނުކުރައްވާ ކަަމަށް އެމަނިކުފާނު ވިދާޅުވެއްޖެއެވެ.
އާސްކު ސްޕީކަރ ގެ ތިން ވަނަ ޕްރޮގްރާމްގައި އެހަމަލާ ދިނީ ސަރުކާރުގެ ތެރެއިން ކަމަށް ގަބޫލުކުރައްވަންތޯ މީހަކު ކުރި ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ މިވަގުތު ރާއްޖޭގެ ރައީސަކަށް ހުންނެވީ އެމަނިކުފާނުގެ ޕާޓީގެ ބޭފުޅެއްކަމަށެވެ. އަދި ރައްޔިތުންގެ މަޖިލީހުގެ އަޣްލަބިއްޔަތު އޮތީ އެމަނިކުފާނުގެ ޕާޓީއަށް ކަމަށް ވިދާޅުވިއެވެ.
ރައީސް ނަޝީދު ވިދާޅުވީ ތަހުގީގު ނިމޭއިރު ބޮން ގޮއްވާލުމުގައި ބައިވެރިވި ހަތަރު މީހުން އެއީ މިކަމުގައި ޝާމިލްވާ މީހުން ކަމުގައިނުވާނެ ކަމަށެވެ. މިކަން ރޭވުމުގައި ބައިވެރިވި މީހުންނާއި އަދި ޚަރަދު ކުރުމުގައި ބައިވެރިވި މީހުންވެސް އެނގެންޖެހޭނެ ކަމަށް ވިދާޅުވިއެވެ. އަދި ތަހުގީގަށް ފެންނަ ކަންކަން އެއީ ހަގީގަތަކަށް ވެގެންދާނެ ކަންކަން ކަމަށް ވިދާޅުވިއެވެ.
ހޯމް މިނިސްޓަރ ކަމުގައި އިމްރާން ހުންނަވާ އެމަނިކުފާނަށް އިންސާފު ލިބިދާނެތޯ ކުރި ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ އިންސާފަކީ ވަރަށް އުނދަގޫ އެއްޗެއްގެ ގޮތުގައި ފެނިވަޑައިގަންނަވާ ކަމަށެވެ. މީގެކުރިންވެސް އެކި އަނިޔާތައް ލިބިވަޑައިގަންނަވާފައިވާކަން ފާހަގަކުރައްވާ ރައީސް ނަޝީދު ވިދާޅުވީ އެކި ތުހުމަތުތަކުގައި ޖަލުގައިވެސް ގިނަ ދުވަސްތަކެއް ހޭދަކުރައްވަން ޖެހިވަޑައިގެންނެވިކަމަށެވެ.
ރައީސް ނަޝީދު ވިދާޅުވީ ފުލުހުން ކުރިޔަށްގެންދާ ތަހުގީގު ރަނގަޅަށް ހިނގަންޖެހޭނެކަމަށާއި އެތަހުގީގު އެކަންކަން ހޯދެންޖެހޭނެކަމަށެވެ.
