އުމުރުން 18 އަހަރުން މަތީގެ ހުރިހާ އެންމެންނަށް ވެކްސިން ޖެހުމުގެ ފުރުސަތު އިނގިރޭސިވިލާތުން ހުޅުވާލައިފިއެވެ.

އެ ޤައުމުގެ ހެލްތް ސަރވިސަސް އިން ބުނެފައިވަނީ މިއީ ބޮޑެތި މީހުންނަށް ވެކްސިން ދިނުމަށްޓަކައި ފަށާ މަސައްކަތުގައި ނެގޭ ވަރަށް ބޮޑު ފިޔަވަޅެއް ކަމަށެވެ. އިނގިރޭސިވިލާތުގެ ބޮޑުވަޒީރު ބޮރިސް ޖޮންސަން ވަނީ އެ ޤައުމުގައި ކޮވިޑުގެ ކޭސްތައް އިތުރުވުމާ ގުޅިގެން ކޮށްފައިވާ ލޮކްޑައުން ޖުލައި 19 އާހަމައަށް ދަމަހައްޓާފައެވެ.

އިނގިރޭސިވިލާތުން ވެކްސިންގެ ފުރަތަމަ ޑޯޒް 42 މިލިއަނަށްވުރެން ގިނަ މީހުންނަށް ދީފައިވާފައިވެއެވެ.

އިނގިރޭސިވިލާތުގައި މެއި މަހުން ފެށިގެން ކޮވިޑް-19ގެ ހާލަތު ގޯސްވެފައިވާއިރު ކޭސްތައް އިތުރުވުމުގެ 50 އިންސައްތަ ހިއްސާކުރަނީ އިންޑިޔާއިން ފެނިފައިވާ ޑެލްޓާ ވޭރިއަންޓު ކަމަށް އެގައުމުގައި ކުރިޔަށް ގެންދިޔަ ދިރާސާއަކުން ހާމަވެއްޖެއެވެ.

ލަންޑަންގެ އިމްޕީރިއަލް ކޮލެޖުން ކުރިޔަށްގެންދިޔަ މި ދިރާސާއަކީ ގިނަ އަދަދެއްގެ ސާމްޕަލްތަކެއް ބޭނުންކޮށްގެން ކުރިޔަށްގެންގޮސްފައިވާ ދިރާސާއެކެވެ. ދިރާސާގެ ނަތީޖާ ބުރާސްފަތި ދުވަހު ވަނީ ހާމަކޮށްފައެވެ. އޭގެކުރިން އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވަނީ، ކޮވިޑު-19ން ރައްކާތެރިވުމަށް އެގައުމުގައި އަޅާފައިވާ ފިޔަވަޅުތައް އަންނަ ޖުލައި މަހުގެ 19ވަނަ ދުވަހާ ހަމައަށް ދަމަހައްޓަވާނެކަމަށް ވިދާޅުވެފައެވެ.

އިނގިރޭސިވިލާތުގެ ސަރުކާރުން ބުނެފައިވަނީ ފިޔަވަޅުތަކަށް ލުއިދިނުން ފަސްކުރެއްވުމަށް ބޮޑުވަޒީރު ނިންމެވި ނިންމެވުމަށް މި ދިރާސާގެ ނަތީޖާ ބާރުދޭކަމަށެވެ.

މެއި މަހުގެ 20 ވަނަ ދުވަހުން ފެށިގެން ޖޫން މަހުގެ 7 ވަނަ ދުވަހާ ހަމައަށް ކުރިޔަށްގެންދިޔަ ދިރާސާއިން ދައްކާގޮތުގައި އެ މުއްދަތުގައި ވައިރަސް ފެތުރޭ މިންވަރު ހުރީ 0.15 އިންސައްތައިގައެވެ. އޭގެކުރިން އޭޕްރީލް މަހުގެ ފަހުކޮޅުން ފެށިގެން މެއި މަހުގެ ކުރީކޮޅާ ހަމައަށް ކުރިޔަށްގެންދިޔަ ދިރާސާގައި އެއަދަދު ހުރީ 0.10 އިންސައްތައިގައެވެ.

ލަންޑަންގެ އިމްޕީރިއަލް ކޮލެޖްގެ އިންފެކްޝިއަސް ޑިޒީސް ޕްރޮފެސަރ އެއްކަމުގައިވާ ސްޓީވެން ރިލޭ ވިދާޅުވީ ވައިރަސް ފެތުރޭ މިންވަރު އަންނަނީ ހަލުވިކަމާއެކު އިތުރުވަމުން ކަމަށެވެ. ވަކިން ޚާއްސަކޮށް ޒުވާނުންގެ މެދުގައި ވައިރަސް ޖެހޭ މިންވަރު އަންނަނީ އިތުރުވަމުން ކަމަށާއި، އަދި ކޭސްތައް ދެ ގުނަ ވުމަށް ނަގަނީ 11 ދުވަހުގެ މުއްދަތެއްކަމަށެވެ.

މިދިރާސާއަކީ އިނގިރޭސިވިލާތުގައި އެންމެ ގިނަ މީހުން ބައިވެރިކޮށްގެން ކުރިޔަށްގެންދިޔަ ދިރާސާއެވެ. މިދިރާސާގެ ބޭނުމަށް 109،000 ވޮލަންޓިއަރުން ވަނީ ޓެސްޓްކޮށްފައެވެ.

ޕްރޮފެސަރ ވިދާޅުވީ ގިނަ އަދަދެއްގެ ބަޔަކަށް ވެކްސިން ދެމުންދާތީ ވައިރަސް މިހާރު ފެތުރެމުންދާ މިންވަރު އިތުރުވަމުންދާ ދިޔުން ދަށަށްދާނެ ދުވަހެއް ކަނޑައަޅަން އުނދަގޫކަމަށެވެ. އެހެންނަމަވެސް ގިނަ އަދަދެއްގެ ޒުވާނުންނަށް މިހާރު ވެކްސިން ދެމުންދާތީ ވައިރަސް ފެތުރެމުންދާ މިންވަރު ދަށަށްދާންވާނެ ކަމަށް ވިދާޅުވިއެވެ.

ވެކްސިންގެ އެއް ޑޯޒް ޖަހާފައިވާ މީހުންނަށް ޑެލްޓާ ވޭރިއަންޓުން ކުރާ އަސަރު ބޮޑުކަން ވަނީ ހާމަވެފައެވެ. ނަމަވެސް ދެ ޑޯޒް ޖަހާ މީހުންގެ ހާލަތު ދަށަށް ދިޔުމުން ރައްކާތެރިކޮށްދޭކަމަށް މިހާތަނަށް ހޯދުނު ހޯދުންތަކުން ވަނީ އެނގިފައެވެ.

އިނގިރޭސިވިލާތުގައި އިންޑިޔާގެ ޑެލްޓާ ވޭރިއަންޓް ފެތުރެމުން އަންނައިރު، ކުރިން އެގައުމުން ފެނުނު އަލްފާ ވޭރިއަންޓް ދިޔައީ އެގައުމުގައި ފެތުރެމުންނެވެ. މި ވޭރިއަންޓްތަކަކީ ވައިރަސް ފެތުރޭ މިންވަރު ވެސް ހަލުވި ވޭރިއަންޓްތަކެކެވެ.