މާލެ ހެންވޭރު ގެއެއްގެ ތިންވަނަ ފަންގިފިލާއިން މީހަކު ވެއްޓިއްޖެއެވެ.
ފުލުހުން ބުނީ ހެންވޭރު ގެއެއްގެ ތިންވަނަ ފަންގިފިލާއިން ވެއްޓުނު މީހަކަށް އޭޑިކޭ ހޮސްޕިޓަލުގައި ފަރުވާދެމުން އަންނަ ކަމަށެވެ. އަދި ވެއްޓިފައިވަނީ ދިވެހި އަންހެނެއް ކަމަށެވެ. އެކަމަކު މި އަންހެން މީހާއަށް ލިބިފައިވާ އަނިޔާގެ ތަފުސީލު ވަނީ ލިބޭ ގޮތް ނުވެފައެވެ.
މި ހާދިސާގެ މައުލޫމާތު ފުލުހުންނަށް ލިބިފައިވަނީ ބުދަ ދުވަހުގެ ރޭ 12:39 ހާއިރުއެވެ. އަދި މި ހާދިސާއާ ގުޅޭ ގޮތުން އިތުރަށް ބަލަން ޖެހޭ ކަންކަން ފުލުހުން ދަނީ ބަލަމުންނެވެ.
ހެންވޭރު ގެއެއްގެ ތިންވަނަ ފަންގިފިލާއިން އަންހެނަކު ވެއްޓިފައިވާއިރު، މިދިޔަ މަހު މ. އިތާ ގޯޅީގައި ހުންނަ ގެއެއްގެ ފަސްވަނަ ފަންގިފިލާއިން ދިވެހި ފިރިހެނަކު ވެއްޓި އަނިޔާވެފައިވެއެވެ. އަދި ހުޅުމާލޭގައިވެސް މިފަދަ ހާދިސާއެއް ހިނގާ 21 އަހަރުގެ ޒުވާނަކަށް އަނިޔާވެފައިވެއެވެ. އަދި އޭނާ ހޮސްޕިޓަލަށް ގެންދިޔައިރު ހޭވެރިކަންވެސް ނެތް ކަމަށް ފުލުހުން އޭރު ބުންޏެވެ.
