މިނިސްޓަރ އަސްލަމް ވިދާޅުވީ ހިސާބުތައް ދޮގެއް ނަހަދާނެ ކަމަށް
16 ޖޫން 2021 | ބުދަ 12:052018 ވަނަ އަހަރު ޖަހާފައި ހުރި ހިސާބުތަކަކީ އެއްވެސް ވަރަކަށް ލޯން ދައްކާނެ ގޮތަށް ބަލައިގެން ޖަހާފައި ހުރި ހިސާބުތަކެއް ނޫން
ހިޔާ ފްލެޓް މަޝްރޫޢާ ގުޅޭގޮތުން ބޭއްވި ނޫސްވެރިންގެ ބައްދަލުވުމުގެ ތެރެއިން
ރަނގަޅު ހިސާބު ޖެހީމަ އަންނާނީ ރަނގަޅު އަދަދު ކަމަށާއި، ހިސާބު ދޮގެއް ނަހަދާނެ ކަމަށް މިނިސްޓަރ އޮފް ނޭޝަނަލް ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ހިޔާ ފްލެޓްގެ އަގުތަކާ ގުޅޭ ގޮތުން ހައުސިންގ މިނިސްޓްރީއާ މާލެ ސިޓީ ކައުންސިލާއެކު ކުރިއަށްގެންދިޔަ ފުރަތަމަ ބައްދަލުވުމަށްފަހު ނޫސްވެރިންނާ ބައްދަލު ކުރައްވައި މިނިސްޓަރ ވިދާޅުވީ، ސަރުކާރުން މިހާރު ކަނޑައަޅާފައިވާ އަގަކީ ހިޔާ ފްލެޓްތަކުގެ އަގު އެންމެ ކުޑަކުރެވޭނެ ވަރަކީ ކޮބައިތޯ ބަލައި ކުރެވުނު މަސައްކަތުން ކުޑަކުރެވެން އޮތް އެންމެ ކުޑަ އަދަދު ކަމަށެވެ. ކުރީގެ ސަރުކާރުން ހިޔާ ފްލެޓް ތަކުގެ އަގު ހެދިއިރު އެކަން ކުރި ގޮތް ރަނގަޅު ނޫން ކަމަށް މިނިސްޓަރ ތަކުރާރުކޮށް ވިދާޅުވެ އެކަން ތަފްސީލް ކޮށްދެއްވިއެވެ.
މިނިސްޓަރ ވިދާޅުވީ، 2018 ވަނަ އަހަރު ޖަހާފައި ހުރި ހިސާބުތަކަކީ އެއްވެސް ވަރަކަށް ލޯން ދައްކާނެ ގޮތަށް ބަލައިގެން ޖަހާފައި ހުރި ހިސާބުތަކެއް ނޫން ކަމަށެވެ. އޭރު އަގު ހަދާފައި ހުރީ ވަރަށް ސިމްޕަލްކޮށް، ކޮންސްޓްރަކްޝަން ކޮސްޓަށް އަންނަ އަދަދަށް 8 އިންސައްތަ އެއްކުރައްވައިގެން ހަދާފައި އޮތް ހިސާބެެއް ކަމަށެވެ.
އެހެން ނަމަވެސް އީއެމްއައި ހިސާބު ޖައްސަވާ ފޯމިއުލާ ބޭނުން ކުރެއްވުމުން، ކުރީ ސަރުކާރުން ވިދާޅުވާ އަދަދު ނާންނަ ކަމަށް ވިދާޅުވިއެވެ. މިނިސްޓަރ ވިދާޅުވީ، ޔުނިޓް ތަކުގެ ކުއްޔާއި ވިޔަފާރިތަކަށް ދޫކޮށްފައި ހުރި ތަންތަނުން ލިބޭ އެއްޗަކުން، ދައުލަތުން މިކަމަށް ނަގާފައި އޮތް ލޯން ކޮންމެ ހަމަހަކުން އެއް މަހު އަނބުރާ ދައްކަން ބޭނުންވާ ލާރި އެބަ ލިބެން ޖެހޭ ކަމަށެވެ.
އެހެން ކަމުން ކޮންސްޓްރަކްޝަން ޕީރިއަޑްގައި ދިޔަ އިންޓަރެސްޓް ރޭޓާއި، ކޮންސްޓްރަކްޝަނަށް ދިޔަ އަގާ އެއްކޮށް، އެ ދެއަގު އެއްކޮށްގެން އީއެމްއައިއަށް ދައްކަންޖެހޭ ވަރު ބެލުމަށްފަހު، ޔުނިޓް ތަކުގެ އަގު ކަނޑައަޅަން ސަރުކާރުން ފަހުން ނިންމެވީ ކަމަަށެވެ.
އަދި މިހާރު ހަދާފައި އެއޮތް އަގުގައި ބިމުގެ އަގާއި އެހެން ސަރވިސްތަކަށް ލާންޖެހޭ އަގެއްވެސް ނުހިމަނާ، ލޯން ދައްކަންޖެހޭ މުއްދަތުގައި އެއަރާ އިންޓަރެސްޓްވެސް މިހާރު ހަދާފައި އޮތް އަގުގެ ތެރޭގައި ނުހިމެނޭ ކަމަށެވެ.
ފްލެޓް ދޫކޮށްލެވޭނެ އެއްމެ ކުޑަ އަގަކީ 7،500 ރުފިޔާ ކަމަށް މި ސަރުކާރުންވަނީ ކަނޑައަޅާފައެވެ. ކުރީގެ ސަރުކާރުން ފްލެޓްގެ އަގުގެ ގޮތުގައި ކަނޑައަޅާފައި އޮތީ، 5600 ރުފިޔާއެވެ.
މިނިސްޓަރގެ ވާހަތައް މާލެ ސިޓީ ކައުންސިލްގެ މޭޔަރ ޑރ މުހައްމަދު މުޢިއްޒު ދޮގުކުރެއްވިއެވެ. މުޢިއްޒު ވިދާޅުވީ، އޭރުވެސް ހިސާބު ޖެއްސެވީ، ކަމާ ގުޅުންހުރި ބޭފުޅުންނާ އެކު މަޝްވަރާ ކުރެއްވުމަށްފަހު ކަމަށެވެ.
ބުދަ ދުވަހުގެ ބައްދަލުވުމުގައި، އެޗްޑީސީން މިހާރު އަގު ހަދާފައި އޮތްގޮތް މޭޔަރ ޑރ މުޙައްމަދު މުޢިއްޒު ބޭނުންވާތީ، އެ ހިސާބުތައް ކައުންސިލާ ހިއްސާ ކުރަން ހައުސިން މިނިސްޓްރީންވަނީ ނިންމާފައެވެ. މޭޔަރ ވިދާޅުވީ ހިސާބުތައް ބައްލަވާފައި ވެރިފިކޭޝަން ހެދުމަށްފަހުވެސް އުންމީދަކީ ކުރިން ހިޔާ ފްލެޓްތަކުގެ އަގުއޮތް އަދަދާ ދާދި އެއްވަރުގެ އަދަދަކަށް ބަދަލުވުން ކަމަށެވެ.
ހިޔާ މަޝްރޫއުގެ ތެރެއިން ފްލެޓް ލިބުނު މީހުންނާއެކު އަންނަ މަހުގެ 14 ވަނަ ދުވަހު އެއްބަސްވުންތަކުގައި ސޮއި ކުރަން މިހާރު ދަނީ ތައްޔާރުވަމުންނެވެ. އަދި މިއަހަރުގެ ތެރޭގައި ފްލެޓްތަކަށް މީހުންނަށް ވަދެވޭ ވަރަށް ތަން ނިންމުމުގެ މަސައްކަތް ދަނީ ކުރަމުންނެވެ.
