އިސްލާހުގެ މަގްސަދަކީ، ދީނީ އެއްބައިވަންތަކަން އިތުރަށް ދެމެހެއްޓުން
ތުޅާދު ދާއިރާގެ މެމްބަރު ހިސާން ހުސައިން
ނަފްރަތުގެ ބިލަކީ އިސްލާމްދީން ނައްތާލުމަށް ނުވަތަ ޣައިރު ދީންތަކަށް ފުރުސަތުދިނުމުގެ މަގްސަދުގައި ހުށަހަޅައިގެން އުޅޭ ބިލެއް ކަމަށް ބުނުމަކީ ދީނީ ގޮތުން ވެސް އަދި ބުއްދީ ގެ ހަމަތަކުން ވެސް ބަލައިގަނެވޭނެ ކަމެއް ނޫން ކަމަށް ތުޅާދު ދާއިރާގެ މެމްބަރު ހިސާން ހުސައިން ވިދާޅުވެއްޖެއެވެ.
އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުމަކީ ކުށެއް ކަމަށް ކަނޑައެޅުމަށް ގާނޫނުލްއުގޫބާތަށް ހުށަހެޅި އިސްލާހު ހުށަހަޅުއްވަމުން ހިސާން ވިދާޅުވީ އެންމެ ގިނަ ބަޔަކު ކުރާ ސުވާލަކީ ސަރުކާރުގެ ފަރާތުން ހުށަހަޅާ މި ބިލު ސްޕޮންސަރ ކުރީ ކީއްވެގެން ތޯ އަހާ ސުވާލު ކަމަށެވެ. އަދި ޖަވާބު ވަރަށް ސާފު ކަމަށާއި، ދަސްވެފައި އޮތީ އިންސާނާގެ ލޭ އެއީ ހުރުމަތްތެރިވެގެންވާ އެއްޗެއް ކަން ކަމަށެެވެ. އަދި މީހަކު މަރަން ގޮވައިގެން ނުވާނެ ކަމަށާއި މީހަކު ނުރައްކަލަކަށް ހުށަހެޅިގެންދާނެ ފަދަ އަމަލެއް ކޮށްގެން ނުވާނެ ކަން ދަސްވެފައިވާ ކަމަށެވެ. ހިސާން ވަނީ މިކަންކަން ހުއްދަ ކުރާނީ ކޮން މުޖްތަމައުއެއްގައިތޯ ސުވާލު އުފައްދަވާފައެވެ.
ހިސާން ވިދާޅުވީ ދައުލަތުގެ ސިފައިގައި މަސައްކަތް ކުރަނީ ތަރުތީބުވެފައިވާ އިޖުރާތުތަކުގެ ތެރެއިން ކަމަށް ވިދާޅުވިއެވެ. އިތުރަށް ވާހަކަ ދައްކަވަމުން ހިސާން ވިދާޅުވީ ގާނޫނު އަސާސީގެ ތަރަހައިގެ ތެރޭގައި، އެ އިޖުރާތުތަކުގެ ތެރެއިން، ކުށް ކަޑައެޅުމާއި، ކުށްވެރިކުރުމާއި، ކުށުގެ މައްސަލަ ބެލުން، އެއީ ދައުލަތުން ކުރާ މަސައްކަތެއް ކަމަށެވެ. އެ ކަންކަން ކުރަން ރައްޔިތުންގެ އަތްމައްޗަށް ދޫކޮށްލުންވާނީ، ނިޒާމް ގެއްލި، ގާނޫނު އަތްމައްޗަށް ނަގައި، މުޅި މުޖްތަމައުގެ އަމަންއަމާންކަން ގެއްލިގެން ދާނެކަމަކަށް ކަމަށް ވެސް ފާހަގަ ކުރެއްވިއެވެ.
އަދި އެއްވެސް ދިވެއްސަކަށް ހަގީގަތެއް އޮޅުވައެއް ނުލެވޭނެ ކަމަށާއި، އިސްލާމް ދީނަށް ހަޖޫޖެހުން ހުއްދައެއް ނޫން ކަމަށެވެ. އިސްލާމްދީނަށް ފުރައްސާރަ ނުކުރެވޭނެ ކަމަށާއި އިސްލާމްދީނަށް ކުޑައިމީސް ބަހެއް ވެސް ނުބުނެވޭނެ ކަމަށެެވެ.
ހިސާން ވިދާޅުވީ އެކަން އިތުރަށް ހަރުދަނާ ކުރުމުގެ ގޮތުން ގަނޫނުލް އުގޫބާތަށް ސަރުކާރުން ހުށަހަޅާ އިސްލާހަކީ ސޯޝަލް މީޑިއާ ނުވަތަ އިންޓަނެޓް ބޭނުންކޮށްގެން އިސްލާމް ދީނަށް ތައުހީނު ކުރުމުގެ ނިޔަތުގައި އިސްލާމް ދީނަށް ފުރައްސާރައަކަށް ވެދާނޭ ފަދަ އެއްޗެއް ބުނުމަކީ ކުށެއްކަމަށް އެ މާއްދާގައި ހިމެނުން ކަމަށެވެ.
އަދިި ޝަރުއީ އުސޫލްތަކާ އެއްގޮތަށް މެނުވީ ބައެއްކަހަލަ ތުހުމަތު އެއީ މީހެއްގެ މައްޗަށް ކުރެވޭނެ ތުހުމަތުތަކެއް ނޫން ކަމަށް ވިދާޅުވެ ހިސާން ވިދާޅުވީ މިސާލަކަށް ހަމަ ހުރެފައި މީހަކާ ދިމާއަށް އޭނާއަކީ ޒިނޭ ކުރާ މީހެކޭ ނުބުނެވޭނެ ކަމަށެވެ. ހަމަ އެގޮތަށް މުސްލިމަކީ ކާފަރެކޭ ވެސް ނުބުނެވޭނެ ކަމަށެވެ. ވަކި މީހަކަށް ތުހުމަތު ކޮށް އޭނާ އަކީ ކާފަރެއް ކަމަށް، ލާދީނީ މީހެއް ކަމަށް ތުހުމަތުކޮށް އެގޮތަށް ލޭބަލް ކުރުމަކީ ނުރައްކާތެރި ކަމެއް ކަމަށް ވެސް ހިސާން ވިދާޅުވިއެވެ. އަދި އެއީ މާތްވެެގެންވާ އިސްލާމްދީނުގައި ކަނޑައެޅިގެން ނަހީކޮށްފައިވާ ކަމެއް ކަން ފާހަގަ ކުރެއްވިއެވެ.
ހިސާން ވަނީ ރަސޫލު ޒަމާނުގައި ހިނގާފައިވާ މިފަދަ އިތުރު ހާދިސާތަކުގެ ވާހަކަ ވެސް ހިއްސާ ކުރައްވާފައެވެ.
ހިސާން ވިދާޅުވީ މި ބިލުގެ ހަގީގަތް އޮޅުވާލަން ބަޔަކު މަސައްކަތް ކޮށްފި ކަމަށެވެ. އަދި ހުށަހެޅިފައިވާ އިސްލާހަކީ އުސާމަތުގެފާނުގެ ހާދިސާއިން ވިސްނުން ނަގައިގެން ފަރުމާކޮށްފައިވާ ބިލެއް ކަމަށާއި މި ބިލު ފަރުމާކުރުމުގައި ހަމަ ޔަގީނުން ވެސް ބަލާފައިވަނީ ހަމައެކަނި ދުނިޔޭގެ ޑިމޮކްރެޓިކް ނިޒާމުތަކަކަށް ނޫން ކަމަށެވެ.
ހިސާން ވިދާޅުވީ މި ބިލުން އުފައްދާ ކުށަކީ ނަފްރަތު އުފެއްދުން ކަމަށާ އެއީ ހަމައެކަނި ދީނާ ގުޅުވައިގެނެއް ނޫން ކަމަށެވެ. އެގޮތުން އެމީހާ އުފަންވި ގައުމަށް، ހަމުގެ ކުލައަށް، ޖިންސަށް ނުވަތަ ނަސްލަށް ބަލައިގެންވިޔަސް މީހަކާމެދު ނަފްރަތު އުފެއްދުން މި ބިލުން މަނާކުރާނެ ކަމަށެވެ. އަދި ވަކި މީހަކީ ކާފަރެއްކަމަށް ބުނުމަކީ އިސްލާމީ މުޖްތަމައުގައި އެމީހަކާ މެދު ނަފްރަތު އުފެދޭނެ ކަމެއް ކަމަށާއި ފާއިތުވި ތަނުގައި އެކަމުގެ ތަޖުރިބާ މިގައުމުން ކޮށްފި ކަމަށެވެ.
މީގެ އިތުރުން މީހެއްގެ މައްޗަށް އެފަދަ ތުހުމަތެއް ކުރެވޭނަމަ އެކަން އިދާރާތަކަށް ހުށަހަޅައި ޖިނާއީ އަދުލުގެ ނިޒާމުގެ ތެރެއިން އިންސާފު ލިބުމަށް މި ބިލު ހިތްވަރުދޭނެ ކަމަށް ވިދާޅުވިއެވެ. އަދި ނުރަނގަޅު މަގަކުން މީހަކު ދާނަމަ ނުވަތަ މީހެއްގެ އަގީދާ ބަލިކަށި ވެއްޖެނަމަ އެކަން ފާހަގަކޮށް އެމީހަކަށް ހެޔޮ ނަސޭހަތްދިނުން މި ބިލު މަނާ ނުކުރާ ކަމަށް ހިސާން ފާހަގަ ކުރެއްވިއެވެ.
އަދި މުންކަރާތްތަކަށް އަރައިނުގަތުމަށް އާންމުކޮށް ނަސޭހަތް ދިނުމެއް ވެސް މި ބިލު މަނާ ނުކުރާ ކަމަށާއި އެކަންކަން މަނާ ކުރުމަކީ މި ބިލުގެ މަގްސަދެއް ވެސް ނޫން ކަމަށެވެ. ހިސާން ވަނީ އެފަދަ މާނައެއް ދޭހަވާ އިބާރާތެއް ބިލުގައި އޮތްކަމަށް ވާނަމަ ކޮމިޓީ މަރުހަލާގައި އިސްލާހު ކުރުމަށް އެދިފައެވެ.
