އޮޕަރޭޝަނުގެ ތެރޭގައި ޖަލުގައި ހަމަނުޖެހުމެއް ނުހިނގާ: ފުލުހުން

ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދަށް ދިން ހަމަލާއާ ގުޅިގެން ޖަލުތަކުގައި ހިންގަމުންދާ އޮޕަރޭޝަން ތެރެއިން އެއްވެސް ހަމަނުޖެހުމެއް ހިނގާފައި ނުވާ ކަމަށް ފުލުހުން ބުނެފިއެވެ.

މާލެ ޖަލާއި މާފުށީ ޖަލުގައި ހިންގަމުންދާ އޮޕަރޭޝަންގެ ތެރެއިން މާފުށީ ޖަލުގައި ހަމަނުޖެހުމެއް ހިނގައި ފަސް މީހަކަށް އެކި ވަރުގެ އަނިޔާވެފައިވާ ކަމުގެ އަޑުތައް ވަނީ ސޯޝަލް މީޑިއާގައި ފެތުރިފައެވެ. އަދި ފުލުހުން ޓީޒަރ ގަން ބޭނުންކުރާ ކަމުގެ އަޑުތައް ވެސް ފެތުރިފައިވެއެވެ.

އެކަމަކު ފުލުހުން ވަނީ އެ ހުރިހާ ކަމެއް ދޮގުކޮށްފައެވެ. ފުލުހުން ބުނީ ޖަލުގައި ޓީޒަރ ގަން ބޭނުން ނުކުރާ ކަމަށާއި އެއްވެސް ހަމަނުޖެހުމެއް ވެސް ހިނގާފައި ނުވާ ކަމަށެވެ.

ރައީސް ނަޝީދަށް އަމާޒުކޮށް ދެވުނު ޓެރަރިޒަމްގެ ހަމަލާއާއި ހަރުކަށި ފިކުރާ ދެކޮޅަށް ފުލުހުންނާއި ސިފައިން ގެންދަނީ ޚާއްސަ އޮޕަރޭޝަންތަކެއް ހިންގަމުނެވެ. އެގޮތުން މިހާތަނަށް އަތޮޅުތެރޭގައި ވެސް އެކި އޮޕަރޭޝަންތައް ހިންގާފައިވާއިރު މާލެއާއި މާފުށީ ޖަލުގައި ކުރިއަށްގެންދާ ޚާއްސަ މި އޮޕަރޭޝަނަކީ، ފުލުހުންނާއި ސިފައިން ހިންގަމުންދާ އެހެނިހެން އޮޕަރޭޝަންތަކާ ގުޅިގެން، ކުރިއަށް ގެންދެވޭ އޮޕަރޭޝަނެއް ކަމަށް މޯލްޑިވްސް ކަރެކްޝަނަލް ސާވިސް އިން މައުލޫމާތުދެއެވެ. އެނގިފައިވާގޮތުގައި މި އޮޕަރޭޝަންގައި 300ށް ވުރެ ގިނަ ފުލުހުން ހަރަކާތްތެރިވެއެވެ.