ކަސްޓަމަރުން ހޭލުންތެރި ކުރުވުމަށް ޓިކްޓޮކްގައި ބީއެމްއެލްގެ "ސަމާލުވޭ" ވީޑިއޯ މުބާރާތް

ކަސްޓަމަރުން ހޭލުންތެރިކުރުވުމަށް ބޭންކް އޮފް މޯލްޑިވްސް އިން ޓިކްޓޮކް ވީޑިއޯ މުބާރާތެއް ހުޅުވާލައިފިއެވެ.

ބީއެމްއެލްއިން ބުނީ "ސަމާލުވޭ" ކެމްޕެއިންގެ ދަށުން، އެކުންފުނިން ޓިކްޓޮކްގައި ވީޑިއޯ މުބާރާތެއް ފަށާފައިވާ ކަމަށެވެ.

މިއީ މަކަރާ ހީލަތުން މީހުންގެ އަތުން ފައިސާ ހޯދުމަށް ހިންގާ ޖަރީމާތަށް ކަސްޓަމަރުން ހޭލުންތެރި ކުރުވުމަށްޓަކައި ކުރިއަށް ގެންދާ މުބާރާތެކެވެ.

އާންމުންނަށް ބައިވެރިވެވޭ ގޮތަށް ބާއްވާ މުބާރާތެއް ކަމަށާއި، މުބާރާތް ކުރިއަށް ގެންދާނީ 07 ޖޫން އިން ފެށިގެން ހަތަރު ހަފްތާގެ މުއްދަތަށެވެ.

މި މުބާރާތަށް ހުށަހަޅާ ވީޑިއޯ އަކީ މިފަދަ ކަންކަމާ ގުޅޭ ގޮތުން ހޭލުންތެރިކުރުމުގެ މެސެޖެއް ހިމެނޭ ވީޑިއޯއަކަށް ވާންވާނެ ކަމަށާއި، ވީޑިއޯގެ ދިގުމިން ހުންނަންވާނީ އެންމެ ދިގުވެގެން 60 ސިކުންތަށް ކަމަށް ބީއެމްއެލް އިން ބުނެއެވެ.

މި މުބާރާތުގެ އެކި ވަނަ ވަނައަށް އަންނަ ފަރާތްތަކަށް އިނާމު ކަނޑައަޅާފައިވާއިރު، ކޮންމެ ހަފްތާއަކުވެސް ހުށަހަޅާ ވީޑިއޯތަކުގެ ތެރެއިން އެންމެ ގިނަ މީހުން ބެލި ވީޑިއޯ، އެންމެ ގިނަ ލައިކްސް އަދި ޝެއަރސް (ދެބައި އެއްކޮށް) ލިބިފައިވާ ވީޑިއޯގެ އިތުރުން ޖަޖިންގ ޕެނަލް އަށް އެންމެ ކަމުދާ ވީޑިއޯ ހޮވުމަށް ވަނީ ހަމަޖެހިފައެވެ.

މި ގޮތުން  ފުރަތަމަ ތިން ހަފްތާގެ ތެރެއިން ކޮންމެ ހަފްތާއަކުވެސް މި ވަނަ ތަކަށް ހޮވޭ ކޮންމެ ވީޑިއޯ އެއް ހުށަހަޅާ ފަރާތަކަށްވެސް 5000 ރުފިޔާގެ ގިފްޓް ކާޑެއް ދިނުމަށްވަނީ ހަމަޖެހިފައެވެ. އަދި ހަތަރު ވަނަ ހަފްތާގައި ހުށަހަޅާ ވީޑިއޯތަކުގެ ތެރެއިން ވަނަތަކަށް ހޮވޭ ވީޑިއޯތައް ހުށަހަޅާ ފަރާތަކަށް 10،000 ރުފިޔާގެ ގިފްޓް ކާޑެއް ދިނުމަށްވަނީ ހަމަޖެހިފައެވެ.

މުބާރާތާ ބެހޭ އިތުރު މައުލޫމާތު ބޭންކްވެބްސައިޓްއިން ލިބޭނެއެވެ.