އައްޑޫ ސިޓީން މިހާތަނަށް 318 މީހަކު ޕޮޒިޓިވްވެއްޖެއެވެ.
އައްޑޫ އެމަރޖެންސީ އޮޕަރޭޝަންސް ސެންޓަރުން ބުނީ ފާއިތުވި 24 ގަޑިއިރު 292 ސާމްޕަލް ނަގާފައިވާއިރު، އެކަކު ޕޮޒިޓިވްވެ ޖުމްލަ 318ށް އަރާފައިވާ ކަމަށެވެ.
ތަފާސްހިސާބުތައް ދައްކާ ގޮތުން ހިތަދޫއިން 63 މީހުން ، މަރަދޫ-ފޭދޫއިން އެކަކު، ފޭދޫއިން އެކަކު، މީދޫއިން އެކަކު، ހުޅުދޫއިން 7 މީހުން އަދި މަރަދޫއިން 5 މީހަކު ޕޮޒިޓިވްވެފައިވާ ކަމަށެވެ. އެސެންޓަރުން ބުނީ މިހާތަނަށް 238 މީހަކު ބަލިން ރަނގަޅުވެފައިވާ ކަމަށެވެ. ހޮސްޕިޓަލުގައި އެކަކަށް ފަރުވާ ދެމުންދާއިރު، 2 މީހަކު ވަނީ މިބަލީގައި ނިޔާވެފައެވެ.
އައްޑޫ ސިޓީގައި ކޮވިޑް-19 ކޮންޓްރޯލްކުރުމަށް ގިނަ މަސައްކަތްތަކެއް ދަނީ ކުރަމުންނެވެ. އެގޮތުން ބަލީގެ އަލާމާތެއް ފެންނަ ނަމަ ނުވަތަ ޕޮޒިޓިވް ކޭހަކާއި ދިމާވެފައިވާނަމަ ޓެސްޓްކުރުމަށް އިލްތިމާސްކޮށްފައިވެއެވެ. އެގޮތުން މިހާތަނަށް 5740 ސާމްޕަލް ނަގާފައިވާ ކަމަށް އެސެންޓަރުން ބުނެއެވެ.
އައްޑޫ ސިޓީގެ ކައުންސިލުން ބުނީ ގިނަ ފިޔަވަޅުތަކެއް އެޅި ނަމަވެސް ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދިނުމަށް ދަތިނުވާނެ ގޮތަށް އިންތިޒާމްތައް ހަމަޖައްސަމުންދާ ކަމަށެވެ. އަދި އަޅާފައިވާ ފިޔަވަޅުތަކަށް ގިނަ ރައްޔިތުން އަމަލު ކުރަމުންދާ ކަމަށް ކައުންސިލުން ބުނެއެވެ.
އައްޑޫ ސިޓީ ދެވަނަ ފަހަރަށް މޮނިޓަރިންގެ ހާލަތަށް ގެނައީ 1 މެއި ވީ ހޮނިހިރު ދުވަހުގެ ވަގުތެއްގައެވެ. އޭގެފަހުން ކޮންމެ ދުވަހަކު ވެސް އެ ސިޓީން ޕޮޒިޓިވް ކޭސްތައް ރިޕޯޓު ކުރެއެވެ.