ހޮނިހިރު ދުވަހު ރާއްޖެއިން ވެކްސިން ޖަހާފައިވަނީ 1،375 މީހުން
6 ޖޫން 2021 | އާދީއްތަ 18:53ހޮނިހިރު ދުވަހު ވެކްސިންގެ ފުރަތަމަ ޑޯޒު ޖެހީ 415 މީހުން
ކޮވިޑް-19 ވެކްސިން ޖެހުން
ކޮވިޑް-19 އިން ދިފާއުވުމަށް ހޮނިހިރު ދުވަހު 1,375 މީހުން ވެކްސިން ޖަހާފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުގައި، ހޮނިހިރު ދުވަހު ވެކްސިންގެ ފުރަތަމަ ޑޯޒު ޖެހީ 415 މީހުންނެވެ. އަދި ދެވަނަ ޑޯޒު ޖެހީ 960 މީހުންނެވެ. އޭގެ ތެރެއިން މާލެ ސަރަހައްދުން 67 މީހަކު ފުރަތަމަ ޑޯޒު ޖަހާފައިވާއިރު 289 މީހަކު ވަނީ ދެވަނަ ޑޯޒު ޖަހާފައެވެ. އަދި އަތޮޅުތެރެއިން 348 މީހުން ފުރަތަމަ ޑޯޒު ޖެހިއިރު ދެވަނަ ޑޯޒު ޖެހީ 671 މީހުންނެވެ.
މިއާއެކު ރާއްޖޭގައި ކޮވިޑް ވެކްސިންޖެހި މީހުންގެ އަދަދު ވަނީ 311،740ށް އަރާފައެވެ. އޭގެ ތެރެއިން ދެވަނަ ޑޯޒް ޖަހާފައިވަނީ 172،263 މީހުންނެވެ.
ރާއްޖޭގައި މިހާރު ޖަހަމުން އަންނަނީ ކޮވިޝީލްޑް ވެކްސިނާއި، ފައިޒަރ ވެކްސިން، އަދި ސިނޮފަރމް ވެކްސިނެވެ. މީގެތެރެއިން ކޮވިޝީލްޑް ވެކްސިންގެ ދެވަނަ ޑޯޒް ޖެހުން މާލެ ސަރަހައްދުގައި މެއި މަހުގެ 2 ވަނަ ދުވަހުން ފެށިގެން ވަނީ މެދުކަނޑާލާފައެވެ.
ރާއްޖެއިން ރަޝިޔާގެ ސްޕަޓްނިކްވީ ވެކްސިން ގެނައުމަށް މަސައްކަތް ކުރަމުން އަންނައިރު، އެސްޓްރަޒެނިކާ ވެކްސިން ގެނައުމަށް ވެފައިވާ އެއްބަސްވުމުގެ ދަށުން ދެ ލައްކަ ޑޯޒް މިމަހުގެ ފަހުކޮޅު ލިބޭނެކަމަށް ހެލްތު މިނިސްޓަރ އަހުމަދު ނަސީމް ވަނީ ވިދާޅުވެފައެވެ. ރާއްޖެއިން ވަނީ އެސްޓްރަޒެނިކާ ވެކްސިންގެ ހަތް ލައްކަ ޑޯޒް ގަތުމަށް ފައިސާ ދައްކާފައެވެ.
މީގެއިތުރުން އެމެރިކާ އާއި ކެނެޑާއިން ވަނީ ރާއްޖެއަށް ވެކްސިން ފޯރުކޮށްދޭނެކަމަށް ބުނެފައެވެ.
