ޔޫރޯގެ މަރުގެ ގްރޫޕުގައި ޕޯޗުގަލް، ފްރާންސް އަދި ޖަރުމަން

މި އަހަރު ބާއްވާ ޔޫރޯ ފުޓްބޯޅަ މުބާރާތުގައި އެންމެ ފާހަގަކޮށްލެވޭ ގްރޫޕަކީ ގްރޫޕް އެފްއެވެ. އެގޮތުން އެ ގްރޫޕުގައި ހިމެނެނީ އެންމެ ފަހުގެ ޗެމްޕިއަން ޕޯޗުގަލާއި ދުނިޔޭގެ ޗެމްޕިއަން ފްރާންސް އަދި ޖަރުމަނެވެ. ދެން އެ ގްރޫޕުގައި ހިމެނެނީ ޕްލޭއޮފުން ޖާގަ ހޯދި ހަންގޭރީއެވެ.

އެއާއެކު އެ ގްރޫޕް ވެގެންދާނީ މުބާރާތުގެ މަރުގެ ގްރޫޕަށެވެ. އަދި ގްރޫޕުގެ ކޮންމެ މެޗެއްގައި ކަހަލަ ގޮތަކަށް ސުޕަސްޓާރުންގެ ކުރިމަތިލުންތައް ފެންނައިރު، ހާއްސަކޮށް ޕޯޗުގަލުގެ ތަރި ކްރިސްޓިއާނޯ ރޮނާލްޑޯ އާއި ފްރާންސްގެ ޒުވާން ތަރު ކީލިއަން އެމްބާޕޭގެ ކުރިމަތިލުން ޝައުގުވެރިވާނެއެވެ.

މި ގްރޫޕުގައި ހިމެނޭ ޕޯޗުގަލަކީ 2016 ވަނަ އަހަރު ފްރާންސްގައި ބޭއްވި ޔޫރޯގެ ޗެމްޕިއަނުންނެވެ. އެއީ އެ ގައުމުން ޔޫރޯ ކާމިޔާބުކުރި ފުރަތަމަ ފަހަރެވެ. އެ ފަހަރު ޕޯޗުގަލުން ޗެމްޕިއަންކަން ހޯދާފައިވަނީ ފައިނަލް މެޗުގައި ފްރާންސް އަތުން 1-0 ގެ ނަތީޖާއަކުން މޮޅުވެގެންނެވެ.

ދެން އެ ގްރޫޕުގައި ހިމެނޭ ދުނިޔޭގެ ޗެމްޕިއަން ފްރާންސުން ވަނީ މިހާތަނަށް ޔޫރޯ ދެ ފަހަރެއްގެ މަތިން ކާމިޔާބުކޮށްފައެވެ. އެއީ 1984 އަދި 2000 ވަނަ އަހަރެވެ. މީގެ އިތުރުން މި ގްރޫޕުގައި އޮތް ޖަރުމަނަކީ ޔޫރޯގެ އެންމެ ކާމިޔާބު އެއް ގައުމެވެ. އެގޮތުން ޖަރުމަނުން ވަނީ މިހާތަނަށް ތިން ފަހަރު މި މުބާރާތް ކާމިޔާބުކޮށްފައެވެ. އެއީ 1972، 1980 އަދި 1996 ވަނަ އަހަރެވެ. އެކަމަކު މި ފަހުން ޖަރުމަނަށް ޔޫރޯ ކާމިޔާބުކުރެވިފައި ނުވާއިރު، އެ ގައުމުން އެންމެ ފަހުން ފައިނަލެއްގައި ވާދަކޮށްފައިވަނީ 2008 ވަނަ އަހަރެވެ. ދެން ގްރޫޕް އެފްގައި އޮތް ހަންގޭރީން މިހާތަނަށް މި މުބާރާތުގެ ފައިނަލެއްގައިވެސް ވާދަކޮށްފައެއް ނުވެއެވެ.