އައްޑޫ ސިޓީގައި ކޮވިޑް-19ގެ ހާލަތު ރަނގަޅެއް ނުވޭ، މިހާތަނަށް 244 މީހުން ޕޮޒިޓިވް
27 މެއި 2021 | ބުރާސްފަތި 10:09ބަލި ކޮންޓްރޯލް ކުރުމަށް އާންމު ރައްޔިތުންގެ އެއްބާރުލުން ބޭނުންވޭ
އައްޑޫ ސިޓީ، މޮނިޓަރިންއަށް ލާފައިވަނީ މިމަހުގެ އެއްވަނަ ދުވަހު
އައްޑޫ ސިޓީގައި ކޮވިޑް-19ގެ ހާލަތު ރަނގަޅުނުވާ ކަމަށާއި، ރައްޔިތުންގެ އެއްބާރުލުން ވަރަށް ބޮޑަށް ބޭނުންވާ ކަމަށް އައްޑޫ އެމަރޖެންސީ އޮޕްރޭޝަންސް ސެންޓަރު (އޭއީއޯސީ)ން ބުނެފިއެވެ.
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑެޕިއުޓީ މޭޔަރު މުހައްމަދު ޝުއާއު ވިދާޅުވީ ކޮވިޑް-19ގެ ކޭސްތައް ކޮންމެ ދުވަހަކު ވެސް ފެންނަމުންދާ ކަމަށާއި، ހާލަތަށް މާބޮޑު ބަދަލެއް ނާންނަ ކަމަށެވެ. ބަލި ކޮންޓްރޯލް ކުރުމަށް އާންމު ރައްޔިތުންގެ އެއްބާރުލުން ބޭނުންވާކަން އޭނާ ފާހަގަކުރެއްވިއެވެ. އަދި ވިދާޅުވީ ކޮންޓްރޯލް ކުރުމަށް ގިނަ ފިޔަވަޅުތައް އަޅާފައިވާއިރު، ބޮޑަށް މަސައްކަތްތައް ކުރަނީ ރައްޔިތުންނަށް ދަތިނުވާނެ ގޮތަށް ކަންކަން އިންތިޒާމް ކުރަން ކަމަށާއި، ޒަރޫރީ ބޭނުންތަކަށް ބޭރަށް ނުކުންނަން ޖެހޭ މީހުންނާއި، ވިޔަފާރިތަކަށް ކޮންމެހެން ދޫކުރަން ޖެހޭ ހުއްދަތައް ދޫކުރަމުންދާ ކަމަށެވެ.
އައްޑޫ ސިޓީގައި ކޮވިޑް-19 ކޮންޓްރޯލް ކުރުމުގެ ގޮތުން ވަނީ ގިނަ ފިޔަވަޅުތަކެއް އަޅާފައެވެ. ބައެއް އަސާސީ ޚިދުމަތްތައް ދިނުމުގައި ބައެއް ދަތިތައް ކުރިމަތި ނަމަވެސް މިހާރު ގިނަ މައްސަލަތަކަށް ހައްލު ހޯދައިދީފައިވެއެވެ. އައްޑޫގައި ދެމުންދާ ވެމްކޯގެ ޚިދުމަތްތަކަށް އަލިއަޅުވާލައި ނޫސްވެރިންގެ ބައްދަލުވުމުގައި މޫސާ މުހައްމަދު ވިދާޅުވީ ކުނި ނެގުމުގެ ޚިދުމަތްތައް ކުރިއަށްވުރެ ބޮޑަށް ފުޅާކުރެވިފައިވާ ކަމަށެވެ. ވެމްކޯގެ މުވައްޒަފުންގެ ރައްކާތެރިކަމާއެކު ކަރަންޓީންގެ ތިބި ގެތަކުގެ މީހުންނަށް ވެސް ދަތިނުވާނެ ގޮތަށް އިންތިޒާމްތައް ހަމަޖެއްސުމުގެ މަސައްކަތްތައް ކުރާ ކަމަށެވެ.
އައްޑޫ ސިޓީގެ ކޮވިޑް-19ގެ ހާލަތަށް ބަލާއިރު އަންގާރަ ދުވަހުގެ އިރުއޮއްސި 6:00ން ބުދަ ދުވަހުގެ އިރުއޮއްސި 6:00ށް 134 ސާމްޕަލެއް ނަގާފައިވާއިރު 6 މީހަކު ޕޮޒިޓިވްވެފައިވެއެވެ.
ތަފާސްހިސާބުތައް ދައްކާ ގޮތުން 244 މީހަކު ޕޮޮޒިޓިވްވެފައިވެއެވެ. އެއީ ހިތަދޫއިން 105، މީދޫއިން 7، މަރަދޫ-ފޭދޫއިން އެކެއް، ހުޅުދޫއިން 34، ފޭދޫއިން 10، މަރަދޫއިން 10، ރިސޯޓުތަކުން (އެހިނިހެން) 3 މީހަކު ޕޮޒިޓިވްވެފައިވެއެވެ. މިހާތަނަށް 3504 ސާމްޕަލެއް ނަގާފައިވާއިރު، 170 އެކްޓިވް ކޭސް ހިމެނެއެވެ. އަދި 72 މީހުން ވަނީ ބަލިން ރަނގަޅުވެފައެވެ. ހޮސްޕިޓަލުގައި ދެ މީހަކަށް ފަރުވާ ދެމުންދާއިރު، ދެމީހަކު މިބަލީގައި ވަނީ ނިޔާވެފައެވެ.
އައްޑޫ ސިޓީ ދެވަނަ ފަހަރަށް މޮނިޓަރިންގެ ހާލަތަށް ގެނައީ 1 މެއި ވީ ހޮނިހިރު ދުވަހުގެ ވަގުތެއްގައެވެ. މުޅި އައްޑޫ ސިޓީ މޮނިޓަރިންގެ ހާލަތަށް ގެންދިޔަ އިރު މިދިޔަ ފެބުރުއަރީ މަހުގެ 6 ވަނަ ދުވަހު ވެސް އައްޑޫ ސިޓީ މޮނީޓަރިން ހާލަތަށް ގެންދިޔައެވެ. އެ ފަހަރުގެ މޮނިޓަރިންގެ ހާލަތު އުވާލީ މާޗު މަހުގެ 13 ވަނަ ދުވަހު އެވެ.
