އިންޓަރނެޓުގެ އަގު ހެޔޮކުރުމާއެކު ޓީޗަރުންނަށާއި ދަރިވަރުންނަށް ބޮޑެތި ލުއިފަސޭހަތަކެއް ލިބިގެން ދާނެ: އެޑިޔުކޭޝަން މިނިސްޓަރު
ކްލާސްތައް ކުރިއަށް ގެންދިއުމަށް ފަސޭހަވާނެ
އެޑިއުކޭޝަން މިނިސްޓަރު ޑރ. އައިޝަތު އަލީ،
އިންޓަރނެޓުގެ އަގަށް ގެނައި ހެޔޮ ބަދަލުތަކާއެކު ޓީޗަރުންނަށާއި ދަރިވަރުންނަށް ބޮޑެތި ލުއިފަސޭހަތަކެއް ލިބިގެން ދާނެ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
މިނިސްޓަރު އައިޝަތު ވިދާޅުވީ އިންޓަރނެޓު އަގު ހެޔޮކުރުމާއެކު އޮންލައިން ކްލާސްތައް ކުރިއަށް ގެންދިއުމަށް ފަސޭހަވެގެންދާނެ ކަމަށާއި، ދަތިކަމެއް ކުރިމަތިނުވާނެ ކަމަށެވެ. އަދި ކްލާސްތައް ކުރިއަށް ގެންދިއުމަށް ޓީޗަރުންނަށް ވެސް ބޮޑެތި ފަސޭހަތަކެއް ލިބިގެންދާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު އައިޝަތު ވިދާޅުވީ އިންޓަރނެޓްގެ އަގަށް މިގެނެވުނު ހެޔޮ ބަދަލާއެކު ކުރިއަށް އޮތް ތަނުގައި މިކަމުގެ ސަބަބުން ކުރާ ހެޔޮ އަސަރުތައް ފެންނާނެ ކަމަށް އުންމީދު ކުރައްވާ ކަމަށެވެ.
އިންޓަރނެޓްގެ އަގަށް ގެނެވުނު ބަދަލުތަކުގެ ތެރެއިން ފިކްސްޑް ބްރޯޑްބޭންޑަށް ގެނައި ބަދަލުތަކާއެކު ޚިދުމަތްދޭން ފަށާނީ ޖުލައި މަހުގެ 1 ވަނަ ދުވަހުއެވެ. މޮބައިލް ބްރޯޑްބޭންޑަށް ގެނެވުނު ބަދަލުތަކާއެކު ޚިދުމަށް ދޭން ފަށާނީ އޮކްޓޯބަރ 1 ވަނަ ދުވަހުން ފެށިގެންނެވެ.
ބަދަލާއެކު ރެސިޑެންޝަލް އިންޓަރނެޓް ޚިދުމަތްތައް ބޭނުންކުރާ ފަރާތްތަކަށް (%60 - %75) މީހުންނަށް ސީދާކޮށް މަހުފީ އަގުހެޔޮ ވެގެންދާނެއެވެ.
އިންޓަރނެޓް ޕެކޭޖްތަކުގެ ތްރޮޓްލް ސްޕީޑް ދެގުނަ އަދި ފަސްގުނަ މަތިވެގެންދާނެކަން ވަނީ އިއުލާން ކޮށްފައެވެ. މިހާރު ޖުމްލަ ގޮތެއްގައި ތްރޮޓްލް ސްޕީޑަކީ 1Mbps އާއި 2Mbps އާ ދެމެދުކަމަށްވަނީ އިއުލާންކޮށްފައެވެ. ތްރޮޓްލް ސްޕީޑް މަތިވުމުން، އިންޓަރނެޓުގެ ޒަރީޢާއިން ބޭނުންކުރާ ގިނަ ޚިދުމަތްތަކަށް ސްޕީޑް ދަށްވުމުގެ ސަބަބުން ދިމާވާ މައްސަލަތައް ނިސްބަތުން ދަށްވެ، ޑޭޓާ އެޑް-އޮންސް އަށް ކުރާ ޚަރަދު އުނިވެގެންދާނެއެވެ.
މިގޮތުން، އާދައިގެ މިންވަރަކަށް އިންޓަރނެޓް ބޭނުންކުރާ ފަރާތްތަކަށާއި، ސްކޫލް ކުދިންގެ ވީޑިއޯ ކޮންފަރެންސިންގ ފަދަ ބޭނުންތަކަށާއި، އައި. ސީ. ޓީ. ދާއިރާގައި މަސައްކަތްކުރާ ފަރާތްތަކަށްވެސް، މިގެނެވޭ ބަދަލުތަކުގެ މަންފާލިބިގެންދާނެއެވެ. އަދި ޕެކޭޖްގެ ތްރޮޓްލް ސްޕީޑުގައި ވެސް އާއްމު ބޭނުންތަކަށް އެކަށޭނަ ސްޕީޑެއްގައި އިންޓަރނެޓުގެ ޚިދުމަތް ލިބިގެންދާނެއެވެ.
ބްރޯޑްބޭންޑް އިންޓަނެޓުގެ 30 ޖީބީ ލިބޭނީ 250 ރުފިޔާއަށެވެ. އެއީ 25 އެމްބީޕީއެސްގައެވެ. މިޕެކޭޖްގެ ތްރޮޓްލް ސްޕީޑަކީ ދެ އެމްބީޕީއެސްއެވެ. 100 ޖީބީ ލިބޭނީ 500 ރުފިޔާއަށެވެ. އެއީ 15 އެމްބީޕީއެސްގައެވެ. މި ޕެކޭޖްގެ ތްރޮޓްލް ސްޕީޑަކީ ފަސް އެމްބީޕީއެސްއެވެ. އަދި 200 ޖީބީގެ އަގަކީ 700 ރުފިޔާއެވެ. އެއީ 25 އެމްބީޕީއެސްގައެވެ. މި ޕެކޭޖްގެ ތްރޮޓްލް ސްޕީޑަކީ ވެސް ފަސް އެމްބީޕީއެސްއެވެ.
