އެމެރިކާގެ ފައިޒަރ އަދި ޖަރުމަނުވިލާތުގެ ބަޔޯއެންޓެކު ގުޅިގެން އުފައްދާފައިވާ ފައިޒަރ ވެކްސިން، އިންޑިޔާގައި މިހާރު ހަލުވިކަމާއެކު ފެތުރެމުން އަންނަ ވޭރިއަންޓާ ދެކޮޅަށް މަސައްކަތްކުރާ މިންވަރު ބޮޑުކަމަށް އެކުންފުނިން ބުނެފިއެވެ.

އުމުރުން 12 އަހަރުން މަތީގެ އެންމެންގެ ގަޔަށްވެސް މިވެކްސިން ޖެހޭނެކަމަށާއި، 2 ޑިގްރީ އާއި 8 ޑިގްރީ ސެލްސިއަސްއާ ދެމެދު އެއް މަސް ދުވަސްވަންދެން ފައިޒަރ ވެކްސިން ރައްކާކޮށްފައި ބެހެއްޓޭނެކަމަށް ވެސް އެކުންފުނިން ބުނެފައިވާކަމަށް އިންޑިއަން އެކްސްޕްރެސްގައި ބުނެފައި ވެއެވެ. ފައިޒަރ ވެކްސިންގެ 5 ލައްކަ ޑޯޒް މިއަހަރުގެ ޖުލައި މަހާއި އޮކްޓޯބަރ މަހާ ދެމެދު އިންޑިޔާއަށް ދިނުމަށް އެކުންފުނިން ވަނީ އިންޑިޔާ ސަރުކާރަށް ހުށަހަޅާފައެވެ.

މިކަމާއި ގުޅޭ އެކި މަޝްވަރާތައް އަންނަނީ ދެ ފަރާތުގެ ދެމެދުގައި ކުރެވެމުންނެވެ. މިމަޝްވަރާތަކުގައި ފައިޒަރ އިން ވަނީ ވެކްސިންގެ އެންމެ ފަހުގެ ޑާޓާތައް އިންޑިޔާ ސަރުކާރާ ހިއްސާކޮށްފައެވެ.

ފައިޒަރ ވެކްސިނަކީ ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)ގެ އިތުރުން އެހެން ގައުމުތަކުންވެސް އެމަރޖެންސީކޮށް ބޭނުންކުރުމުގެ ހުއްދަދީފައިވާ ވެކްސިނެކެވެ. އަދި އެވެކްސިން އަންނަނީ ގިނަ ގައުމުތަކެއްގައި ބޭނުން ކުރަމުންނެވެ.

ފައިޒަރ ވެކްސިން އިންޑިޔާއަށް ފޯރުކޮށްދިނުމުގެ މަޝްވަރާތައް ކުރިޔަށްދާއިރު ފައިޒަރއިން ވަނީ އެވެކްސިން ފާއިތުވި ހަމަސް ދުވަސްތެރޭގައި ހޯދާފައިވާ ކުރިއެރުންތައްވެސް އިންޑިޔާ ސަރުކާރާ ހިއްސާކޮށްފައެވެ. އަދި މިވެކްސިން އިންޑިޔާ ވޭރިއަންޓާ ދެކޮޅަށް މަސައްކަތްކުރާ މިންވަރު ބެލުމަށް އިނގިރޭސިވިލާތުގައި ކޮށްފައިވާ ދިރާސާއެއްވެސް ވަނީ ހިއްސާކޮށްފައެވެ.

އިންޑިޔާގައި ފެތުރެމުން އަންނަ ކޮވިޑްގެ ވޭރިއަންޓް ފެނިފައިވާ އެއް ގައުމަކީ އިނގިރޭސިވިލާތެވެ. އިނގިރޭސިވިލާތުގެ ޕަބްލިކް ހެލްތުން ކުރިޔަށް ގެންދިޔަ މިދިރާސާގައި ހާމަވެފައިވާ ގޮތުގައި އިންޑިޔާ ވޭރިއަންޓާ ދެކޮޅަށް ފައިޒަރ ވެކްސިން މަސައްކަތްކުރާ މިންވަރު ހުރީ 87.9 އިންސައްތައިގައެވެ. މި ދިރާސާ ނިންމާފައިވަނީ މެއި މަހުގެ 22 ވަނަ ދުވަހުއެވެ.

ދިރާސާގައި ބޭނުންކޮށްފައިވާ މީހުންގެ ތެރެއިން 26 އިންސައްތަ މީހުންނަކީ އިންޑިޔާއަށް ނިސްބަތްވާ މީހުންނާއި ބްރިޓިޝް އިންޑިއަނުންނެވެ. މީގެ އިތުރަށް މިދިރާސާގައި ބަންގްލަދޭޝް އަށް ނިސްބަތްވާ 1.4 އިންސައްތަ މީހުންނާއި، ޕާކިސްތާނަށް ނިސްބަތްވާ 5.9 އިންސައްތަ މީހުންނާއި، އަދި އޭޝިޔާގެ އެހެން ގައުމުތަކަށް ނިސްބަތްވާ 5.7 އިންސައްތަ މީހުން ވަނީ ބައިވެރިކޮށްފައެވެ.

މި ދިރާސާގެ އިތުރުން، ގަތަރުގެ އިމިޔުނިޒޭޝަން ޕްރޮގްރާމްގެ ޑާޓާތަކުން ހާމަވެފައިވާ ގޮތުގައި އިނގިރޭސިވިލާތުގެ ވޭރިއަންޓާ ދެކޮޅަށް ފައިޒަރ ވެކްސިން މަސައްކަތްކުރާ މިންވަރު ހުރީ 89 އިންސައްތައިގައެވެ. އަދި ދެކުނު އެފްރިކާއިން ފެނުނު ވޭރިއަންޓާ ދެކޮޅަށް ފައިޒަރ ވެކްސިން މަސައްކަތްކުރާ މިންވަރު ހުރީ 75 އިންސައްތައިގައެވެ.

މިދިރާސާގައި ބޭނުންކޮށްފައިވާ މީހުންގެ ތެރެއިން 24 އިންސައްތަ މީހުންނަކީ އިންޑިޔާގެ މީހުންނެވެ. އެއީ 6000އަށް ވުރެ ގިނަ މީހުންނެވެ. ދެން ހިމެނެނީ ނޭޕާލަށް ނިސްބަތްވާ 12 އިންސައްތަ މީހުންނާއި، ބަންގްލަދޭޝްގެ 11، އިންސައްތަ މީހުންނާއި، ސްރީލަންކާގެ 4 އިންސައްތަ މީހުންނާއި، އަދި ޕާކިސްތާނުގެ 6 އިންސައްތަ މީހުންނެވެ. މިއެންމެންގެ މެދުގައިވެސް ވެކްސިން އެ ވޭރިއަންްތަކާ ދެކޮޅަށް މަސައްކަތްކޮށްފައިވަނީ ހަމަ އެ މިންވަރަށެވެ.

މީގެއިތުރުން ފައިޒަރ އިން ވަނީ ވެކްސިންގެ ދެވަނަ ޑޯޒް ދިނުމަށްފަހު ހަމަސް ދުވަސް ވަންދެން ކުރިޔަށް ގެންގޮސްފައިވާ ފޭސް ތިނެއްގެ ކްލިނިކަލް ޓްރަޔަލްތަކުގެ އެންމެ ފަހުގެ ޑާޓާތައްވެސް ހާމަކޮށްފައެވެ. މީގެތެރޭގައި ހިމެެނެނީ ވެކްސިންގެ ކާމިޔާބުކަން ބެލުމަށް އެންމެ ފުރަތަމަ ކުރިޔަށް ގެންދެވުނު ޓްރަޔަލްތަކުގެ ޑާޓާތަކާއި، ވޭރިއަންޓްތަކާއި ދެކޮޅަށް ވެކްސިން މަސައްކަތްކުރާ މިންވަރު ދެނެގަތުމަށް ނެގިފައިވާ ޑާޓާތަކާއި، ކްލިނިކަލީ ގެންދެވުނު ދިރާސާތަކުގެ ޑާޓާތަކާއި، ދުނިޔެއިން ފެންނަމުންދާ ވޭރިއަންޓްތަކާއި ދެކޮޅަށް މީހުންނަށް ވެކްސިން ދީގެން ނެގިފައިވާ ޑާޓާތަކެވެ. އިންޑިޔާ ސަރުކާރާ ހިއްސާކޮށްފައިވާ ޑާޓާތަކަކީ އެކި ގައުމުތަކުގައި ވެކްސިންގެ ކާމިޔާބުކަން ދެނެގަތުމަށް ކޮށްފައިވާ ދިރާސާތަކުގައި ބޭނުންކޮށްފައިވާ ޑާޓާތަކެވެ.

މީގެތެރޭގައި ހިމެނޭ ބައެއް ޑާޓާތަކަކީ ކޮވިޑް-19 އާ ދެކޮޅަށް ވެކްސިން މަސައްކަތްކުރާ މިންވަރު 95 އިންސައްތަ ކާމިޔާބުކަން އެނގިފައިވާ ޑާޓާތަކާއި، 12 އަހަރާއި 15 އަހަރާ ދެމެދުގެ ކުދިންނަށް ވެކްސިން މަސައްކަތްކުރާ މިންވަރު 100 އިންސައްތަ ކާމިޔާބުކަން އެނގިފައިވާ ޑާޓާތަކެވެ.