އިނގިރޭސިވިލާތުން ފްރާންސަށް އެތެރެވާނަމަ ކަރަންޓީނުވާން ޖެހޭ

އިނގިރޭސިވިލާތުން ފްރާންސަށް އެތެރެވާ އެންމެންވެސް ކަރަންޓީނުވާން ޖެހޭނެ ކަމަށް އެ ގައުމުން ނިންމައިފިއެވެ.

ފްރާންސްގެ ސަރުކާރާ ހަވާލާދީ ބީބީސީން ނެރުނު ރިޕޯޓުގައި ވާގޮތުން، ވެކްސިންގެ ޑޯޒްތައް ފުރިހަމަކޮށްފައިވާނަމަ ނުވަތަ ކޮވިޑް-19އަށް ނެގެޓިވް ވެފައިވާނަމަ، އެގައުމަށް އެތެރެވުމުގެ ހުއްދަ އަންނަ ޖޫން މަހުގެ 9 ވަނަ ދުވަހުން ފެށިގެން ދިނުމަށް ނިންމާފައިވީ ނަމަވެސް، އިނގިރޭސިވިލާތުން އެގައުމަށް އެތެރެވާ އެންމެންވެސް ކަރަންޓީނުވާން މަޖުބޫރެވެ. ނަމަވެސް ކަރަންޓީނުވާން ޖެހޭނީ ކިހައި މުއްދަތަކަށް ކަމެއް އަދި ނިންމާފައެއް ނުވެއެވެ.

ނިމިދިޔަ ހަފުތާގައި ޖަރުމަނުންވެސް ވަނީ އިނގިރޭސިވިލާތުން އަންނަ މީހުން ކަރަންޓީނުވާން ޖެހޭނެ ކަމަށް ނިންމާފައެވެ. އެގޮތުން ޖަރުމަނުން ކަނޑައަޅާފައިވާ ކަރަންޓީނުގެ މުއްދަތަކީ ދެ ހަފުތާއެވެ.

އޭގެ އިތުރުން އޮސްޓްރިއާއިންވެސް ވަނީ އިނގިރޭސިވިލާތުން ފަތުރުވެރިން ގެނައުމާއި، އަދި އިނގިރޭސިވިލާާތާ ދެމެދުގެ ޑައިރެކްޓް ފްލައިޓުތައް މެދުކަނޑާލާފައެވެ.

ނަމަވެސް ޔޫރަޕްގެ ގައުމުތަކުގެ ތެރެއިން ސްޕެއިނުން ވަނީ އިނގިރޭސިވިލާާތާ ދެމެދު އަލުން ދަތުރުތައް ފަށާފައެވެ.

އިނގިރޭސިވިލާތުން ފެންނަމުންދާ ކޭސްތައް އަނެއްކާވެސް އިތުރުވެފައިވާއިރު، އެގައުމުގައި އައު ވޭރިއަންޓެއްވެސް ދަނީ ދައުރުވަމުންނެވެ. އެގޮތުން ނިމިދިޔަ ހަފުތާގައި އެކަނިވެސް 3424 ކޭސް ރިޕޯޓު ކޮށްފައިވާކަމަށް ބީބީސީން ބުނެއެވެ. މިއީ އޭގެ ކުރީ ހަފުތާއާ އަޅާބަލާއިރު 2111 އިތުރު އަދަދެކެވެެ.