ފިޔަވަޅުތަކާއެކު ވިޔަފާރިތަކުން އަމަލުކުރަންވީ އުސޫލު އާންމުކޮށްފި

ކޮވިޑް-19 އިން ރައްކާތެރިވުމަށް އަޅާފައިވާ ޚާއްސަ ފިޔަވަޅުތަކާ ގުޅިގެން މާލެ، ހުޅުމާލެ އަދި ވިލިމާލޭގައި ހިންގާ ވިޔަފާރިތަކުން ހުއްދަ ހޯދައިގެން ވިޔަފާރިކުރާ ތަންތަނުން ޚިދުމަތް ދިނުމުގައި އަމަލުކުރަންވީ ގޮތް އާއްމުކޮށްފިއެވެ.

އިކޮނޮމިކް މިނިސްޓްރީން ބުނީ ކޮވިޑް-19 އިން ރައްކާތެރިވުމަށް އަޅާފައިވާ ޚާއްސަ ފިޔަވަޅުތަކާ ގުޅިގެން، 26 މެއި 2021ން ފެށިގެން 9 ޖޫން 2021 ގެ ނިޔަލަށް މާލެ، ހުޅުމާލެ އަދި ވިލިމާލޭގައި ހިންގާ ވިޔަފާރިތަކުން ހުއްދަ ހޯދައިގެން ވިޔަފާރިކުރާ ތަނުން ޚިދުމަތް ދިނުމުގައި ޚާއްސަ އުސޫލެއް ކަނޑައަޅާފައިވާ ކަމަށެވެ.

އިކޮނޮމިކް މިނިސްޓްރީން ބުނީ މި މުއްދަތުގެ ތެރޭގައި ވިޔަފާރިތަކުން ހުއްދައަށް އެދެންޖެހޭނީ، ހަމައެކަނި އެ ވިޔަފާރިއެއްގެ މުވައްޒަފުން ކަމަށެވެ.

މުދާ ވިއްކާ ތަންތަނަށް އަލިއަޅުވާލައި އިކޮނޮމިކް މިނިސްޓްރީން ބުނީ މުދާ ވިއްކާ ތަންތަނުން ޑެލިވަރީ ޚިދުމަތް ދެވޭނީ، އެ ތަނެއްގައި މަސައްކަތްކުރާ މުވައްޒަފުންނަށް ހުއްދަ ހޯދުމަށްފަހު ހެނދުނު 6:00ން މެންދަމު 12:00ށް ކަމަށާއި، މުދާ ވިއްކާ ތަންތަން އާންމުންނަށް ހުޅުވާލައިގެން ޚިދުމަތް ދެވޭނީ، އެ ތަނެއްގައި މަސައްކަތްކުރާ މުވައްޒަފުންނަށް ހުއްދަ ހޯދުމަށްފަހު، ހެނދުނު 8:00ން ހަވީރު 4.00 އަށެވެ.

އިކޮނޮމިކް މިނިސްޓްރީން ބުނީ މުދާ ވިއްކުމުގެ ވިޔަފާރިކުރާ ކޮންމެ ތަނަކަށް، 2 ސަޕޯޓް ސްޓާފް އަދި 2 ޑެލިވަރީ ސްޓާފުންނަށް ހުއްދަ ދޫކުރެވޭނެ ކަމަށާއި، އިތުރު މުވައްޒަފުންނަށް ހުއްދަ ބޭނުންވާނަމަ، permit@trade.gov.mvށް މެދުވެރިކޮށް މައުލޫމާތު ފޮނުވުމުން، އިތުރަށް ދިރާސާކުރުމަށްފަހު، ހުއްދަ ދޫކުރެވޭނެ ކަމަށެވެ. އަދި އިތުރު ހުއްދައަށް އެދޭ ކޮންމެ ފަރާތަކުން ވެސް، ޖުމްލަ މުވައްޒަފުންގެ އަދަދު 10ށްވުރެ އިތުރުވާނަމަ، 2 ދަންފަޅިއަކަށް ބަހާލައިގެން ޑިއުޓީ ގަޑި ކަނޑައަޅަން ޖެހޭ ކަމަށެވެ.

ކެއުން ބުއިމުގެ ޚިދުމަތް ދޭ ތަންތަނާ ބެހޭ ގޮތުން އިކޮނޮމިކް މިނިސްޓްރީން ބުނީ ކެއުން ބުއިމުގެ ޚިދުމަތް ދޭ ތަންތަނުން ޑެލިވަރީ ޚިދުމަތް ދެވޭނީ، އެ ތަނެއްގައި މަސައްކަތްކުރާ މުވައްޒަފުންނަށް ހުއްދަ ހޯދުމަށްފަހު، ހެނދުނު 6:00ން މެންދަމު 12:00 ކަމަށެވެ. އަދި ކެއިން ބުއިމުގެ ޚިދުމަތް ދޭ ތަންތަނުން ޓޭކްއަވޭގެ ޚިދުމަތް ދެވޭނީ، އެ ތަނެއްގައި މަސައްކަތްކުރާ މުވައްޒަފުންނަށް ހުއްދަ ހޯދުމަށްފަހު، ހެނދުނު 8:00ން ހަވީރު 4:00ށް ކަމަށް މިނިސްޓްރީން ބުނެއެވެ.

އިކޮނޮމިކް މިނިސްޓްރީން ބުނީ 13 ފެބްރުއަރީ 2021ން ފެށިގެން މޯލްޑިވްސް ޕޮލިސް ސަރވިސްއިން ވިޔަފާރިތަކަށް ދޫކޮށްފައިވާ ހުއްދަތައް ބޭނުން ކުރެވޭނެ ކަމަށެވެ.

މީގެ އިތުރުން އިކޮނޮމިކް މިނިސްޓްރީން ބުނީ ގުދަން، ބޯޓުޔާޑު ފަދަ ތަންތަނުގައި މަސައްކަތްކުރާ މުވައްޒަފުންނާއި، މާލެ-ތިލަފުށީގައި ދާއިމީކޮށް ދިރިއުޅޭ ފަރާތްތައް މަސައްކަތަށް ދިޔުމަށް މޯލްޑިވްސް ޕޮލިސް ސަރވިސްއިން އިތުރު ހުއްދައެއް ނަގަން ނުޖެހޭނެ ކަމަށާއި، މިފަދަ ފަރާތްތަކުގެ ވިޔަފާރިތަކުގައި މަސައްކަތްކުރާ މުވައްޒަފުންނަށް ދޫކޮށްފައިވާ ހުއްދަ ބޭނުންކޮށްގެން، މަސައްކަތްކުރުމަށް މާލެ އާއި ތިލަފުއްޓާ ދެމެދު ދަތުރުކުރެވޭނެ ކަމަށެވެ. އަދި މި މުއްދަތުގެ ތެރޭގައި، ކޮންސްޓްރަކްޝަން ސައިޓްތަކުގައި މަސައްކަތްކުރުމަށް ހުއްދަ ދޫކުރެވޭނީ، އެ ސައިޓަކަށް ގެއްލުމެއް ލިބޭނެފަދަ ހާލަތުތަކުގައި، އެ ކަމެއްގެ ތަފްސީލު ފޮނުވުމުން އިތުރަށް ދިރާސާކުރުމަށްފަހު ކަމަށް އިކޮނޮމިކް މިނިސްޓްރީން މައުލޫމާތުދެއެވެ.