ހަ މަހަށް ފަހު މަންޒުކިޗް މިލާން ދޫކޮށްލައިފި

އޭސީ މިލާނުގައި ހަ މަސް ހޭދަކުރުމަށްފަހު ކްރޮއޭޝިއާ ފޯވާޑް މާރިއޯ މަންޒުކިޗް އެ ޓީމު ދޫކޮށްލައިފިއެވެ.

އުމުރުން 35 އަހަރުގެ ފޯވާޑް މިލާނާ ގުޅުނީ ހިލޭ ޓްރާންސްފާއެއްގެ ދަށުން މި އަހަރުގެ ޖެނުއަރީ މަހުގެ ތެރޭގައެވެ. އަދި މި ސީޒަނުގެ ނިޔަލަށް އެއްބަސްވުން ހަދައި މިލާނަށް ކުޅެން މަންޒުކިޗް ނިންމި ނަމަވެސް، އަނިޔާގެ ސަބަބުން އޭނާއަށް ގިނަ މެޗުތަކެއް ގެއްލުނެވެ. އެގޮތުން މިލާނަށް މަންޒުކިޗް ކުޅެދީފައިވަނީ އެންމެ 11 މެޗެވެ. އަދި އަނިޔާގައި ހުރުމުގެ ސަބަބުން ފެބްރުއަރީ މަހުގެ މުސާރަ ޗެރިޓީއަށް ދޭން މަންޒުކިޗް އެ ފަހަރު ނިންމިއެވެ.

އެހެންކަމުން މަންޒުކިޗް ވަނީ މިލާނުގެ އެއްބަސްވުން އާނުކޮށް، އެ ޓީމު ދޫކޮށްލަން ނިންމާފައެވެ. އެކަން އިއުލާންކޮށް މަންޒުކިޗް ބުނީ މިލާނަށް ކުޅުމުގެ ފުރުސަތު ލިބުމަކީ ލިބުނު ފަޚުރެއް ކަމަށެވެ. އަދި އޭނާއަށް މި ފުރުސަތު ދިނީތީ މިލާނުގެ މެނޭޖުމަންޓަށް މަންޒުކިޗް ވަނީ ޝުކުރުއަދާކޮށްފައެވެ.

މަންޒުކިޗް މިލާން ދޫކޮށްލިއިރު، މީގެ ކުރިން އޭނާ ކުޅެފައިވަނީ ގަތަރުގެ އަލް-ދުހައިލަށެވެ. ގަތަރު ލީގަށް 2019 ވަނަ އަހަރުގެ ޑިސެމްބަރު މަހު މަންޒުކިޗް ބަދަލުވި ނަމަވެސް، ހަ މަސް ފަހުން ދުހައިލާއެކު ހަދާފައިވާ އެއްބަސްވުން މަންޒުކިޗް އުވާލީ ދެ ފަރާތް އެއްބަސްވެގެންނެވެ.

އަދި މީގެ ކުރިން ކްރޮއޭޝިއާގެ ޑީނަމޯ ޒެގްރެބާއި، ޖަރުމަނުގެ ވޮލްފްސްބާގާއި، ބަޔާން މިއުނިކް އަދި ސްޕެއިނުގެ އެތުލެޓިކޯ މެޑްރިޑަށްވެސް ކުޅުނު މަންޒުކިޗް ވަނީ އިޓަލީގެ ޔުވެންޓަސްއަށްވެސް ކުޅެފައެވެ. އަދި މަންޒުކިޗް ވަނީ ކުލަބު ކެރިއަރުގައި މިހާތަނަށް ޖަރުމަން ލީގާއި، އިޓާލިއަން ލީގުގެ އިތުރުން ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕުވެސް ކާމިޔާބުކޮށްފައެވެ.