ޓެރަރިޒަމްގެ މައްސަލަ ރިޕޯޓު ކުރާ މިންވަރަކުން އެ ހިސާބުތަކުގައި ފުލުހުން ހަރަކާތްތެރި ވާނެ
20 މެއި 2021 | ބުރާސްފަތި 07:46ހަރުކަށި ފިކުރާ ޓެރަރިޒަމާ ގުޅޭ ކިތަންމެ ކުޑަ ވެސް މައުލޫމާތެއް އެނގޭނަމަ ހިއްސާ ކުރުމަށް އެދިފައިވޭ
މާލޭގައި ފުލުހުން ހިންގި ޚާއްސަ އޮޕަރޭޝަނެއް
ޓެރަރިޒަމްގެ ނުރައްކާ ރާއްޖޭގެ އެކި ހިސާބުތަކުގައި އޮވެގެން ފުލުހުންނަށް އެކަން ރިޕޯޓު ލިބި، އެ މައުލޫމާތުތައް ލިބޭ މިންވަރަކުން އެ ސަރަހައްދުތަކުގައި ހަރަކާތްތެރި ވަމުންދާނެ ކަމަށް ފުލުހުން ބުނެފިއެވެ.
މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅޭ އެންމެ ފަހުގެ މައުލޫމާތު ހާމަކުރުމަށް ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ހަރުކަށި ފިކުރާއި ޓެރަރިޒަމާ ގުޅޭ ކިތަންމެ ކުޑަ ވެސް މައުލޫމާތެއް އެނގޭނަމަ ހިއްސާ ކުރުމަށް އެދޭ ކަމަށެވެ.
ފުލުހުން ވަނީ މި މައުލޫމާތު ހިއްސާ ކުރާ ފަރާތްތަކާއި ހިއްސާކުރާ މައުލޫމާތުގެ ސިއްރުކަން ހިފަހައްޓާނެކަމުގެ ޔަގީންކަން ދީފައެވެ. އަދި މިހާރު ވެސް ބައެއް މީހުން އެފަދަ މައުލޫމާތު ހިއްސާ ކުރަމުންދާ ކަން ހިއްސާކޮށް ފުލުހުން ބުނީ އެ އެންމެންގެ ސިއްރު ވެސް ހިފަހައްޓަމުން ދާ ކަމަށެވެ.
ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލައާ ގުޅިގެން ގްރޭޓަރ މާލެ ސަރަހައްދުގެ އިތުރުން، މުޅި ރާއްޖޭގެ ސެކިއުރިޓީ ވަރުގަދަކޮށް ސިފައިން ވެސް ދަނީ ހަރަކާތްތެރިވަމުންނެވެ. އެގޮތުން ވީއައިއޭގެ ސެކިއުރިޓީ މަތިކުރުމާއެކު ރައްޔިތުންގެ މަޖިލީހަށް ތްރެޓެއް އޮތްކަމަށް ލިބުނު މައުލޫމާތާ ގުޅިގެން މަޖިލިސް އިމާރާތާއި އަދި އިމާރާތް ވަށައިގެންވާ ސަރަހައްދުގެ ސެކިޔުރިޓީ ވެސް ވަނީ ވަރުގަދަ ކޮށްފައެވެ.
އެމްއެންޑީއެފުން ބުނީ، އެ ހަމަލާއާ ގުޅިގެން ސިފައިން ހަތިޔާރާއެކު މާލެ ސަރަޙައްދުގެ ކަންކަން ބަލަމުންދާ ކަމަށެވެ. އަދި މުޅި ރާއްޖޭގައި ވެސް ސިފައިންގެ ސެކިއުރިޓީ އިތުރަށް ވަރުގަދަކޮށް، ހަރަކާތްތެރި ވަމުންދާކަމަށް ބުނެފައިވެއެވެ.
ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން މިހާތަނަށް 4 މީހަކު ވަނީ ހައްޔަރު ކޮށްފައެވެ. އެއީ ލ. ގަން، ދުންފިނި އުފާ، އަހުމަދު ފާތިހު، ބޮންގޮއްވުމުގައި އަމަލީގޮތުން ބައިވެރިވި ކަމަށް ތުހުމަތު ކުރެވޭ އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އެވެ.
މީގެ އިތުރުން ރާއްޖޭގެ އެކި ކަންކޮޅުތަކުގައި ވެސް އިތުރު އޮޕަރޭޝަންތަކެއް ކުރިއަށް ދާއިރު އައްޑޫ ސިޓީގައި ހިންގާފައިވާ އޮޕަރޭޝަންގައި 9 މީހަކާއި ބައެއް ތަކެތި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން މައުލޫމާތުދެއެވެ.
