އިންޑިއާއިން ކޮވިޑަށް ފަރުވާދޭން އައު ބޭހެއް ބޭނުން ކުރަނީ
މި ބޭސް ބޭނުން ކުރުމުން ބަލި ޖެހޭ މީހުން ބަލިން ފަސޭހަވާލެއް އަވަސް
އިންޑިއާއިން ކޮވިޑަށް ޕޮޒިޓިވްވާ މީހުންގެ އަދަދު ވަނީ ރެކޯޑް މިންވަރަކަށް އިތުރުވެފައި
އިންޑިއާގައި ކޮވިޑް-19ގެ އަލާމަތްތަކަށް ފަރުވާ ދޭން އުފެއްދި އައު ބޭހެއް ބޭނުން ކުރަން ފަށައިފިއެވެ.
އިންޑިއާގެ ޑިފެންސް ރިސާޗް އެންޑް ޑެވެލޮޕްމެންޓް އޯގަނައިޒޭޝަން (ޑީއާރުޑީއޯ) އާއި ޑރ. ރެޑީސް ކުންފުނިން އުފެއްދި 2-ޑީޖީ ބޭސް އެމާޖެންސީ ހާލަތުގައި ބޭނުން ކުރަން އެގައުމުގެ ސަރުކާރުން ވަނީ ހުއްދަ ދީފައެވެ.
އިންޑިއާގެ ސަރުކާރުން ނެރުނު ބަޔާނުގައި ބުނެފައިވަނީ ކޮވިޑް ޖެހިގެން ހޮސްޕިޓަލުގައި އެޑްމިޓު ކުރާ މީހުނަށް 2-ޑީޖީ ބޭސް ދިނުމުން އެމީހުން ބަލިން ރަނގަޅުވުން އަވަސް ކަމަށާއި އަދި މެޑިކަލް އޮކްސިޖެން ދޭން ޖެހޭ މިންވަރު ދަށްވާ ކަމަށެވެ. އަދި ކޮވިޑްގައި މިހާރުވެސް ދެމުން އަންނަ ފަރުވާތަކާއިއެކު އެ ބޭސް ދޭނީ ބަލީގައި ހާލު ސީރިއަސް ނުވާ މީހުނަށް ކަމަށެވެ.
އެކަމަކު އިންޑިއާގެ ބައެއް ސިއްހީ މާހިރުން ވަނީ 2-ޑީޖީ ބޭސް ބޭނުން ކޮށްގެން ހަދާފައިވާ ޓެސްޓުތަކާއި ބެހޭ މައުލޫމާތު އެކަށީގެންވާ ވަރަށް އާންމުކޮށްފައި ނުވާ ކަމަށް ބުނެ ކަންބޮޑުވުން ފާޅުކޮށްފައެވެ.
އިންޑިއާގައި މިފަހަކަށް އައިސް ކޮވިޑްގެ ކޭސްތައް އިންތިހާއަށް އިތުރުވެ ހޮސްޕިޓަލްތައް ވަނީ ފުރިފައެވެ. އަދި ބަލީގެ އަލާމާތްތަކަށް ފަރުވާދޭން ބޭނުން ކުރަމުން އަންނަ ބޭސްތަކާއި މެޑިކަލް އޮކްސިޖެން ހޯދުން ވަނީ ދަތިވެފައެވެ.
