ޑޯޓްމުންޑުން ޗެމްޕިއަންސް ލީގުގެ ޖާގައެއް ކަށަވަރުކޮށްފި

ޖަރުމަން ލީގުގައި އާދީއްތަ ދުވަހުގެރޭ މައިންޒް ބަލިކޮށް ބޮރޫޝިއާ ޑޯޓްމުންޑުން އަންނަ ސީޒަނުގެ ޔުއެފާ ޗެމްޕިއަންސް ލީގުގެ ޖާގައެއް ކަށަވަރުކޮށްފިއެވެ.

ރަށުން ބޭރުގައި ކުޅުނު މެޗުން ޑޯޓްމުންޑް މޮޅުވީ 3-1 ގެ ނަތީޖާއަކުންނެވެ. މި މޮޅާއެކު ލީގުގައި އެންމެ ފަހުން ކުޅުނު ހަ މެޗުންވެސް ޑޯޓްމުންޑް ވަނީ މޮޅުވެފައެވެ.

އާދީއްތަ ދުވަހުގެރޭ ކުޅުނު މެޗުގެ ފުރަތަމަ ހާފުގައި ޑޯޓްމުންޑުން މޮޅު ކުޅުމެއް ދެއްކިއިރު، މި ހާފުގައި އެ ޓީމުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ 23 ވަނަ މިނެޓުގައި ޑޯޓްމުންޑުން ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީ ރަފައެލް ގުއެރެއިރޯއެވެ. އަދި ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް މާކޯ ރެއުސް ވަނީ ލަނޑެއް ޖަހައި، ޑޯޓްމުންޑަށް ލީޑު ފުޅާކޮށްދީފައެެވެ.

މި މެޗުގައި ދެ ޓީމުންވެސް ގިނަ ހަމަލާތަކެއް އުފެއްދިއިރު، މެޗު ނިމެން 10 މިނެޓަށް ވެފައި ވަނިކޮށް ހޫލިއަން ބްރަންޓް ވަނީ ޑޯޓްމުންޑުގެ ތިންވަނަ ލަނޑު ޖަހައިދީފައެވެ. އެކަމަކު މެޗުގެ އިތުރު ވަގުތުގައި މައިންޒުން ވަނީ ލަނޑެއް ޖަހައި، ފަރަގު ކުޑަކޮށްފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ރޮބިން ކުއައިސަންއެވެ.

މި މޮޅާއެކު ޑޯޓްމުންޑުން ޗެމްޕިއަންސް ލީގުގެ ޖާގައެއް ކަށަވަރުކުރިއިރު، އެ ޓީމު ވަނީ ކުޅުނު 33 މެޗުން 61 ޕޮއިންޓާއެކު ތާވަލުގެ ތިންވަނައަށް ޖެހިލާފައެވެ. ދެވަނައިގައި އޮތް އާރްބީ ލައިޕްޒީގަށް 33 މެޗުން 65 ޕޮއިންޓް ލިބިފައިވާއިރު، އާދިއްތަ ދުވަހުގެރޭ ކުޅުނު މެޗުން އެ ޓީމު ވަނީ ވުލްފްސްބާގާ 2-2 ގެ ނަތީޖާއަކުން އެއްވަރުވެފައެވެ. މި ނަތީޖާއާއެކު ވުލްފްސްބާގް އޮތީ ތާވަލުގެ ހަތަރުވަނައިގައި 33 މެޗުން 61 ޕޮއިންޓާއެކުއެވެ.