ބެކްލޮގެއް އައީ ކުއްލިއަކަށް ކޭސްތައް އިތުރުވުމުން: މަބްރޫކް
މިސަރޖާއެކު އަތޮޅުތެރޭގެ ވެސް ކޭސްތައް އިތުރުވެގެން ދިޔައީ ކުއްލިއަކަށް
ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މަބްރޫކް އަޒީޒް ވާހަކަދައްކަވަނީ
ނަތީޖާ ނުލިބި ސާމްޕަލްތައް ލަސްވީ ގިނަ ސަބަބުތަކާއެކު، މިފަހަރު ކުރިމަތިވި ސަރޖު ކުއްލިއަކަށް އައުމުން ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.
އަންގާރަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒު ވިދާޅުވީ ބެކްލޮގެއް އުފެދެން ދިމާވި ވަރަށް ގިނަ ސަބަބުތަކާއި ހުރެ ކަމަށެވެ.
މަބްރޫކް ވިދާޅުވީ މާލެސިޓީއަށް ކުރިމަތިވި މިސަރޖާއެކު އަތޮޅުތެރޭގެ ވެސް ކޭސްތައް އިތުރުވެގެން ދިޔައީ ކުއްލިއަކަށް ކަމަށެވެ. އެހެންކަމުން އަތޮޅުތެރޭގެ ރަށްތަކުގައި ސާމްޕަލް ނެގުމާއި ޓެސްޓު ކުރުމުގައި ދަތިތަކެއް ކުރިމަތިވިކަން މަބްރޫކް ފާހަގަކުރެއްވިއެވެ. އަދި ވިދާޅުވީ އަތޮޅުތެރޭގެ ރަށްތަކަށް ޓެސްޓު ކިޓް ލިބުމުގައި ވެސް ކޮންމެވެސް ވަރެއް ދަތިތަކެއް ކުރިމަތިވި ކަމަށެވެ.
މީގެ އިތުރުން މަބްރޫކް ވިދާޅުވީ ހުޅުމާލެ ހޮސްޕިޓަލް ޕީސީއާރް ލެބޯޓްރީގެ މޭޝިންގެ މައްސަލައެއް ޖެހި، ބޭނުން ނުކުރެވި ދުވަސްތަކެއް ފާއިތުވެގެންދިޔަ ކަމަށެވެ. އެހެންކަމުން މާލޭގެ ޓެސްޓިން ކެޕޭސިޓީ ވެސް ދަށްވެގެން ދިޔަ ކަމަށް މަބްރޫކް ވިދާޅުވިއެވެ.
ކޭޕޭސިޓީ އިތުރުކުރުމަށް ގިނަ މަސައްކަތްތައް ކުރާކަން ފާހަގަކުރައްވައި މަބްރޫކް ވިދާޅުވީ އަތޮޅުތެރޭގެ ރަށްތަކުގެ ފެސިލިޓީތަކަށް ވެސް ޓެސްޓުކިޓްތައް ފޮނުވި އިތުރަށް ހަރުދަނާ ކުރެވިފައިވާ ކަމަށާއި، ރަނގަޅު އިންތިޒާމެއްގެ ތެރެއިން އެކަންކަން ބަލަމުންދާނެ ކަމަށެވެ. އަދި ވިދާޅުވީ މާލޭގައި ހިއުމަންރިސޯސް އިތުރު ކުރުމުގެ މަސައްކަތް ކުރިއަށްދާ ކަމަށެވެ. އެގޮތުން ބަލި ކޮންޓްރޯލް ކުރުމަށް ކުރާ މަސައްކަތްތައް ފުޅާކުރެވި، އެޗްއީއޯސީގެ މަސައްކަތްތައް ވެސް އިތުރަށް ހަރުދަނާ ކުރުމުގެ މަސައްކަތްތައް ކުރިއަށްދާކަން މަބްރޫކް ފާހަގަކުރެއްވިއެވެ. އަދި ސްޓާފުން އިތުރު ކުރުމުގެ މަސައްކަތްތައް ކުރަމުންދާ ކަމަށް މަބްރޫކް ވިދާޅުވިއެވެ.
