ދަރުމަވަންތަ ހޮސްޕިޓަލުގެ ސުކޫކް އިޝޫ ކުރަނީ ކުރިން ނަގާފައިވާ ޔޫރޯ ބޮންޑު މެޗުއާ ވާތީ - މަބްރޫކް

ދަރުމަވަންތަ ހޮސްޕިޓަލުގެ ސުކޫކް އިޝޫކުރުމަށް ފިނޭންސް މިނިސްޓްރީން ނިންމީ، 2017 ގައި އިޝޫކުރި ޔޫރޯ ބޮންޑު، މިއަންނަ އަހަރު މެޗުއާ ވާތީކަމަށް ރައީސް އޮފީހުގެ ތަރުޖަމާނު މުޙައްމަދު މަބްރޫކް އަޒީޒް ވިދާޅުވެއްޖެއެވެ.

ބުދަ ދުވަހު، ރައީސް އޮފީހުން ބޭއްވި ނޫސްވެރިންގެ ބައްދަލު ވުމެއްގައި، މަބްރޫކް ވިދާޅުވީ، 2017 ވަނަ އަހަރު ނަގާފައި އޮތް ޔޫރޯ ބޮންޑުގައި 6.3 ބިލިއަން ރުފިޔާ ވާކަމަށެވެ. އަދި ފެށޭ އަހަރަކީ އާދަޔާ ޚިލާފަށް، ގިނަ އަދަދެއްގެ ފައިސާ އަނބުރާ ދައްކަން ޖެހިފައިވާ އަހަރެއްކަމަށް ވެސް މަބްރޫކް ވިދާޅުވިއެވެ.

އެހެންކަމުން، ދަރުމަވަންތަ ހޮސްޕިޓަލުގެ ސުކޫކް އިޝޫ ކުރުމުން، މި އަންނަ އަހަރު އެއްފަހަރާ، 250 މިލިއަން ޑޮލަރުގެ ފައިސާ އަނބުރާ ދެއްކުމުގެ ބަދަލުގައި، އެ ފައިސާ ފަސް އަހަރަށް ބަހާލައިގެން ދެއްކޭނެ ގޮތް ހަމަޖެހިގެން ދާނެކަމަށް މަބްރޫކް ވިދާޅުވިއެވެ.

ދަރުމަވަންތަ ހޮސްޕިޓަލުގެ ސްކޫކް އިޝޫ ކުރުމުން، އެތަނުގެ މިލްކުވެރިކަން ގެއްލިދާނެކަމަށް ހީވެފައި އޮންނަ އޮތުމުގެ މައްޗަށް އަލި އަޅުއްވާލައްވައި މަބްރޫކް ވިދާޅުވީ، ދަރަނި ނުދެއްކޭ ހާލަތުގައި އެހެން ބައެއްގެ ތަނަކަށް ވެގެން ދާނެކަމަށް ދެކެވޭ ވާހަކައަކީ ވަރަށް ބޮޑު އޮޅުމެއް ކަމަށެވެ. އަދި ސުކޫކްގެ އެއްބަސްވުމަކީ އިޖާރާ އެއްބަސްވުމެއްކަމަށާއި، އޭގެ ދަށުން 100 އިންސައްތަ ސަރުކާރުގެ ހިއްސާ އޮންނަ ސްޕެޝަލް ޕާޕޯސް ވެހިކަލް އެއް ނުވަތަ އެސެޓް ރެޖިސްޓާ ކުރުމަށް ހެދޭ ކުންފުންޏެއްގައި، އެސެޓް ބޭއްވެނީ ކަމަށެވެ. މިގޮތަށް އެސެޓް ޑިކްލެއަރ ކުރަންޖެހެނީ، އެސެޓުން ލިބޭ ފައިދާ ސުކޫކަށް ރީފައިނޭންސް ކުރުމުގެ ބޭނުމުގައި ކަމަށް މަބްރޫކް ވިދާޅުވިއެވެ.

މަބްރޫކް ވިދާޅުވީ، މިފަދަ އެއްބަސްވުމެއްގައި އެއްވެސް ހާލެއްގައި އަދި އެއްވެސް މަރުހަލާއެއްގައި ދަރުމަވަންތަ ހޮސްޕިޓަލް ރަހުނު ކުރެވިގެން ނުދާނެ ކަމަށެވެ. އަދި ދަރަންޏަށް ފައިސާ ނުދެއްކޭ ހާލަތެއްގައި ވެސް ދަރުމަވަންތަ ހޮސްޕިޓަލުގެ މިލްކުވެރިކަން ގެއްލިގެން ނުދާނެކަމަށާއި، އެކަމަށް ޒިންމާވާން ޖެހޭނީ ސަރުކާރުން ކަމަށް މަބްރޫކް ވިދާޅުވިއެވެ.