އެޗްޕީއޭގެ ގައިޑްލައިނަށް ބަދަލުތަކެއް ގެނެސް އިންތިޚާބުގެ ކަންކަމަށް ލުއިތަކެއްދެނީ
ގައިޑްލައިނާ ގުޅިގެން ހުރި ކަންބޮޑުވުންތައް އީސީން ވަނީ ފާޅުކޮށްފައި
މިނިވަން މުއައްސަސާތަކުގެ ކޮމިޓީގެ ބައްދަލުވުމުގައި އީސީ އަދި އެޗްޕީއޭގެ އިސްވެރިން
ކުރިއަށް އޮތް ލޯކަލް ކައުންސިލް އިންތިޚާބުގެ ކަންކަން ކުރިޔަށް ގެންދިޔުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އެކުލަވާލާފައިވާ ގައިޑްލައިންގައި ހުރި ކަންކަން ލުއިކޮށް، އިންތިޚާބު މިހާރަށްވުރެ ފަސޭހަ އަދި ޚަރަދުކުޑަކޮށް ބޭއްވޭނެގޮތްތަކަކަށް ބަދަލުތައް ގެނައުމަށް ނިންމައިފިއެވެ.
ކޮވިޑްގެ މި ޕެންޑަމިކްތެރޭގައި ލޯކަލްކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު ބޭއްވުމަށް ޤާނޫނުން މިހާރު ވަނީ އިލެކްޝަންސް ކޮމިޝަންގެ މައްޗަށް ލާޒިމްކޮށްފައެވެ. އަދި އިންތިޚާބު ކުރިޔަށް ގެންދަންޖެހޭނީ އެޗްޕީއޭއިން ހަދާފައިވާ ގައިޑްލައިނާ އެއްގޮތަށް ކަމަށް ޤާނޫނުގައި ބުނާއިރު އެގޮތުގެ މަތިން އެޗްޕީއޭއިން ވަނީ ގަވާއިދެއް އެކުލަވާލާފައެވެ. އެގޮތުގެ މަތިން އެޗްޕީއޭއިން އެކުލަވާލި ގައިޑްލައިނުގެ ސަބަބުން އިންތިޚާބު ބޭއްވުމަށް ދަތިތަކެއް ކުރިމަތިވެ ހަރަދުތައް އިންތިހާއަށް ބޮޑުވާކަމުގެ ޝަކުވާ އީސީން ވަނީ ކޮށްފައެވެ.
އެގޮތުން މިދިޔަ ހަފްތާގައި މާލިއްޔަތު ކޮމިޓީން ބޭއްވި ބައްދަލުވުމުގައި އެކަމުގެ ކަންބޮޑުވުންތައް އީސީން ފާޅުކޮށްފައިވާއިރު ގައިޑްލައިންގެ ކަންތަކުގައި ހައްލެއް ގެނައުމަށް މިނިވަން މުއައްސަސާތަކުގެ ކޮމިޓީން ވަނީ އީސީ އާއި އެޗްޕީއޭ އާ ބައްދަލުކޮށްފައެވެ. ހޯމަ ދުވަހު ބޭއްވި ކޮމިޓީގެ ބައްދަލުވުމުގައި ވާހަކަ ދައްކަވަމުން އީސީގެ ރައީސް އަހުމަދު ޝަރީފް ވިދާޅުވީ އެއްވެސް އިރެއްގައި އެޗްޕީއޭއިން އެކުލަވާލާފައިވާ ގައިޑްލައިނާ ޚިލާފުވަނީ ނޫންކަމަށާއި އެޗްޕީއޭއިން ތައްޔާރުކުރާނީ ބަލިން ރައްކާތެރިވާނެ ގޮތްތަކަށް ބައްލަވައިގެން ކަމަށް އެނގިވަޑައިގަންނަވާކަމަށެވެ. ނަމަވެސް އެގޮތުގެ މަތިން ގައިޑްލައިން އެކުލަވާލުމުން އިންތިހާބުގެ ކަންކަން ކުރިޔަށް ގެންދިޔުމަށް އީސީއަށް ދަތިތަކާކުރިމަތިވެ ޚަރަދުތައް އެތައް ގުނައަކުން ބޮޑުވެގެންދާކަމަށް ޝަރީފް ވިދާޅުވިއެވެ.
މީގެއިތުރުން ޤާނޫނުގައި ބުނާ ކެމްޕެއިންކުރުމުގެ 28 ދުވަހުގެ މުއްދަތެއް މަރޗް މަހުގެ 12 ވަނަ ދުވަހުން ފެށިގެން ދޭންޖެހޭއިރު ހަމަހަމަކަމާއެކު އެފުރުސަތު ނުދެވިދާނެކަމުގެ ބިރު އެބައޮތްކަމަށް ޝަރީފް ވިދާޅުވިއެވެ. އަދި އިންތިހާބުގެ ކަންކަން ކުރިޔަށްދާ ގޮތުން ކޯޓަށް މައްސަލަ ހުށަހަޅައިގެން އެފަރާތްތަކަށް ކާމިޔާބުކުރެވިދާނެ ފަދަ ކަންތައްތަކެއް އެބަހުރިކަމަށް ޝަރީފް ވިދާޅުވިއެވެ.
މީގެއިތުރުން ޝަރީފް ވިދާޅުވީ އޮފިޝަލުން ތަމްރީންކުރުމަށް ރަށްރަށަށްދާ އޮފިޝަލުންނަށް 5 ދުވަހުގެ ތެރޭގައި އެކަން ނުކުރެވިއްޖެނަމަ 10 ދުވަހުގެ ކަރަންޓީނުގެ މުއްދަތެއް ފުރިހަމަކުރަންޖެހޭއިރު ބައެއް ހިސާބުތަކުގައި 5 ދުވަސްތެރޭގައި ޓްރެއިނިންގ ކަންތައް ނުނިމޭނެކަމަށެވެ. އެހެންކަމުން ކަރަންޓީނުވާން ޖެހޭގޮތަށް އޮންނަ އޮތުމުގެ ސަބަބުން އިތުރު ހަރަދުތަކެއް ހިނގަމުންދާކަމަށް ޝަރީފް ވިދާޅުވިއެވެ.
މީގެއިތުރުން އިންތިޚާބު އޮންނަ ދުވަހު ޕޮޒިޓިވްވާނެ މީހުން ނޭންގޭއިރު އެމީހުންނަށް ވޯޓުލުމުގެ އިންތިޒާމު ވަކިން ހަމަޖެއްސޭނެ ގޮތެއް ނޯންނާނެކަމަށް ޝަރީފް ވިދާޅުވިއެވެ. އެއީ ވޯޓަރސް ލިސްޓަކީ މާކުރިން ތައްޔާރުކޮށް ސޮއިކޮށްފައި އޮންނަ ލިސްޓަކަށްވާއިރު އެފަދަ ގޮތަކަށް ކަންކަން ކުރުމުގެ ފުރުސަތު ނުލިބޭކަމަށް ޝަރީފް ވިދާޅުވިއެވެ. މީގެއިތުރުން މޮނިޓަރިންގ ގައި އޮންނަ ރަށެއްގައި ވޯޓުލުމުގެ ކަންކަން ކުރިޔަށް ގެންދެވޭނެ ގޮތެއް ގައިޑްލައިނުގައި ނުވާކަން އީސީން ފާހަގަކުރިއެވެ.
ގައިޑްލައިނާ ގުޅިގެން އީސީގެ ކަންބޮޑުވުންތައް ފާޅުކުރުމުން އެޗްޕީއޭގެ ޑިރެކްޓަރ ޖެނެރަލް މައިމޫނާ އަބޫބަކުރު ވިދާޅުވީ ގައިޑްލައިން އެކުލަވާލާފައިވަނީ ރައްކާތެރިކަމުގެ ފިޔަވަޅުތަކަށް ބާރުއަޅައިގެން ކަމަށެވެ. މިގައިޑްލައިނުން ކިޔައިދެނީ އިންތިޚާބު ކުރިޔަށްދާއިރު ދެން ކަންތައްތައް ކުރަންވީ ގޮތްކަމަށް މައިމޫނާ ވިދާޅުވިއެވެ.
ދެ ފަރާތުގެ ވާހަކަތަކަށްފަހު ކޮމިޓީން ނިންމާފައިވަނީ އިންތިޚާބު ބޭއްވުމަށް މަގުފަހިވާގޮތަށް ގައިޑްލައިނަށް ބަދަލުތަކެއް ގެނައުމަށްފަހު މަރޗް މަހުގެ 11 ވަނަ ދުވަހު ކޮމިޓީއަށް ހުށަހެޅުމަށެވެ.
މިދިޔަ ހަފްތާގައި މާލިއްޔަތު ކޮމިޓީގެ ބައްދަލުވުމުގައި ވާހަކަދައްކަމުން އީސީން ބުނެފައިވަނީ އެޗްޕީއޭގެ ގައިޑްލައިނާ އެއްގޮތަށް އިންތިހާބު ބޭއްވުމަށް 42.8 މިލިއަން ރުފިޔާ އިތުރަށް ބޭނުންވާކަމަށެވެ. އެބަޖެޓް މުރާޖާކުރުމަށްފަހު ކޮމިޓީން ނިންމާފައިވަނީ ގައިޑްލައިނާ އެއްގޮތަށް އިންތިހާބު ބޭއްވުމަށް 29 މިލިއަން ރުފިޔާގެ ބަޖެޓެއް ދޫކުރުމަށެވެ. އިންތިޚާބު ބޭއްވުމަށް އީސީއަށް 51.1 މިލިއަން ރުފިޔާގެ ބަޖެޓެއް ވަނީ މިދިޔަ އަހަރު ފާސްކޮށްފައެވެ.
